Read Bum Fêt 25 Bible Online

Fêt 25 - Bum bible

Fêt 25

¹À ndùku mô yi bàm yi mu tuk mù tât te Festùs kwoka kpoko a Sìsaliyà te Gobnà, wù lo kwok a Jèlusalèm.

²Ngàŋsù ndâ Fùyènsu chiksu nì tu we wu ndùku tihe ghɨt a Jûs fôktì ha wûn kum Bôl. Ghɨna chyati Festùs na,

³wù tum ma ghɨ ben nì Bôl a Jèlusalèm, ghɨna ndùku jîsà ni beka ghɨna ndùku mô ma ghɨ ti bakti hi fwo ywi wun wu lûm.

⁴Wù jis ha ghɨna na, “Bôl mò ma ghɨ ti fa wun a Sìsaliyà, mu mô hi kaha yèn afû a mu tuk afân.

⁵Ghàn jis ma ghɨt ghe ghɨ tihe ghàn, jûmtè ben nì mu afû ma ghɨ fokti gha ye wù bobhe.”

⁶Festùs chyə afû te a mu tuk fama, à hì mô a mu tuk ìwûm, wù kaha chwo a Sìsaliyà. Tuku yû, wù yen a lùk wu saku, jis na ghɨ lyê ben nì Bôl.

⁷Ghɨ ben nì wûn kə wu yu, ghɨt a Jûs ghê ghɨ tì lo a Jèlusalèm ben timi kat hì wama a gha kum Bôl ghɨ dô kə ni, biyani lum wule bu hi chwùtì na ghɨ mô hamok.

⁸Bôl jîs hi gàmtè ngɨŋ à wûn na, “Mu tà khɨm jə̂ sak yi ghɨt a Jûs, mu tà bobhi jə̂ gha kum ndâ Fùyèn à ghɨna, mu tà jis jə̂ kəbi gha be kum fə̀n wù chìk.”

⁹Festùs hì khɨŋa hi nì na ghɨt a Jûs hi kôŋà wûn, ki buf ha Bôl na, “Wò kòŋàlò hi kwôk a Jèlusalèm na ghɨ yê sak wò a mu ashyə̂ kum gha ghɨ̂n ghɨ jîsà afân ni kum wò agha?”

¹⁰Bôl fîsì na, “Mu mò afân ni, mô wu lùk wu saku fə̀n wù chìk a we wù mò a Lûm, a mô kə hi sak a mu afân. Nâ wò khəlò nâ jûŋ na mu tà bobhi jə̂ gha yile ha ghɨt a Jûs.

¹¹Mu shìki mô ma mu ti khɨm saki shyəma ghɨ ywi mù, mu wi hi tunhî na kə ghɨ ywi mu, biyani ghɨna lêmà gha ghɨ̂n a mu tû a mô yi fə̂m, ma wùt nê hi kəta wi jyaka hi fo mu ha ghɨna, ma mu nê hi chyate na fə̀n wù chìk sak sak à mì.”

¹²Festùs tum a tû, ghê ghɨt ghe ghɨ tihe wûn ki jìs ha Bôl na, “Te wò chyate na sak yâ yen ha fə̀n wù chìk, yì ti yê kə ha wûn.”

¹³Te tuku chyàla mù sek ni, fə̀n Àgɨlibà ghê Bènîs ben a Sìsaliyà hi toŋte ha Festùs.

¹⁴À hì mô te ghê ghɨna mò hi chyətî hadà, Festùs fôktì kwok nì ngə̂k à Bôl ha wun jis na, “Wùt mò afân te Felìs tì fa lema a ndâ chyâk.”

¹⁵Mu chyə kwok yen a Jèlusalèm ngàŋsù ndâ Fùyènsu chiksu nì chəhsu ghɨt a Jûs hì jîsà na, mu bimi na yi kpenalò na ghɨ fo ngə̂k ha wûn.

¹⁶Mu jis ha ghɨna na, yi bone wi ha ghàh ghɨt a Lumà hi nè kə gha ha wùt, kə njwo ghɨta ngane wûn, a bu kə na wù time a ghɨt ghe ashyə ghe ghɨ ngane wûn hi fòktè sak à wûn.

¹⁷À hì mò te ghɨna chwo bena afân, tuku yû mu tê chyàhè wu yu, yen ndokò hi sak a wûn jis na ghɨ yê lyê ben nì wûn.

¹⁸Wù bên, bànàsu wun sê lôtì hì jîsà chwûtè wi gha be yile ye mu yê hì kwâktè na wù ti nî.

¹⁹Ghɨna hì bɨlà gufnà lô a gha ghê wûn kum lum we ghɨna kokhe Yènfù atɨ̂n. Fê jîsà kum nì wùt lè we wù tì kpo ghɨ toŋte na Jisòs, Bôl hì jîsà na wù mò wu tâ.

²⁰Mu ki gha tɨni yi ghak mu, mu ki bûf ha Bôl na, “Wò kòŋàlò hi yèn a Jèlusalèm na ghɨ sak sâk yâ afû agha?

²¹Biyani Bôl chyati na ghɨ lêmà kə yi a ndâ chyâk hi tàn shyəma fə̀n wù chìk sak yi, mu ki lêmà wûn na tuku ben ma chinhi wûn ha fə̀n.”

²²Àgɨlibà jis ha Festùs na, “Mu kòŋàlò hi ywo jis yì wùt wunâ nì ngɨŋ à mì.” Festùs ki jis na, “Wò bè ywo kə jîs yi wuni yi bîs.”

²³Tuku yû Àgɨlibà ghê Bènîs ben kə nâ te ghɨt a ta, lyi yen a ndâ yi chìk yê ghɨta ndùku bênà yûŋtè atɨ̂n. Wù bên nì tô sù sojà ghɨ chika nì ghɨt a chik ghe ghɨ mô a yi tèk. Festùs jis na ghɨ yê lyê ben nì Bôl, ghɨ yen lyi ben nì wûn.

²⁴Festùs ki jîs na, “Fə̀n Àgɨlibà nâ nì ghɨt à jɨ̀m ghe ghɨ a mô afân, ghàn yen wùna mò wut we ghɨt a Jûs à jɨ̀m ghe ghɨ mô a Jèlusalèm nì ghê ghɨ mô afân jîsà a gha ghɨ dô kə ni kum wûn. Ghɨna chehì bwate jîsà na, wù kəta hi kpu.

²⁵Nâ mu ti ki yen na wù tà ni jə gha ye ghɨ mô hi ywe wun atɨ̂n. Nâbi wûn chyati na yi khɨŋa hi yen a fə̀n wù chìk na wù sak yi, mu lem na mu nè chinhelò wûn ha fə̀n,

²⁶biyani mu fate khə wi gha ye mu mò hi nyàk ha fə̀n wù chìk kum wûn. À mò gha ye mu ye jisa na a ben nì wûn ha ghàn ma wù jis a wo ashyə̂ a fə̀n Àgɨlibà. À nè hì mò te ghàhnà ywo kwoka nì sak àtɨ̂n shyəma mu ki khɨle gha ye mu mò hi nyàk.

²⁷Beka mu ti yen na yi jwôfà wi na mu chinhi wùt a ndâ chyâk, fôktè mihè wi gha ye wù bobhe.”