Read Bum Fêt 17 Bible Online

Fêt 17 - Bum bible

Fêt 17

¹Bôl ghê ghɨt a wuna tî gbî yen tohna yi tèk yi Àmfibolìs nì tèk yi Àbòlònìyà, ben tan a yi tèk yi Tèsàlonikà, ndâ yì yùŋtì mô afû.

²Bôl yen a nda afû, kə te wù ndùku gbê lye nâbi yìni nda yi yùŋte à ghɨt a Jûs, lyi tuk mù lak mù tât gûfnà kə a ghâ nì ghɨta ghe ghɨ mô fùtɨ̂n à ŋwàklù Fùyèn.

³Wù hì fôktè banhe kə gha ghe ghɨ fwo a ŋwàklù Fùyèn jyâna, Klistù we Yènfù chwoka lema kəta hi yen a ngə̂k, hi kpû ma Yènfù ni ma wù kahà loti a yi kpû. Wù ti jis kəbi na, “Jisòs wunâ a mu jìsà bênà ha ghàn ni, mò kə nâ Klistù.”

⁴Ghɨt a Jûs ale yû bimi gha ghe wù ndùku jîsà chîntì a nôn à Bôl ghê Silàs. Nâ a nôn a ghɨta ale a Gɨlìs hì ngumle Yènfù bakhe nì tu ywenu.

⁵Biyani ghɨt a Jûs ghɨ le lôhì a ghə̀k te ghɨta chìnte nôn à Bôl ghê Silàs yâ, yûŋtì nôn a mwəlà mù be ale ghɨ yîmì hi te gbè lòhè chyà ngəksu yi tèk. Ghɨna yen khɨm jwo ndâ Jasìn hì khɨŋa Bôl ghê Silàs hi kwo bèn nì ghɨna a ghɨta ashyə̂.

⁶Ghɨna lyi ben ni, tê yena jə̀ Bôl ghê Silàs bɨlì kwo Jasìn nì ghɨt a bimena ale guf ben nì ghɨna a ghɨta sakana ashyə̂ bwate jîsà na, ghɨt ghɨ̂n mò ni ma ghɨ ti nôhì mbyî yì jɨ̀m, ghɨna ghɨ hì mô ma ghɨ ti ben tan afân chîn,

⁷Jasìn ti lyi ghɨna fati lem a wun a ndâ. “Nâ ghɨna à jɨ̀m ghɨ gbê khɨmte chyâ saktu fə̀n à ghàhnà wù chìk Kaha jîsà na, fə̀n wùlè fè bènàlò yet yi wuni mô Jisòs.”

⁸Nôn à ghɨt atɨ̂na nì ghɨt a sakana yu bên nì gha tɨni yi fo ngə̂k ha ghɨna nâ haŋaŋ.

⁹Ghɨt a sakana atɨna nî Jasìn ghê ghɨt a bime ghê lak wu kâ afû, ghɨ de ghɨna lô.

¹⁰À hì mô ntuksu ghɨt a bimena lyi Bôl ghê Silàs chinhi na ghɨna tet à yen yi tèk yi Bèliyà kum ngə̂k mi yinâ. Ghɨna lo yen lye a ghɨt a Jûs ndâ yi yùŋtì,

¹¹Ghɨt ghe ghɨ ndùku mô afû ndùku mô kə nâ a ghɨt kôŋà hi yute a ghâ chyâ ghɨt a Tèsàlonikà. Ghɨna ndùku kôŋà nâ a jûŋ hi yute tum yì jùŋ faŋ hì taŋa ŋwàklù Fùyèn kə tuk mù jɨ̀m hi yen na gha ghe Bôl ndùku jîsà mò hamok agha.

¹²Ghɨt a dona afû bimî, bakhi nì ghɨt a ta, lɨmànà nì ywena a Gɨlìs boŋ bimî.

¹³À hì mô te ghɨt a Jûs a Tèsàlonikà ywo na Bôl ti boŋ fôktì gha Fùyènì ha ghɨt a Bèliyà, ghɨna yen afû lôhì à ghɨ̂t na ghɨ hi nô.

¹⁴Kə wu yu ghɨt a bimena chinhi Bôl ghê ghɨt ale na ghɨna chwo yen yi bi jwô yì chìk, biyani Silàs ghê Timotì faŋ kə a Bèliyà.

¹⁵Ghɨt ghe ghê Bôl tì lo amok tôknà nì wûn yen tan a yi tèk yi Atèn de wûn afû kaha ben a Bèliyà nì tum te Bôl tuma ha Silàs ghê Timotì na ghɨna nyâŋhè bê kwoti wûn.

¹⁶À hì mô te Bôl yute Silàs ghê Timotì a Atèn, wù shihi ke lihe yèn a yi tèk afû yen a mù mosò mu dô kə ni, gha tɨni hì fo ngə̂k ha wûn nâ haŋaŋ.

¹⁷Wù hì yênà a ndâ chìnte à ghɨt a Jûs, gûfnà a ghâ ghê ghɨna kəbi nì ghɨt ale ghe ghɨ ndùku ngumle Yènfù afû. Wù hì gûfnè a sù ngàm kə mu tuk mù jɨ̀m ghê ghɨt ghe ghɨna ndùku bê kwonà afû.

¹⁸Chichàsu ta su lesu a ghɨ ndùku toŋte na jùmtìsù Èbìkulùs nì ghɨt a Sɨ̀toyìk yen Bôl, ghɨ le hì bufa na, “Nki chichà wunâ mòmhè hi jìs na ghə khə wi gha yile agha?” Ghɨna jis ni, ghɨ le jis na wu mòmhè jîsà a ghâ kum nì yèn mù tûm. Ghɨna ndùku jîsà ni beka Bôl ndùku yike gha kum Jisòs fê yike na ghɨta bè lôtèlò a yi kpû.

¹⁹Ghɨna lyi ben nì Bôl yi yûŋtì ghɨt a sakana wu lùk afa ghɨna ndùku bênà yûŋtè afû a kùn à Àlabagùs jis ha wun na, “Fòkti ha ghàh kum nki yikî fe yîn a wò yike ha ghɨta ni?

²⁰Wò jîsà a gha ale ma ghàh tà ye timi yû, kôŋà na wò fôktê banhi gha atɨna ha ghàh?”

²¹À ndùku mô ni, ma ghe ghɨ bwə ghɨna a Atèn nì ghɨta ghe ghɨ tì bèna hì chyə afû kôŋà hi tè fôktè a gha fe ale ghe ghɨna ywo ha ghɨt ale.

²²Bôl lôtì timî atɨ̂n yì yùŋtè afû a Àlabagùs jis ha ghɨt mu ghe na, “Mu ti yen na ghàn khəlò hi ngumlî ha yènû nâ a jûŋ,

²³beka mu yê hì gbê kata yi tèk afân yen luk te ghàn ngumle yèn muna atɨ̂n, tu dô kə ni, fî yen bâŋà yi fo ale ma ghɨ ti nyak atɨ̂n na, ‘Ghɨ̂n mò ha Yènfù lefu wùt khə wi.’ Yèn fûn ghàn kokhe ni khə wi nâbi yi khə, mò kə nâ Fùyèn fe nâ mu ti fòktèlò gha ha ghàn chîn kum funfu.

²⁴Yèn mu fûn mò fê a fu fate mbyî fati sù nyâm fî fati nâ mwə̀ mù jɨ̀m me mù mò a mbyî. A mô fùfɨ̂n Bì we wù saka nyə nì chyə, chyə wijə a ndâ ma ghɨ ba nì wo hi tè kokhe fùfɨ̂n atɨ̂n.

²⁵Yèn mu fûn nê na ghɨt à jɨ̀m hi chyə̂. Fê fo nâbi ghə ghe a ghɨta khɨŋa, khɨŋa wi na wùt fo nâ shyə ale ha funfu.

²⁶Yènfù tì bwəm kə wùt wù mòk ashyə̂ nâ ghɨt lak tu jɨ̀m fwu kə ha wùt mu wuna wù mòk, Fu fo wu yu na ghɨt mɨ ghɨ̂n chyə fî fo wu luk we ghɨna nê hi chyə atɨ̂n.

²⁷Wù tì ni ni shyəma ghɨt à jɨ̀m hi khɨŋa wûn nì kwâktìnì na ghɨna làhi kùm a wun a ngwùŋ te ghɨna mòmhè hi khɨŋa wûn te ghɨt a fefana, nâbi yâ wù wijə hadà nâbi ha wùt wùlè a ghàhnà fùtɨ̂n.

²⁸Wùt wù tofana wùlè tî jis na, ‘À nè Fùyèn na ghàhnà hi chyə̂ gbê, fê mô nâbi ghə te ghàhnà mò à ghɨ̂n.’ Ghɨt a tofa atɨna ale fî jis kəbi na, ‘Ghàhnà mô kəbi mwəlà mù wûn.’

²⁹Ni te ghàhnà mò wana Fùyèn ni, ghàhnà kəta wi hi lyì na Yènfù mò a shyə te wùt ndokò kwâktè, wù chwi nâbi a kah makə wù chuf yi ti.

³⁰Yènfù tî lem na fu wi hi fo ngə̂k ha wùt, wu tuk afa wùt ndùku baha mô teka ma wu khɨli gha kum wûn biyani fu kânà nâbi ha nde afa chîn na wù kahi təm a wuna a wun a gha be.

³¹Yènfù tì kan ni beka fu hì mô ma fu ti lem tuk we fu bè saka ghɨt à jɨ̀m atɨ̂n a mbye afân kə chilichili. Fu bè nêlò ma wùt we wu chwoka lema ma wù sak ghɨt mɨ ghɨ̂n ha wûn. Fu ti chwûtì mihì gha mi yîn a ndan nâbi ha nde wu lum na fu che ni na wùt àtɨ̂n loti a yi kpû.”

³²À hì mô te ghɨna ywo te Bôl jìsa gha kum hi lôtì a yi kpû ghɨt ale hì chəka wûn, ghɨ le jîsà na ghɨ kôŋà na wù nê kahà bê jìsà kpenhi gha ha ghɨna kum gha mi yê.

³³A yu mefu Bôl lôtì fwu atɨ̂n à yi yûŋtì afû metì.

³⁴Ghɨta le yen chîntì nì Bôl bimi tum ye wù ndùku fôktè. Dayònìsìyùs a mô wut a chìnti afa a ghɨ tì khɨte a Àlabagùs yâ nì wùt ywên wùlè yet yi wuni mô Dàmalìs nì ghɨt ale ghe ghɨ ndùku mô atɨ̂n à ghɨt ghe ghɨ bime yâ.