Read Bum Fêt 19 Bible Online

Fêt 19 - Bum bible

Fêt 19

¹À ndùku mô te Àbolòs mò a yi tèk yi Kòlitiyàns a bàh à Àkayà, Bôl gbî tohna bâh à lak atɨ̂na yen a Efisùs yen a ghɨt a bimena ale,

²buf ha ghɨna na, “À ndùku mô te ghàn bime, Yohnà Yulena tî ben ha ghàn agha?” Ghɨna fîsì na, “Ghàh tà ye timi yu jə gha kum Yohnà Yulena.”

³Bôl buf ha ghɨna na, “Ghɨ tì fo yìni nki mòlû ha ghàn?” Ghɨna fîsì na “Ghɨ tì fo mòlû ha ghàh kum gha ye Jon ndùku yike.”

⁴Bôl ki jîs na, “Jon ndùku fo mòlû ha ghɨt ghe ghɨna kahe təm a ghɨna a ghɨna sùbe, fê jîsà ha ghɨt atɨ̂na na, ghɨna kəta hi bimi ha wùt we wù bênà a wun yi bàm, a mô Jisòs.”

⁵Ghɨt mɨ ghɨ̂n yu ni bimi ha Bâba Jisòs, ghɨ fo mòlû ha ghɨna hi chwùtì na ghɨna ti bimî ha Bâba.

⁶Bôl lem wu wô a ghɨna a tû Yohnà Yulena ben ha ghɨna, ghɨna yîmì hì tè jìs jîs tu lôtù, fê fôktè a gha a chwûtè Fùyèn.

⁷Lɨmànà ndùku mô afû hi kwoka tàn njwòsù bà.

⁸Yi bàm yi tɨ̂n Bôl lyi njoŋ sù tât, mô kə ndâ chìnti jîsà ghê ghɨt a Jûs, gûfnà nâ nì təm a ta, mômhè na ghɨna bimi na gha ye yi jìsà kum fə̂n wù Fùyènù mò hamok.

⁹Biyani à hì mô te ghɨt ale a ghɨna fùtɨ̂n ndùku ta nì tu tunhi na ghɨna nè bime wi gha ye Bôl jîsà, fê jîsà a ghâ ghɨ jwôfà wi a ghɨta ashyə̂ kum nì lum we Yènfù ndùku khɨŋa na ghɨ hi chyə atɨ̂n, Bôl de ghɨna. Wù shihi dè, lyi jùmtìbàmsu Jisòs sù, ghê ghɨna hì mô kə tuk mù jɨ̀m a nda afa Tìlanùs ndùku yike ghɨta atɨ̂n, ghê ghɨta gûfnà a ghâ afû.

¹⁰Bôl ni gha mi yîn a wu lɨ̀m wù bà, ghɨt a Jûs à jɨ̀m ni tum we wu ndùku mô a Esiyà yu yi gha kum Bâba.

¹¹À ndùku mô te Bôl baha mô kə a Efisùs, Yènfù nî wù hì nê gha kanana.

¹²Ghɨta hì lyê njusu Bôl su fetasu nì bâh wu sùnju we wù ndùku yâhà kə̂k yi wuni atɨ̂n yênà nì wunu ha ghɨt a yablena, nam mu wûn nê ghɨt atɨna tâ, Yohnù be fê fwo a ghɨna wu wùn.

¹³Ghɨt a Jûs ale ghê ghɨna ndùku boŋa gbê jûmà fihe yohnù be hì mômhè hi tè jùmà fihi a Jisòs yi yet. Ghɨna ndùku shihi jùm ghɨ hi jîsà ha yohnù be tɨnu na, “Mu jîsà ha ghàn a Jisòs yi yet we Bôl ndùku yike kum wûn na, ghàn fwu a wùt wuna wù wùn.”

¹⁴Ghɨt ghe ghɨ ndùku gbê nê gha mɨ ghɨ̂n ndùku mô mwəlà mù lɨmà sàmba a mô wana ngàŋ à ndâ Fùyèn yì ngaŋtena ghɨt a Jûs yìlè yet yi wuni mô Sefàs.

¹⁵À hì mô wu tuk wu laku ghɨna yen yen wùt lè wu kəta yohnà be hì jûmà fihe a yohnà atɨna, ghɨ jis ha ghɨna na, “Mu khəlò Jisòs, khə Bôl. Ghàn mò nâ nde ghɨ̂n agha?”

¹⁶Te ghɨ jisa ni, wùt atɨ̂n shɨŋ khɨti ghɨna na à jɨ̀m sam ghɨna nâ haŋaŋ. Ghɨna nyiŋ fwu a nda afû kə nì sah a yuma, ma ghɨ ti ləmhi ghɨna kə nâ ghɨna à jɨ̀m.

¹⁷Ghɨt a Jûs nì tumu wù jɨ̀m we wu ndùku mô a Efisùs yu gha ye yi gana, fânì kwo ghɨna, ghɨna hì kokhe yet yi Bâba Jisòs.

¹⁸Ghɨt a bimena a dona hì fwo bênà kə a ndan fôktè a gha be ghe ghɨna chehì nê shyəma ghɨna bimi.

¹⁹Ghɨt a dona ghe ghɨ ndùku gbê nê gha fintena fwu bên nì ŋwàklù se ghɨna ndùku taŋa fihe gha fintena atɨ̂n nyok sinsu a ghɨta ashyə̂. Ŋwàklù mu sîn ndùku ta wu kâ nâ haŋaŋ.

²⁰Gha Fùyènì hì ləma yênà kə yi yên, ghɨta bimî kum nì gha kanana ghe a ghɨna yena.

²¹À hì mô te gha mɨ ghɨ̂n gàna kwoka, Yohnà Yulena ni Bôl wù lem na yi nè yênàlò a bàh à yi lak afa ghɨ ndùku toŋte na Màsìdoniyà hi fê chyà yèn a Àkayà, hi yè tàn a Jèlusalèm. Wù lem na yi nè chyətelò afû ma yi chyâ yen a Lûm.

²²Wù lem yâ, tum à ghɨ̂t à bà a ghe ghɨ ndùku gâmtè wûn a mô Timotì ghê Èlastùs, na ghɨna yen a Màsìdoniyà ashyə̂. Ghɨna yên, wù fî chyəti kwok a Esiyà.

²³Ngə̂k yì chìk yìlè tî lôtì a Efisùs a mu tuk afû kum lum we Yènfù khɨŋa na ghɨ hi chyə atɨ̂n.

²⁴Wùt lè mô afû, chwe a lâm nì chani, yet yi wuni mô Dèmitɨliyùs wu chwe mosòmù Àtemìs a ndâ yi jə̀m a Fùyèn fu lefu, fêt mi yinâ ndùku fo lò ka ha ghɨt a wuna ghɨ fetana wu dô kə ni.

²⁵Dèmitɨliyùs toŋa ghɨt a wuna ghɨ fetana kəbi nì ghɨt ale ghe ghɨna ndùku chwe lâmà jis ha ghɨna na, “Wana noma, ghàn hi khə na ghàhnà kətalò ka a mwə̀ afân a ghàhnà fate wu dô kə ni.

²⁶Ghàn ti yû fî yen gha yê Bôl wunâ nè nì ngɨŋ sanisu. Wù ti nî ghɨt a dona a Efisùs nâ nì a Esiyà yì jɨ̀m na ghɨna hi bime na yèn me ghɨ fate nì wo na à wijə mù yèn.

²⁷Ngə̂k yìlè hì mô chîn na ghɨta ti yîmì hi tè jîsà kwok a yèn nì gha be kum nì fêt yi ghàhnà fê lyê wi ndâ jə̀mana yì Àtemìs na à mò a shyə ale, yèn mu fûn fê kokne wi, a mô kə fùfûn fe a ghɨta Esiyà nì ghɨta mbye à jɨ̀m kokhe.”

²⁸Ghɨt mɨ ghɨ̂n yu gha tɨni, là mù ghɨna bâŋ, ghɨna hì bwate jîsà kə na, “Àtemìs we ghàhnà kokhe a Efisùs ngaŋte chyâlàlò nâ yèn mù jɨ̀m.”

²⁹Bwatî yîn waŋ kə yi tèk yì jɨ̀m. Nôn atɨna shɨŋ yen khɨti ghɨt ale ghe ghê Bôl ndùku gbê ghê ghɨna a mô ghɨt a Màsìdoniyà lyi yen nì ghɨna wu lùk wu chintenu yi tèk. A mô Gayùs ghê Àlìstakùs.

³⁰Bôl hì khɨŋa hi yèn afû hi jìs ha ghɨta biyani ghɨt a bimena tunhî na kə wù yen.

³¹Nâ ghɨt a ta ghɨ le ghe ghɨ ndùku tihe gha a bàh a yi lak afû a mô sunsu Bôl sù chinhi kəbi tum ha wûn na kə wù chwùti kə̂k yì wuni a chìnte afû.

³²À ndùku mô ya nâbi nde yi tèk afû bwate jîsà kə yi wun gha. Ghɨt a dona hì khə wi nâ ghɨ yê hì yûŋtè bênà hi nè ghə afû agha.

³³Ghɨt ale yen na Àlèksandà kəta lò gha hi jìs beka ghɨt a Jûs hì jîsà na wù chyâ timi ashyə̂. Àlèksandà lôhì a wô hi nì na ghɨta china, yîmì hi jìs hi chwùtì na à tà ye lôhì jə̂ ghɨt a Jûs ngə̂k mi yìnâ.

³⁴Biyani te ghɨt mɨ ghɨ̂n hì yena khɨle bênà na Àlèksandà mò wùt à Jûs, fi chîntì bwat kə ha jyə̂ yì mòk na, “Àtemìs we ghàh kokhe a Efisùs ngaŋte chyâlàlò na yèn mù jɨ̀m.” Ghɨna fâŋ hì bwate yênà a mbɨŋlu sùbà.

³⁵Yi bàm atɨ̂n wùt we wù ndùku nyâkà gha fê tôknè nì tèk mi yê nî ghɨta china moŋ, ki jîs ha ghɨna na, “Ghɨt à jɨ̀m hi khə na ghàn ghɨt a Efisùs kəta hi tè tòknà nì ndâ yì jə̀mana yì Àtemìs fê tôknè nì ti ye ghàhnà kokhe yâ, ma yi tì lo a nyə̂ chem chwo a chyə̂.

³⁶Nâ wùt wù mòk wi hi tunhe gha mɨ ghɨ̂n. Mu jìsà ha ghàn na ghàn kwut təm ghana kə wùt nê shɨŋa nî gha teka wù kwakti,

³⁷beka ghàn ye ben nì ghɨt ghɨ̂n afân à bà chwûtè wi na ghɨna ti chwoŋ shyə ale a ghàhnà ndâ yi jə̀mana, jîsà wi na ghɨna ti sûlì Yènfù ghàhnà fù.

³⁸À shìki mô na Dèmitɨliyùs nì ghɨt a wuna ghɨ fetana kəta lò gha hi ngane wùt atɨ̂n, ghɨna lyi yen nì wùt atɨ̂n a lùk wu saku beka ghɨt a sakana mò afû chyâhè wi tuk wu sak wule.

³⁹Ghàn hì kəta yi ghâ hi kpenhe atɨ̂n, ghàn yen nì yini yi yûŋtì afa ghɨta tèka tihe gha atɨ̂n,

⁴⁰beka yi ki fwu na ghàhnà ti shik ngə̂k ma gha tɨni nê hi bəma nâ a be. Yi ki fwu yâ ma wùt ha ghàhnà bê tè sak a fwo sak.”

⁴¹Kə wu yu te wù jìsa mihe, jis na nâbi nde lô hì kolê.