Read Bum Fêt 24 Bible Online

Fêt 24 - Bum bible

Fêt 24

¹À hì mô yi bàm yi tuk mù tân, Ànàniyàs ngàŋ à ndâ Fùyèn yì ngaŋtena lo chwo yi tèk yi Sìsaliyà ghê chəhsu lesu nì wùt lè we wù ndùku saka saksu, yet yi wuni mô Tètulùs ghɨna ben ha Felìs Gobnà yi lak afû hì fòktè ngək à ghɨna kum Bôl.

²Ghɨ toŋa Bôl fo wu lum ha Tètulùs na wù jis, wù yîmì hi tè jîsà a gha kanana kum Bôl na, “Bèbɨn wù chìk ghàh ti khɨti yutìnì nâ a wu yu dâ njwo wò saka ghàh nâ nì tofu kananu. Wò ti ni na gha jûŋà gan a ghàhnà yi lak nâ hidù.

³Ghàh saŋle ha wò nâ haŋaŋ kum gha mɨ ghɨ̂n.”

⁴Mu kôŋà wi hi chyàhè wu yu wa, chyate na wò yu gha tɨna, ghàh jîsà ha wò ki yi tum.

⁵Ghàh ti yen na wùt wunâ mò kə nâ wut wù bəmana wù be. Wù ti nôhì ghɨt a Jûs kə mbyî yì jɨ̀m, fê mô kə nâ a tû a nòn à mùnàŋà ha ghɨt a Nasalì.

⁶Ghàh che kwo wun wu khɨŋa hi bobhe a nda yâhì yì Fùyèn na yì hi mô fê kəta wijə yulînì a Yènfù ashyə̂.

⁸Wò ki bufte a gha ha wûn nâ nì ngɨŋ yâ, ma wò nê yu gha ye ghàh ye khɨte wun atɨ̂n.

⁹Ghɨt a Jûs chîntì jis kə na gha ye ghɨ ye kwo wun atɨ̂n mò kə nâ hamok.

¹⁰Gobnà àtɨ̂n fo wu lum na Bôl jis, wù lôtì jis na, “Mu kwàktè na wò ti sak lak yîn nâ wu lɨ̀m wu dô kə ni, mu saŋlê hi time a wo ashyə̂ chîn hi jìs hi gàmtè ngɨŋ à mì.”

¹¹Wò lyi ma wò yen nâ nì ngɨŋ yâ na tuk mù tà chyâ jə̂ njwòsù bà te mu kwoka a Jèlusalèm hi kokhe Fùyèn.

¹²Ghɨna tà yen jə̂ te mu gùfnà gha ghàh à wùt. Mu tà nôhì jə ghɨta a ndâ Fùyèn makə a ndasu chintesu, makə atɨ̂n à yì tèk.

¹³Ghɨna wi hi chwùtè nâ yi gha yì mòk atɨ̂n à gha afa ghɨna ye jisa kum mu chîn.

¹⁴Gha yì mòk ye mu mò hi bimi mò kə na, mu kokhe Fùyèn, jùmtè Lum te Bâba khɨŋa na ghɨ hi chyə atɨ̂n nâbi nì te ghɨna jîsà na à mò lumtu fəm tu. Yèn mu fîn a mu kokhe à mò Yèn fe be ghaha ghɨ shyə ndùku kokhe. Mu bime kə nâ gha ghe ghɨ nyaka a ŋwàklù yì sak à Musìs nâ à jɨ̀m nì ghê ghɨ nyaka a ŋwàklù sù fòktìsù chiksu.

¹⁵Mu khə hamok kəbi te ghɨna khə na Yènfù bè nêlò ma ghɨt a jûŋà nì ghɨta be bê loti a yi kpû nâ à jɨ̀m.

¹⁶À ni mò gha ye mu mòmhè nâ yu mù jɨ̀m hi tè kəta təm a Yulena a Yènfù ashyə̂, fê kəta a ghɨta ashyə̂.

¹⁷À hì mô te mu chyə wu lɨ̂m wu donu a bɨn, mu lo ben a Jèlusalèm nì ka te ghɨ tuma na mu yê fo ha ghɨt a ma, hi fè fo yi fo Fùyènì.

¹⁸Ghɨna yen mu a ndâ Fùyèn ma mu hì mô ma mu ti mihì gha mɨ ghɨ̂n, fî su ngɨŋ à mì a Yènfù ashyə̂ gha yile tê gànà jə̀ afû, nâbi nônà bu a mu ngwùŋ.

¹⁹À ndùku mô kə ghɨt a Jûs ale ma ghɨna fwu ben yi lak yi Esiyà. À mò kə hi bɨlà time a ghɨt mɨ ghɨ̂n a wo ashyə̂ hi jìs yi gha yile ye yi mô kum mu a wu yu afa gha yê hì mô

²⁰À hì bu yâ, ma ghɨt ghɨ̂n afân nê fokti gha ye a ghɨna jìsa na mu chehì jîsà lò shyəma mu hi mô a ghɨta saka ashyə̂.

²¹Gha yi mòk ye mu tì ne mò kə na à ndùku mô te mu mò a ghɨta fùtɨ̂n, mu bwat jis na, “Ghɨ saka mu lan ni kə njwo mu bime na ghɨta bè lôtè lò a yi kpo.”

²²Felìs ndùku mô wut, khə yi gha kum Lum we Bâba khɨŋa na ghɨta hi chyə atɨ̂n. À hì mô te ghɨt a Jûs jìsa gha a Bôl a tû, wù jis na kə ghɨ fi sak lô sak àtɨ̂n, fî jis na, ghɨ bè kâtà sak atɨ̂n a wu yu afa Lìsiyà to sù sojà ghɨ chika chwo bena.

²³Wù jis ni, fî chyâhì yi sâk na ghɨ fa Bôl, biyani ma ghɨ de wûn ma wù hi loble mô kə nâ a wun a ngɨŋ. Wù fî jis na kə ghɨ nè tâmtè sunsu wunsu na kə ghɨ fo mwə̀ me wù khɨŋa.

²⁴À hì mô te tuk mù chyàla mu sek ni, Felìs ben ghê Dìlusilà a ywê wûn, a mô wùt a Jûs tum na ghɨ yê toŋà ben nì Bôl. Bôl bên, ghɨna hì yute te Bôl jìsà gha te ghɨta kəta hi bimî ha Jisòs Klistù.

²⁵Bôl jis ni hì fôktè te ghɨta kəta hi tè mò chilichili, fê khɨte ngɨŋsu ghɨna su, fê fôktè na tuku bènàlò shyəma Yènfù bê sak ghɨta. Te wù jìsa gha mi yina, fânì kwo Felìs, wù jis na Bôl lo, fî jis na yi nè fê toŋalò wûn a wu yu afa yi kwote yu.

²⁶Wù hì mô wu yu mefû kwâktè na Bôl ti folò ka ha yi kum ni, wù hì motè kə ni toŋa Bôl na ghê wun biti gha.

²⁷Lɨ̂mù chya wù bà, Bòsiyùs Festùs ben lyi luk wu Gobnà Felìs, Felìs shihi lò, de Bôl a ndâ chyâk beka wù ndùku khɨŋa na ghɨt a Jûs hi kôŋà wûn.