Read Bum Fêt 18 Bible Online

Fêt 18 - Bum bible

Fêt 18

¹Bôl jis mihì ha ghɨta a Atèn lo afû yen a yi tèk yi Kolèn.

²À hì mô te wù ye tana afû yen wùt à Jûs wùlè ma ghɨ tì bwɨ wûn yi lak yi Bontùs, yet yi wuni mô Àkwɨlà, wù mô ma wù kùkti ben kə yi bên afû ghê ywê wûn Bìsilà. À ndùku mô ni, ma ghɨna lo a Lûm yi lak yi Italì, ben afû beka fə̀n Kɨ̀lodiyàs ndùku mô ma wù ti chyâhì saki na ghɨt a Jûs fwu a Lûm nâ à jɨ̀m. Bôl lo yen hi yen a ghɨna,

³ghê ghɨna hì chyəte kwokâ fê chîntè nê yi fêt amok beka ghɨna ndùku taha kəbi mwə̀lû te Bôl nì gwusu nyâmsù fate wìmù atɨ̂n.

⁴Bôl hì gbê lye kəbi a sù nda su chintesu kə a tuk mù lak mù ghɨt a Jûs mù jɨ̀m, gûfnà a ghâ ghê ghɨt a Jûs nì ghɨt a Gɨlìs, mômhè hi nì na ghɨta bimi gha ye wù jìsà.

⁵Silàs ghê Timotì lo a Màsìdoniyà yen a Kolèn. Bôl yen ni, de nâbi ghə ghe wù ndùku nê faŋ hì fôktè kə tum yì jùŋ ha ghɨt a Jûs fê chwûtè banhe na Jisòs mò wut we Yènfù chwoka lema.

⁶Ghɨna tunhi gha ye wù ndùku jîsà fî sûlì wûn. Wù fit jɨ̀m ha ghɨna jis na, “Ghàn shìki tê nè gha yîn ni, ma Yènfù de ghàn ma à hi mô sak yanì ma wo ma hi bu atɨ̂n. Mu ti de ghàn chîn, ma mu yênà hi fôktè tum yì jùŋ mi yinâ ha tumu.”

⁷Wù jis yani lo de ghɨt a Jûs mu ghê, yen hì chyə a ndâ nì wùt a tûm wùlè wu ngumle Fùyèn, yet yi wuni mô Tìsiyòs Jòstùs, ndâ wûn mô a ngwùŋ à ndâ chìnti.

⁸Wùt wùlè we wù ndùku mô a tû a ndâ chìnti yet yi wuni mô Kɨlisbòs, yu tum yì jùŋ mi yinâ nì ghɨt a wuna ghɨ sah yi nda, kəbi nì ghɨt a dona ale a Kolèn, bimî ha Bâba fyi mòlû.

⁹À hì mô tuk lefu ntuksu, lɨ̂ŋhà gha fwo a Bôl ashyə̂. Bâba jis ha wun na, “Kə wò fan ghɨt ghɨ̂n, wo jîsà kə yi jîs ha ghɨna,

¹⁰beka ghàh wò mò amok. Wùt lè nè nê wi gha ha wò. Wo yike kə yi yikî beka ghɨta ma nè fwolò a yi tèk afân dô kə ni.”

¹¹Te wù jìsa ni, Bôl fî chyə a Kòlitiyàns lɨ̂m à mòk nì njoŋsu tufa fôktè kə tum à Fùyèn.

¹²À hì mô te ghɨ lema Gàliyò na wù hi saka bâh à yi laka ghe ghɨ ndùku toŋte na Àkayà, ghɨt a Jûs ghɨ le yûŋtì khɨti Bôl yen nì wûn wu lùk wu saku.

¹³Ghɨna yen jis ha Gàliyò na, “Wùt wunâ nè na ghɨ hi kokhe Yènfù wu lum wule sak yahi bime wi.”

¹⁴Bôl hì ŋakhe bênà nì jwo wuni hi jìs, Gàliyò nyâŋhì jis kə na, “Ghɨt a Jûs ghàn yuti, à ye hì mô na Bôl wunâ ti khɨm saki, makə wù ni gha be yile ma mu yuti gha ye ghàn jìsà.

¹⁵Biyani à shìki mô ghàn gûfnà a gha kum nì yiki yile makə ghàn gùfnà kum nì yet a ghɨta makə à mò gha yile a ghàn atɨ̂n à yi sak, ma à nê hi khə kə ghàn. Mu wi hi timî hi tè sak nki gha mɨ ghɨ̂n.”

¹⁶Wù jis ni jyan na ghɨ jûmà fihi ghɨt a Jûs mu ghe a wu lùk wu saku afû.

¹⁷Ghɨt atɨna khɨti Sòstenìs we wù ndùku tihe gha a ghɨt a Jûs nda chìnti sam wûn ashyə̂ ndâ yi sak biyani Gàliyò tà ka jə̂ jyə̀ yi gha tɨni.

¹⁸Bôl chyəti kwok ghê ghɨt a bimena a Kòlitiyàns nâ a mu tuk, toŋte ha ghɨna ki lô. Ghê Bìsilà nì Àkwɨlà lo yi tek yi Kànkɨliyà hi yèn a yi lak yi Siliyà. À hì mô shyəma ghɨna lye a ngwùk hi lò, ma Bôl ti kwom to beka a ndùku mô yâ ma wù ti fah gha ghê Yènfù.

¹⁹Ghɨna gbi yen tan yi tèk yi Efisùs, Bôl de Bìsilà ghê Àkwɨlà yen a ndâ chinte à ghɨt a Jûs hì gûfnà a ghâ afû.

²⁰Ghɨna hì chyate wûn na ghê ghɨna chyətè kpenhi, biyani Bôl tunhî.

²¹À hì mô te wù hì lô, wù chwûnà ghɨna na yi bè kaha bênàlò a wu yu afa Yènfù bime. Wù jis yani lye a ngwùk lo de Bìsilà ghê Àkwɨlà afû.

²²Wù yen tan a yi tèk yi Sìsaliyà kwok yen hi toŋte nôn à ghɨt a bimena a Jèlusalèm, lo afû kaha chwo a Antiyòk.

²³Chyəti kwok yen afû a mu tuklâ, fî lo gbi tohna nâ luktu jɨ̀m a Gàliyò nì Fìlijiyà gâmtè yênà nì jùmtìbàmsù Jisòs sê su ndùku mô afû na su hi kəta təm a ta.

²⁴Wùt à Jûs wùlè we wù tì ləma kwoka yi tèk yi Àlèksandiliyà, yet yi wuni mô Àbolòs ben a Efisùs hì jîsà jis yile nâbi nde kôŋà hi yutî. Wu khə a gha atɨ̂n à ŋwàklù Fùyèn ghɨ dô kə ni.

²⁵Wù ndùku mô ma wù ti yiki gha ale kum lum te Bâba khɨŋa na ghɨta hi chyə atɨ̂n, hì jîsà nâ nì jyaka kum gha mɨ ghɨ̂n, chwûtè kə nâ na gha ye yi yike mò yi gha yi ta kə ni kum Jisòs, nâbi te wù ndùku tôkà khə nâ gha ghe Jon Fo Mòlû ndùku yike kum mòlû me wù ndùku fo ha ghɨta.

²⁶Bìsilà ghê Àkwɨlà yu yi yikî ye wù be hì yikê a ndâ chìnti nâ nì təm a ta, lâkà wûn a ghɨna bɨn. Wù bên ghɨna fati fôktì kwôk lum we Yènfù khɨŋa na ghɨta hi chyə atɨ̂n ha wûn.

²⁷À hì mô te Àbolòs khɨŋa hi yèn a Àkayà, ghɨt a bimena a Efisùs gâmtì wûn nyak ŋwàklù ha ghɨt a bimena a Àkayà na ghɨna fyi wûn kə nâ a jûŋ. Wù daŋ yên afû fo yi gâmtì chiki ha ghɨt ghe ghɨ ndùku mô ma ghɨ ti bimî kum jùŋ à Fùyènà.

²⁸Àbolòs hì gûfnà a ghâ kə nâ jûŋ, chwûtè banhe a ŋwàklù Fùyèn na Jisòs mò kə nâ we ghɨ chwoka lema, wùt à Jûs wùlè hì bu hi kùnhè gha ye wù ndùku jîsà.