Read Bum Fêt 2 Bible Online

Fêt 2 - Bum bible

Fêt 2

¹À ndùku mô te tuk wu chik we ghɨ ndùku toŋte na Bentikòs bèna, ghɨt a bimena yûŋtì luk wù mòk,

²kə ni shyə dum a nyə̂ ni te fufa ta, fî dum kə nâ ndâ yì jɨ̀m ye ghɨna ndùku mô atɨ̂n.

³Ghɨna fî bûŋtì yen mwə̀ mùlè mô te chwûtu wùstu, tu jyâtì yen ndokò kəbi nâ nde a tû afû.

⁴Yohnà Yulena ben lyi nâbi a nde afû, ni ghɨna yîmì hì jîsà jîs tu lak tu lôtù.

⁵À ndùku mô wu yu mefû, ghɨt a Jûs ghe a ghɨ ndùku kokhe Yènfù mô a Jèlusalèm ma ghɨna ti fwu ben a tu lak tu dô kə ni a mbyî.

⁶Ghɨna yu te shyə ghe dùma ni, ghɨta yûŋtì wu luk wù mòk, dô kə ni, gha tɨni hì fumhe ghɨna beka ghɨt a bimena ndùku jîsà, nâbi nde ywo kə jîs yi lak yi ghɨna.

⁷Jwo yim ghɨna, ghɨna jis na, “Ghɨt ghɨ̂n ghɨ jîsà afân ni lo kə nâ a yi lak yi Galìlî nâ à jɨ̀m!

⁸À gan ghə na nâbi nde hi ywo ghɨna jîsà jîs yì ghɨna yi laki?

⁹Ghàhnà mò afân, ghɨta mô ma ghɨ fwu ben a Batìyà, ghɨta ti fwu ben a Medì nì a Elàm, ghɨta ti fwu ben a Mèsòbòtemiyà nì Jùdiyà nì Kàbàdosiyà, ghɨta ti fwu ben a Bontùs nì Esiyà.

¹⁰Ghɨta ti fwu ben a Fìlijiyà nì Bàmfiliyà fî fwu a Ijìb nì tu lùk yi lak yi Libiyà ye yi bakhe yi tèk yi Sìlên, ghɨt a benana ale mô ma ghɨ fwu ben a Lûm a mô ghɨt a Jûs nì tum wule we wu mô ma wu ti kahi hì kokhe Yènfù ghɨt a Jûs.

¹¹Ghɨta fwu ben a Kɨ̀lît nì Àlabiyà. Ghàhnà ywo te ghɨna jìsà kə jîs tu lak tu ghàhnà tu, fôktè gha kanana ghe Yènfù mò ma fu ti nî.”

¹²Ghɨna hì baha mô kə ni kani, gha yin fo ngə̂k ha ghɨna kì hì bufa ha kì na, “Yina meti ni chwùtè na ghə?”

¹³Biyani ghɨt ale hì chəkte ghɨt a bimena ghɨ̂n jîsà na, “Ghɨna ti nyu lùkû mù ti kwo ghɨna.”

¹⁴Biyani Bità we wù ndùku mô ghê ghɨt a tuma Jisòs ghɨ̂n njwò yì mòk ki time a nyə̂ hì jîsà ha ghɨt a dona mu ghê a jyə̂ yì tâ na, “Ghɨt a Jûs nâ nì ghàn à jɨ̀m ghe ghàn chyə a Jèlusalèm, ghàn yuti ha mu. Mu nè fôktèlò gha ye gha mi yin chwùtè ha ghàn.

¹⁵Lùkû tà kwo jə ghɨt ghɨ̂n te ghàn kwàktè, beka chin baha mò kə mbɨŋlu bulamòk mbisìmbisi.

¹⁶Yìna mò yi gha ma à tì jis fòktì wù chìk Juwêl. Wù tì jyan na Yènfù jis na,

¹⁷‘À mò gha ye mu bè nê a mu tuk mù gòkhemù. Mu bè folò Yohnà ma nâ ha ghɨt à jɨ̀m, ma mu bê fo gha ma ha wan ghana ghɨ lɨmànà nì ghɨ ywena ma ghɨna bê hi fôktè gha ma ha ghɨta. Mu bè nêlò ma gha hi fwo a kpuŋtu yi kə̀k ni te ghɨ fwo a jem, jemsu chyə a ghɨt a lɨmànà a junana.

¹⁸Mu bè folò Yohnà ma ha ghɨt a ma ghɨ fetana ma mu fo ha lɨmànà nì ywena a tuk mù gòkhemù àtɨ̂n, ma ghɨna nê hi fôktè gha ma ha ghɨta.

¹⁹Mu bè nêlò gha kanana ghe ghɨ chwûtè jyak a ma ghe ghɨ mô a nyə̂ nì a chyə afân, ma ghɨta bê yen bàŋkàŋ nì wusu nì mbàk à fùlɨ̂k.

²⁰Ma yuchwî bê kahè hi mô te yi fîn, ma njoŋ kahà hi bâŋà te mu luŋ, shyəma tuk wu chik wu bəmanu wu Bâba we ben.

²¹Bâba bê bônhèlò nâbi nde we a wù toŋte yet yi wuni.’”

²²Bità jis ni jyan na, “Ghàn ghɨt a Isalì ghɨ̂n, ghàn yuti gha ye mu ti jîsà. Jisòs mò wut à Nasalì ma Yènfù ti chwûtì ha ghàn ha ndan na yi ti tum wûn. Fî ni ni wu lûm na Jisòs chehì nêlò fêtu bəma tu, chwûtè chwesu gha su, fê nê a gha kanana ghe ghɨ chwûtè jyak a Fùyènà a ghàn a fùtɨ̂n chyâ a Jisòs wu wùn. Ghàn khə kə nâ gha mɨ ghɨ̂n à jɨ̀m beka ghɨ chehì gânà kwoka a ghàn a fùtɨ̂n.

²³Ghɨ tì bəkli Jisòs mu wùna ha ghàn kə yi ghəl te Yènfù tì fate lema hì fê khə shyəma tuk wu tɨnu kpen. Ghàn ywi wûn, wu lum na ghàn tì fo wûn ha ghɨt a gha be ghɨ banti wûn a tô kàkfùtàfù,

²⁴biyani Yènfù nî wù lôtì a yi kpû, fî bônhì wûn a jyak a kpo beka kpu ndùku kəta wi jyak ale hi khɨte wûn te wut à ndâ chyâk.

²⁵Fə̀n Defìt tî jis gha ghɨ̂n kum Jisòs na, ‘Mu yena Bâba Yènfù a mu shyə̂ kə yu mù jɨ̀m. Beka wù mò a mu kpen wu wo ta shyə ale bu hi shìk à mu.

²⁶Kum yìna meti, təm a ma saŋlelò, mu fê kokhe wûn nì jwo mi. Nâ shyəma mu bê kpu, mu bè hì ke yênà kə nì gha ye Yènfù bè nê ha mu.

²⁷Beka wò Yènfù bè de wijə yohnà ma a yi lak yi ghɨt a kpona. Wò bè dê wijə na gun yi wùt wâ wù fètana wù jùŋ na yi kpô fwɨ.

²⁸Wò ti chwûtì lum te mu mò hi gbê atɨ̂n hi kwote chyəna. Mu kəta nâ yi saŋlî chiki beka ghàh à wò nè hì mô amok.’”

²⁹Bità fî jis na, “Wana noma, mu kəta hi jìs ha ghàn hamok kum Defìt, bè ghàhnà wù shyə̂. Wù tî kpû ghɨ gûmà. Sî wuni baha làwû afân hi bè tàn lân.

³⁰Defìt ndùku mô fòktì Fùyèn wù chìk fê khə na Yènfù tî yə kànû ghê wûn na yi bè chwokalò wùt a wun yi sah yi nda ma yi lem te fə̀n.

³¹Ni, wù tî yen mihì gha ye Yènfù ndùku kəta hi nì shyəma yu tɨnu kwok à kpen, jis toŋti wùt we à Yènfù chwoka lema na wù bê lôtè a yi kpû, jis na, ‘Yènfù tà de jə wûn a yi lak yi ghɨt a kpona, gun yi wuni tà fwɨ jə a yi sì.’

³²Ghàh à jɨ̀m tì yen na Yènfù tî nî Jisòs mu wùna na wù loti a yi kpû.

³³Yènfù ti lyi wun kokhi wun a wun a bàh à kpen wu wo ta. Jisòs ti fyî a Yohnà Yulena ghe Bè Wûn Yènfù tì chwùne suh ha ghàh chîn, à mò yi gha tɨni te ghàn yena chîn fê ywô.

³⁴Defìt nâ ha wun a ngɨŋ tà tì kwok jə a nyə̂ te Jisòs biyani jis na, ‘Bâba Yènfù jis ha Bâba mù na, Ndòko a mu bàh à kpen wu wo ta,

³⁵ma mu nê ni bànà sasu hi mô luk we wò tumte wulu wa atɨ̂n.’”

³⁶Bità fî jis na, “Ghàn ghɨt a Isalì à jɨ̀m, ghàn hi khə hamok na mu jìsà kum Jisòs wuna a we ghàn che ne ghɨ banti wun a kàkfùtàfù, biyani Yènfù fî nî na wù hi mô Bâba fê mô wut we ghɨ chwoka lema.”

³⁷Ghɨt ghɨ̂n yu gha ghe Bità jìsa, ghɨ kum a təm a ghɨna nâ haŋaŋ, ghɨna buf ha Bità nì ha ghɨt a Jisòs ghɨ tuma ale na, “Wana nì ghaha, ghàh mò hi nè ghə?”

³⁸Bità ki fîsì jis ha ghɨna na, “Nâ ghàn à jɨ̀m bɨnhi təm ghana a ghàn a sùbe, ma ghàn fyi mòlû hi chwùtì na ghàn ti bimî ha Jisòs shyəma Yènfù lehèfo gha ghana ghɨ be ma fu fo Yohnà Yulena ha ghàn.

³⁹Chwunu Fùyèn wûn bènà ha ghàn nì mwəlà mânù nì ghɨt à jɨ̀m nì ha ghɨt ghe a ghɨ mô hadà, nì ha ghɨt ghe Yènfù nè toŋa na ghɨ ben ha wûn.”

⁴⁰Bità tî fî jis gha ha ghɨna ghɨ dô kə ni fî chyati ghɨna jîsà na, “Ghàn gamti ngɨŋ sanisu kə Yènfù fo ngə̂k ha ghàn te fu kəta hi fo ha ghɨt a be ghɨ̂n a mbye chîn.”

⁴¹Kum ni ghɨta bimi jîs yi Bità mi yê dô kə ni fyi mòlû. Ghɨta kpenhi a nòn à ghɨt a bimena kwoka chema kamsu tât.

⁴²Ghɨna fî fo ngɨŋsu ghɨna su hì yute kwoka yênà nì gha ye ghɨt a tuma Jisòs yike. Ghɨna hì jyâtè nâbi ghə ghe ghɨna ndùku kəta, yə̂, kə ha shyə̀ à mòk, fê jə̂mà.

⁴³Yènfù nî ghɨt a tuma hì nê gha kanana ghɨ dô kə ni chwùtè a jyak a wuna. Ghɨt à jɨ̀m yên hì kəta yi fân.

⁴⁴Ghɨt a bimena à jɨ̀m faŋ hì chyə̂ kə yi gha yì mòk fê lyê nâbi ghə ghe ghɨna ndùku kəta jyâtè a ghɨna fùtɨ̂n.

⁴⁵Ghɨna nê ni yu lefu ghɨ bəkli mwə̀ me ghɨna kəta, ghɨ jyâtì ka tɨnu ha ghɨt a bimena ghe ghɨna ndùku kəta wi shyə ale nâ hakoh.

⁴⁶Ghɨna hì bê yûŋtè a ndâ Fùyèn kə tuk mù jɨ̀m, ghɨna hì fwo gbê yə kə ndâ nì nda, mô kə yi gha yì mòk, saŋlê.

⁴⁷Fê kokhe Fùyèn. Ghɨt à jɨ̀m hì ke ghɨna, ghɨna kokne kə ni kum chyəna jûŋ ghe ghɨna ndùku kəta. Bâba hì kpenhe ghɨt ghe wù bònhe a ghɨna nòn kə mu tuk mù jɨ̀m.