Read Bum Fêt 16 Bible Online

Fêt 16 - Bum bible

Fêt 16

¹Bôl ghê Silàs tî gbî tohna a Debì yen tan a Lìsɨtɨlà. Wùt bimena wùlè chyə afû yet yi wuni mô Timotì, nè wûn mô wut wù bimena, a mô wùt à Jûs, bè wûn mô wùt à Gɨlìs.

²Timotì ndùku kəta chyənà yì jùŋ, ghɨt a bimena a Lìsìtɨ̀là nì Ìkonìyùm khə.

³Bôl hì khɨŋa na Timotì lo ghê wûn, ki nî na ghɨ fati wûn. Wù tì ni ni beka ghɨt a Jûs ghe ghɨ ndùku chyə afû ndùku khə na bè wûn mò wut à Gɨlìs.

⁴Ghɨna lô hì gbê tohne kə a tu tèk a tu tèk fôktè yênà nì sak te ghɨt a tuma Jisòs nì chəhsu a Jèlusalèm tì lèma na ghɨt a bimena hi nê, jis na ghɨna momhi hi tè lèm saktu tɨntu.

⁵Kum ni, bimînì ye ghɨta ndùku kəta nâbi yìni tèki hì ta yênà kə ashyə̂, nâ ghɨt a dona hì bimî chîntè nôn à ghɨt a bimena kə tuk mù jɨ̀m.

⁶Bôl ghê sunsu wunsu tohna kə yi tohnâ à Fùlijìyà nì Gàlesiyà beka Yohnà Yulena tà tì de jə na ghɨna fokti tum yì jùŋ a Esiyà.

⁷À hì mô te ghɨna ye bakhe a Mìsiyà hì khɨŋa hi kwôk hi yèn nì lumu a Bìtinìyà, Yohnà Jisòs fî tunhi na kə ghɨna kwok afû.

⁸Kum ni, ghɨna bɨlì chwo tohna a Mìsiyà yen tan a yi tèk yi Tɨ̀luwàs.

⁹À hì mô ntuksu lɨ̂ŋhà yi gha fwo a Bôl yi kə̀k ni te à wun chyə jem. Wù yen wùt ma wù lo yi lak yi Màsìdoniyà wu mô a wun ashyə̂, chyati wûn jîsà na, “Dàŋà bî a Màsìdoniyà ma wò gàmti ghàh.”

¹⁰Yi bàm atɨ̂n, ghàh à ghɨna bakti kə wu yu hi dàŋ a yèn a Màsìdoniyà, beka ghàh tî yen na Yènfù khɨŋa na ghàh yê fokti tum yì jùŋ ha ghɨta afû.

¹¹Ghàh lô a Tɨ̀luwàs lye a ngwùk chem daŋ yen kə a fu laklà fu lefu atɨ̂n à jwò yì chìk ghɨ toŋte na Sàmotès. Tuku yû ghàh yen a yi tèk yi Nìyabolìs.

¹²Lô afû yen a Fìlibây a mô nâ tèk yi tâ ye yi ndùku mô a Màsìdoniyà. À ndùku mô ni, ghɨt a dona ghe ghɨ ndùku chyə afû a mô ghɨt a lûmà, ghàh chyəti kwok afû ni.

¹³Tuk wu lak wu ghɨt a Jûs wule bên, ghàh fwo yi tèk afû yen a yi bi jwôlì beka ghàh ndùku khə na à mò luk we ghɨt a Jûs ndùku dô yûŋtè afû jə̂mà. Ghàh yen tan afû, chwo ndokò yiki ywen ghe ghɨ tì bèna.

¹⁴À hì mô atɨ̂n à ywen afân ghe ghɨ tì yùŋte hì yute te Bôl jìsà, wùlè mô atɨ̂n yet yi wuni mô Lidiyà ma wù fwo yi tèk yi Tɨ̀yàtilà wu bəkle sùnju su ta wu kâ nâ a jûŋ, a fê mô wut kokhe Fùyèn. Bâba jîmì kwâktì wuni na wù ywô khɨli gha ye Bôl ndùku jîsà ma wù bimi.

¹⁵Ghɨ fô mòlû ha wûn fî fo kəbi ha ghɨt ghe ghê ghɨna ndùku chyə amok. Wù ki jîs ha ghàh na, “Ghàn bê chyə a mu ndâ chîn te ghàn yena na mu ti bimî hamok ha Bâba.” Wù chyati chyâhì ghàh, ghàh ghaŋ a ghâ yenlò.

¹⁶Tuku lefu, ghàh hì fê yênà wu lùk wu jəmanu ghàh à wan wù ywên wùlè ma ghɨ tì bəkle a kwòs ha wùt, kwonà wu lûm. À ndùku mô ni, yohnà be ale mô a wun wù wùn nê na wù hi fôktè gha ghe ghɨ bè gânà ha ghɨta. Wù ndùku nê ni kolo nì kà ha ghɨt a wuna.

¹⁷Wù hì jùmtè bênà ghàh à Bôl bwate jîsà kə na, “Ghɨt ghɨ̂n mò ghɨt a fetana Fùyènà fê fu ngaŋte chyâ nâ yèn mù jɨ̀m. Ghɨna fòktè lum we Yènfù mò hi bònhì ghàn atɨ̂n.”

¹⁸Wù tî jis kwôk nì gha yîn nâ mu tuk hidù, lâ bâŋ Bôl, Bôl jis ha yohnà be mu ghe na, “Mu ti kân ha wò a Jisòs Klistù yi yet na wò fwu a wan wûn a wù wùn.” Yohnà be ghê fwo a wun wù wùn kə wu yu mefû.

¹⁹À hì mô te ghɨt a wuna yena na lum we ghɨna khɨte ka atɨ̂n ti bêf, ghɨna kwo Bôl ghê Silàs sen yen nì ghɨna a ghɨt a saka ashyə̂.

²⁰Te ghɨna bèna nì Bôl ghê Silàs a ghɨt a sakana ashyə̂ jis na, “Ghɨ̂n mò ghɨt a Jûs ghe ghɨ gbê shîkà ngəksu, tàhè à ghɨ̂t a ghàhnà yi tèk.

²¹Ghɨna yike chyəna we sak yi ghàhnà te ghɨt a Lûmà tunhe na kə ghàhnà hi chyə̂.”

²²Nôn mu ghê afû fen kə Bôl ghê Silàs a tô nì sami. Ghɨta yi sak ghê jis na ghɨ kwô chwokti njusu a ghɨna wùn ma sam ghɨna nì wànsù.

²³Sojàsù sam ghɨna yen lem a chyâk. Ghɨna jis ha wùt we wù ndùku fêtà afû na wù fate fa ghɨna.

²⁴Wùt mu wunâ yu yi sak mi yîn lyi lyi nì ghɨna nâ atɨ̂na ndâ chyâk kum ghâŋtà fwəni ghɨna a kòm mù kàkù.

²⁵À hì mô ntên ntuksu, Bôl ghê Silàs hì jə̀mà yema sù njàŋ ha Yènfù, ghɨta ndâ chyâk ale ywo gha ghê ghɨna ndùku yema jîsà.

²⁶Kə ni, chyə shɨ̂ŋ hì nêkà ndâ chyâk àtɨ̂n hì nô hi fên. Jwo sù ndâ jîmì nâ à jɨ̀m. Mwə̀ me ghɨ tì kùma ghɨt a ndâ chyaka atɨ̂n yâtà nâ mù jɨ̀m a ghɨna yi fwən.

²⁷Wùt we wù ndùku chînà ghɨta ndâ chyâk shɨ̂ŋ lôtì, yen ma jwo ndâ chyâk à jɨ̀m ti jîmì, wù chwok yi fâ, hì khɨŋa hi ywe ngɨŋ à wûn beka wù ndùku kwâktè na ghɨta ndâ chyâk ti têt.

²⁸Biyani Bôl bwat jis na “Kə ywi ngɨŋ yâ, ghàh mò kə afân à jɨ̀m.”

²⁹Wùt mu wunâ toŋa jis na ghɨ ben nì lâm, wù lyi fen a Bôl ashyə̂ ghê Silàs hì chiŋtê kə ni beka wù ndùku fânà.

³⁰Wù lyi fwu yen nì ghɨna a bɨn, buf ha ghɨna na, “Bâba ghɨ̂n, mu mò hi nì nâ ghə hi khɨte yi bôn agha?”

³¹Ghɨna jis ha wûn na, “Bimî ha Bâba Jisòs ma Yènfù bonhi wò ma fu fê bonhi ghɨt ghe ghàn à ghɨna chyə amok nâ à jɨ̀m.”

³²Ghɨna fôktì tum à Bâba ha wûn nì ghɨt ghe ghê ghɨna ndùku chyə amok.

³³Wùt mu wunâ lyi Bôl ghê Silàs su lemtu ghɨna tu nâbi te à ndùku mô ntuksu. Bôl ghɨ̂n fo mòlû ha ghɨna kə wu yu mefû nì ghɨt ghe ghɨ ndùku chyə a wun a ndâ.

³⁴Wùt àtɨ̂n lyi Bôl ghê Silàs yen nì ghɨna a ndâ, fo mwə̀ mù yə̂mù ghɨna yə̂. Wù hì saŋle nâ jùŋ nì ghɨt a wuna beka ghɨna bime ha Yènfù.

³⁵Tuku yu, ghɨta yi sak a ta ghe chinhi ghɨt a fetana na yê jis ha wùt mu we wù ndùku chînà ndâ chyak na wù de ghɨt ghê ma ghɨna lo.

³⁶Wùt mu wunâ fôktì ha Bôl ghê Silàs na ghɨ ti tum jis na mu de ghàn ma ghàn lo, ki jîs na, “Ghàn fwu lê ma ghàn hi kolê kə nì yutìnì.”

³⁷Bôl jis na, “Ghɨt a sakana tà che chwùtì na ghàh ti bobhi gha, biyani nî ghɨ che sâm ghàh a ghɨta ashyə̂ nâbi te ghàh mò ghɨt a Lumà! Ghɨna che khɨti ghàh lem a ndâ chyâk hì nyamte khɨŋa hi dè ghàh chîn njwô ghə? Ghàh wi hi mòm, à nè bê fihe kə ghɨna ghàh nì ngɨŋsu ghɨnasu.”

³⁸Ghɨt a fetana ghê kaha yen fôktì gha tɨni ha ghɨt a sakana a ta ghê. Te ghɨna ywo ni na Bôl ghê Silàs mò ghɨt a Lumà, fânì chiki kwo ghɨna.

³⁹Ghɨna yen afû yen Bôl ghê Silàs, chyati ghɨna na ghɨna lehèfo gha tɨni, jis ni, fihi ghɨna a ndâ chyâk afû chyati na ghɨna lo a yi tèk afû.

⁴⁰Te Bôl ghê Silàs fwo a ndâ chyâk afû, ghɨna lô yen a Lidiyà ndâ, yen a ghɨt a bimena afû jis ha ghɨna, fo a təm a ta ha ghɨna ki lô a yi tèk afû.