Read Bum Fêt 21 Bible Online

Fêt 21 - Bum bible

Fêt 21

¹Ghàh tì de ghɨt a Efisùs yani daŋ yen kə chilichili yen tan a yi tèk yi Kôs. Tuku yû, ghàh yen yi tèk yi Ludìs, lo afû yen a yi tèk yi Bàtalà.

²À hì mò te ghàh mò afû, ghàh yen ngwùk yi yênà yi lak yi Fònisìyà lyi atɨ̂n lô lò,

³gbî kə ni yen tan wu lùk hì ke yênà nì lak yi Sàbulùs biyani chwo yen lumu yi lak yi Siliyà, ngwùk atɨ̂n ben timi yi tèk yi Tayà wu lùk afa ghɨ ndùku mô hi fihe mwə̀lû atɨ̂n.

⁴À hì mô afû ghàh khɨŋ yen a ghɨt a bimena ale, ghàh à ghɨna chyəti kwok mu tuk sàmba, Yohnà Yulena ni na ghɨna fokti ha Bôl na yi jwôfà wi na wù fê yen a Jèlusalèm.

⁵À hì mô te ghàh chyə kpene, hì khɨŋa hi lò, ghɨna fwu nâ à jɨ̀m nì ywena ghɨna nì mwəlà, ben hi chinhe ghàh yi bi jwôlì, ghàh à ghɨna tum a lwî a chyə̂ afû jəm lò.

⁶À hì mô te ghàh à ghɨna toŋte, ghàh lye a ngwùk hi lò, ghɨna kahi hì kolê.

⁷Ghàh lo a Tayà gbî kə ni yen fwu yi tèk yi Tolemayìs jikti ghɨt a bimena afû ghàh à ghɨna chyə̂.

⁸Tuku yû ghàh lo yen a Sìsaliyà yen lye a wùt lè ndâ we wù ndùku fôktè tum à jùŋ à yi Fùyèn, yet yi wuni mô Filîb fî chyə lò. Wù ndùku mô wùt we ghɨ tì chwoka atɨ̂n à ghɨ̂t afa sàmba a Jèlusalèm.

⁹Wù ndùku kəta mwəlà mù wûn mù ywên mù kìk, à bà mô teka ghɨna lyi lɨmànà, ghɨna fôktè a ghâ ma lo ha Yènfù.

¹⁰Ghàh chyəti kwok afû a mu tuk, fòktì wùlè lo a Jùdiyà, ben a afû yet yi wuni mô a Àgabùs.

¹¹Ben fyi wu kwô Bôl kahi kwut wulu wunu nì wo wunu kə ha wun a ngɨŋ jis na, “Yohnà Yulena jìs na, à ni mò te ghɨt a Jûs ghe ghɨ mô a Jèlusalèm nè kwuta wùt we wù kəta kwô wûn afû ma fo wûn ha tumu.”

¹²À hì mô te ghàh à ghɨt ghe ghɨ ndùku mô afû ywo gha mi yîn, ghàh chyati na kə Bôl nè kwoka a Jèlusalèm.

¹³Wù fîsì kə na, “À mò njwô ghə te ghàn jyè fo ngə̂k ha təm yi mi? Mu yute na ghɨ yê kwut mu a Jèlusalèm, fê yute kə nâ hi kpû kum Bâba Jisòs.”

¹⁴Ghàh yen mihì na ghàh wi hi kwuna kwâktì wuni delò jis na, “À ne gan nâbi ghə ma yi gânà kə te Bâba khɨŋa.”

¹⁵Ghàh fî chyəte afû bakti mwə̀ mâhù lo hi yênà a Jèlusalèm.

¹⁶Ghàh à ghɨt a bimena ale tì yen afû amok ma ghɨna lo a Sìsaliyà, ghɨna lyi ghàh na ghàh yê chyə a wùt à Sàbulùs a ndâ yet yi wuni mô Nasìn, a mô wùt wù bimena nâ yu wu dâ.

¹⁷À hì mô te ghàh ye lye a Jèlusalèm, ghɨt a bimena hì saŋle afû nâ jûŋ hi fye ghàh.

¹⁸Tuku yû, ghàh à Bôl yen yen Jêms ghê chəh se su ndùku mô atɨ̂n à ghɨt a bimena afû.

¹⁹Bôl toŋti ghɨna fòktì nâ gha à jɨ̀m ghe Yènfù ne ha tumu tohna a wun yi fèt.

²⁰Ghɨna yu agha mɨ ghɨ̂n hì kokhe Fùyèn jis ha Bôl na, “Wâ nôm, ba wò ti yen te ghɨt a Jûs bime a Musìs yi sâk, a sù kam, a sù kam, gha tɨni tê hì lûmà kə ha ghɨna ni.

²¹Ghɨ ti fôktì ha ghɨna na wò yike ghɨt a Jûs ghe ghɨ chyə a tu lak tu tum tu na kə ghɨna hi lêmà sak te Musìs tì bèna nì tɨntu, fê fôktè kəbi na wò jîsà na kə ghɨna hi fate mwəlà mù ghɨna, na wò tunhe a gha ghe chyena ghɨt a Jûs khɨŋa.

²²Ghɨna ki yu chîn na wò mô afân ma ghàh ni nâ ghə?

²³Ghɨta mò afân à kìk ma ghɨ ti fah gha nì Yènfù.

²⁴Lyì ghɨna ma ghɨna lem ngɨŋsu ghɨnasu nì yulînì, ma yi hi mô a jûŋ a Yènfù ashyə̂. Ma wò lak nâbi ghə ghe ghɨna ndùku kəta hi làk shyəma ghɨ kwom tu wu ghɨna. Wò ki nî ni, nâbi nde yen hamok na nâbi yìni gha ye ghɨ jîsà kum wò à mò yi fə̂m beka nâ wò lèmà lò saki.

²⁵Ghàh ti chinhi ŋwàklù ha tum we à hì mô ghɨt a bimena na ghàh ti lem na kə wùt ha ghɨna yə shyə ma ghɨ fati fo ha mosòmù, fî jis na kə ghɨna hi la luŋû makə hi kuta nyâm teka ghɨ se, fî jis na kə wùt ha ghɨna chyə nì wùt ywên makə nì wùt lɨmà a kəta wi wûn.”

²⁶Tuku yû Bôl lyi ghɨt atɨ̂na, ghɨna yen lem ngɨŋsu ghɨnasu nì yulînì, lo yen a ndâ Fùyèn fôktì tuk me mù faŋa shyəma ngɨŋsu ghɨna su yulè mihi, fî fôktì yu we nâbi nde ha ghɨna nè fo fo wuni atɨ̂n kə te saki chwùtè.

²⁷À hì mô te tuk me sàmba hì me yênà, ghɨt a Jûs ale ma ghɨ lo yi lak yi Esiyà yen Bôl a ndâ Fùyèn nî ngə̂k lôtì atɨn à nòn afa, ghɨna khɨti Bôl,

²⁸ghɨ hì bwata jîsà na, “Ghɨt a Isalì, ghàn gamti! Wûn mò wùt we wù gbè yike gha be kum ghɨta Isalì nì sak yi Musìs kəbi nì ndâ Fùyèn yìna. Nâbi chin mò ma wù ti lyi tumu lyi nì ghɨna a ndâ Fùyèn hì bobhe tu luk, nê na kə tu hi mô nì yulînì.”

²⁹Ghɨna ndùku jîsà ni beka ghɨna ndùku mô ma ghɨna ti yen Bôl ghê wùt à Efisùs wùlè atɨ̂n yì tèk yet yi wuni mô Tìlofimùs hì kwâktè na Bôl ti lyi lyî nì wûn a ndâ Fùyèn.

³⁰Ngə̂k lôtì kə luk tù jɨ̀m, ghɨta shɨŋ yen khɨti Bôl guf fwu nì wûn baŋ jwo bɨn yi ndâ Fùyèn yi tɨni.

³¹À hì mô te nôn atɨ̂na mòmhè hi ywe Bôl ghɨta tum na ghɨ yê fòkti ha to sù sojà ghɨ chika ghɨt a Lûm, na Jèlusalèm yì jɨ̀m bame kə yi bamî.

³²Wù yu bên gha tɨni kə wu yu, lyi sojàsu nì tu wule ghɨna yen afû. Ghɨt atɨ̂na yen ben ghɨna ni, tê fè kùm a wo a Bôl wù wùn.

³³To sù sojà mu ghê yen jis na ghɨ khɨti Bôl ma fa wun nì chyak sùbà, buf ha ghɨt atɨ̂na na, “Wùt mu wunâ mò nde, ma wù ni na ghə agha?”

³⁴Ghɨt ale atɨ̂n à nòn afû hì bwate yênà ni, ghɨ le bwate yênà a fokô. Fumhènà hì mô afû nâ haŋaŋ. To sojà mu ghê hì kana na yi nè nê na ghə hi khɨle yi gha ye yi ye gana agha, ki jîs na sojàsu lyi Bôl ma kwok nì wûn a sojàsu bɨn.

³⁵Ghɨna gbî yen tan a kwuk wu ndâ à chyâk, tuti Bôl yi tutî beka nôn ghê ghɨ ndùku bênà yi bàm ndùku mô ma ghɨ ti bêf.

³⁶Bwate jîsà kə na, “Ghɨ ywi wûn!”

³⁷À hì mô te ghɨ khɨŋa hi lyi nì Bôl a sojà su bɨn wù buf ha to sù sojà ghe na, “Mu làwû hi buf yi gha ha wò agha?” Wù fîsì na, “Ba wò jìsà jîs yi Gɨlìs?

³⁸À mò kəbi wò wùt à Ijìb we wù chyə lohe ngə̂k guf a nôn à ghɨta ghɨ kwoka yênà kamsù kìk yen nì ghɨna a lak yi sùsi na ghɨna hi fwo ywite ghɨta yâ agha?”[5]

³⁹Bôl fîsì ha wun na, “Mu mò ni, mô a wut à Jûs ma ghɨ tì bwɨ mu a yi tèk yi Tasùs yi lak yi Sìlisiyà. Mu mô ni ma mu fwu nâ yi tèk yi ta. Mu chyate na wò fo mu nì lumu ma mu jis ha ghɨta.”

⁴⁰To sù sojà mu ghe fo wu lûm Bôl time wu kwuk wu nda chîtì à ghɨ̂t nì wo, jis ha ghɨna yi jìs yi Hibùlùs.