Read Bum Fêt 14 Bible Online

Fêt 14 - Bum bible

Fêt 14

¹Bôl ghê Bànabâs tî yen a Ìkonìyùm lyi yen a ghɨt a Jûs à ndâ chìnti kə te ghɨna ndùku nê nâbi afa, yiki wu lum wu kananu, ghɨt a Jûs nì tumu bimi ha Bâba, dô kə ni.

²Biyani ghɨt a Jûs ghê ghɨ tì tunhe hi bimi ha Bâba yîmì hi tè lèm a gha a tumu təm na ghɨna hi bâŋhè lâ ha ghɨt a bime mɨ ghɨ̂n, à bà.

³Kum ni, Bôl ghê Bànabâs chyə kwok afû nâ wu yu dâ. Ghɨna ndùku jîsà a ghâ kum Bâba fânà wi nâ hakoh. Bâba chwûtì banhi na a tum yi nì ghɨna na ghɨna yiki kum nì təm a jûŋà Fùyènà na ghɨ mô kə hamok, fî fo a jyak shyəma ghɨna hi chwûtè chwesu gha kanasu.

⁴Biyani ghɨt ghe ghɨ ndùku mô a yi tèk afû hì kəta a jyàhì wùna, ghɨt ale tôkà ghɨt a Jûs, ghɨ le tôkà kə gha ye ghɨt a tuma Jisòs ndùku jîsà.

⁵Tumu nì ghɨt a Jûs ghɨ le, bakhe nâ nì ghɨt ghe ghɨ ndùku tihe ghɨna lem na ghɨ nè nyâblèlò nì ghɨt a tum mɨ ghɨ̂n ma fê tumle ywiti ghɨna nì te.

⁶Bôl ghê Bànabâs yu ben nì gha tɨni ni tet yen a Lìsitilà ni Debì, a mô tù tèk a Lìkoniyà, fî yen kəbi a mu tèklâ me mù ndùku bakhe

⁷hì fôktè yênà kə ni tum yì jùŋ afû kum Bâba.

⁸À hì mô yi tèk yi Lìsitilà wùt lè mô afû ma ghɨ tì shihi bwə wûn ma wù ti kə̂blì mô teka wù yê timè gbi nâ hakoh.

⁹Wùt mu wunâ hì yute kwoka te Bôl ndùku jîsà ha ghɨta. Bôl ki yen nì wun ni, yen na wù kətalò bimînì yi mô hi nì na wù ta,

¹⁰jis ha wun a jyə̂ yì tâ na, “Lòti timi chilichili.” Wùt àtɨ̂n sak lôtì hì gbê kata afû.

¹¹Nôn à ghɨt ghe yen gha ye Bôl tì ne hi bwate jîsà yi jìs yi laki na, “Mùna mò mù yèn te mù lo a nyə̂ chwo ben te à ghɨ̂t ha ghàhnà.”

¹²Ghɨna chwu yi yet yi Bànabâs na Sûs, chwu yet yi Bôl na Hemìs beka à ndùku mô wûn wùt wù jìsana.[4]

¹³Nda ye ghɨta ndùku yê kokhe Sûs atɨ̂n ndùku mô kə yi bi tèki. Ngàŋ à Sûs ben nì mbòŋsù nì flawàsù ma ti labhi nyamsu atɨ̂n na ghê nôn à ghɨ̂t ghe fo yi fô atɨ̂n ha Bôl ghê Bànabâs a jwô mbàn afa nda ye ndùku mô atɨ̂n.

¹⁴Ghɨna yu gha ye ghɨt ghê ndùku khɨŋa hi nì bâtì njusu ghɨnasu, nyiŋ lye atɨ̂n à nòn afû bwat buf na,

¹⁵“Sun sahisu ghàn nè ghə ni? Ghàh mò kə à ghɨ̂t te ghàn. Ghàh ben nì tum yì jùŋ yinâ ha ghàn hi nì na ghàn de yèn mù fə̂m ma ghàn ben ha Yèn fe fu chyə a mô funfe fu fate nyə nì chyə nì jwò yì chìk nì nâbi ghə ghe ghɨ mô atɨ̂n.

¹⁶À ndùku mô ashyə̂ Yènfù de nâbi nde na wù hi mô kə wu lum afâ wù kòŋà.

¹⁷Biyani faŋa wi hi chwùtè banhe ngɨŋ à wûn a gha jûŋà afa wù nè. Wu nê wuli nâ, mwə̀ mù yə̂mù ləma a mu fùk kə nâ wu yu jûŋù, wu fo mwə̀ mù yə̂mù ha ghàn nê ghàn saŋlê.”

¹⁸Jîs yi Bôl ghê Bànabâs mi yîn tàhì na kə ghɨta fo fo ha ghɨna nâbi te yi ndùku bone wi hi tàmtè ghɨna.

¹⁹Ghɨt a Jûs ale lo ben yi tèk yi Antiyòk nì Bìsidiyà nì Ìkonìyùm ni na nôn à ghɨ̂t ghê hi ywo kə gha ye ghɨna jîsà, tumli Bôl nì te guf fwu nì wûn a yi tèk afû kwâktè kə na wù ti kpû.

²⁰Biyani jùmtìbàmsu Jisòs sù ben yûŋtì a Bôl a ngwùŋ wù lôtì kaha lyi yen atɨ̂n à yì tèk. Tuku yû, wù lô ghê Bànabâs yen a yi tèk yi Debì.

²¹Bôl ghê Bànabâs fôktì tum yì jùŋ a Debì, ghɨta bimi hidù hì mô jùmtìbàmsù Jisòs. Ghɨna lô kaha gbi tohna a Lìsitilà nì Ìkonìyùm ben tan a Antiyòk,

²²ni na ghɨt a bimena tôkà khɨti bimînì ma fê lem təm a ghɨna yi gha afa ghɨna bime. Ghɨna fî jis kəbi na, “Ghàhnà kətalò hi tohna chyà atɨn à sù ngə̂k su dô kə ni a mbye afân shyəma ghàhnà bê lye yi lak yi fə̀n wù Fùyènù.”

²³À ndùku mô nâ kəbi atɨ̂n à ghɨ̀ni nòn à ghɨt a bimena, Bôl ghê Bànabâs chwokti chəhsu ndâ Fùyènsu fo ha ghɨna. Ghɨna hì jə̂mà fê bama yi jwô, ki fo chəh mi sîn a Bâba a wô a we ghɨna tì samhe ha wûn.

²⁴Te ghɨna gbê tohne a Bìsidiyà yen a yi lak yi Bàmfiliyà,

²⁵fôktè tum yì jùŋ ha ghɨt a Begà kaha lo chwo a yi tèk yi Àtaliyà,

²⁶kaha lo afû lye a ngwùk kaha yen a Antiyòk yi lak yi Siliyà, wu lùk afa ghɨ tì fo ghɨna a Yènfù wô na fu tokna nì ghɨna, hi nè mìhì fêt ye ghɨna ndùku mô ma ghɨ ti nî ben tan afû.

²⁷À hì mô te ghɨna bèna a Antiyòk ghɨna yûŋtì nôn ghɨt a bimena afû fôktì kwok gha ye Yènfù gamte ghɨna ti nî nâ à jɨ̀m, fî fôktì kəbi te Yènfù fo lumu na tumu boŋà bimi Jisòs.

²⁸Ghɨna chyə̂ nâ wu yu dâ ghê jùmtìbàmsù Jisòs afû.