Read Bum Fêt 28 Bible Online

Fêt 28 - Bum bible

Fêt 28

¹À hì mô te ghàh fwo mihe a jwô, baha mô kə nâ wun wu tâ, ghàh yu ha ghɨt ghe ghɨ ndùku mô afû na ghɨ toŋte lak mi ye na Maltà.

²Ghɨt atɨ̂na tî gâmtì ghàh nâ jûŋ fati wu wus ha ghàh beka à ndùku mô ya ma wuli ti yîmì hi tè nà tònènà hì mô a bɨn nâ haŋaŋ.

³Bôl yûŋtì mu kâk hì kpâ yênà nì wusu atɨ̂n, fwə fwu atɨ̂n à mu kàk afû te wusu lùmà be lɨm a wo wuna faŋ kə yi fâŋ.

⁴Ghɨta yi lak afû yen fwə atɨ̂na te ghɨ lɨma wo wuna jis na, “Wùt wunâ làhi tè mò ni ywe à ghɨ̂t. Nâbi te wù teta fwo a jwô biyani lòn mô a wuna tû, wu mô kə hi kpû.”

⁵Biyani Bôl jîkhì a wo wuna fwə atɨ̂na chem wu wùs teka ghɨ ləmhi wûn nâ hakoh.

⁶Ghɨna hì kwâktè kə na wun wu wunu ti mutàlò, bu yani ma wù fen à kpu. Ghɨ yutî nâ ha ghaf biyani te yena jə̀ gha yile te yi gana ha wûn. Ghɨna ki kwuna yi kwâktì ghɨna hì jîsà na, “Wù mò ni mô Fùyèn fu lefu!”

⁷Bì yì lak afû ndùku kətalò fùkmù a ngwùŋ à lùk afû yet yi wuni mô Bùbiyùs. Wù fyi ghàh nâ a jûŋ, yəhi ghàh a mù tuk mù tât.

⁸À mô ni, bè Bùbiyùs mô wu khɨ̀ kəta a guta, kutì fê chwoka wûn. Bôl lyi yen atɨ̂n à ndâ afa wù ti nìŋe atɨ̂n jəm lò, lem a wo a wun a tû, yaf yi tɨni mî.

⁹À hì mô te gha mi yîn gàna ni, nâ ghɨt a yablena nâ à jɨ̀m a yi lak afû fwu ben, Bôl boŋ chwuk ghɨna.

¹⁰Ghɨta yi lak afû fo mwə̀ ha ghàh mu dô kə ni. À hì mô te ghàh khɨŋa hi lò, ghɨna lem nâbi ghə a ngwùk te ghàh khɨŋa, ghàh lyi lo nì munù.

¹¹Ghàh chyə afû njoŋsù tât shihi lò lye a ngwùk ma yì tì lo a Àlèksandiliyà, ghɨ toŋte ngwùk àtɨ̂n na, “Maŋhù Mùyènù,” ben timi afû beka a ndùku mô mbɨ̀ŋ fufa ta chyâlà.

¹²Ghàh ben chyəti kwok yi tèk yi Sìlakùs a mu tuk mù tât.

¹³Lo yi tèk afû yen chyə yi tèk yi Lejùm. Tuku yû, fufa yîmì hi tè chyà, bê lumu a bàh à nchwô, ghàh gbi a mu tuk mù bà ben fwu yi tèk yi Bùtolì.

¹⁴Te ghàh lye bena afû ni yen a ghɨt a bimena afû, ghɨna jis na ghàh à ghɨna chyə. Ghàh à ghɨna chyəti kwok afû metì ngàm yì fùblù ghàh ki chyâ yèn a Lûm.

¹⁵Ma à hì mô ma ghɨt a bimena a Lûm ti yu na ghàh bènàlò lo ben hi yena ghàh wu wən a Àbiyùs, ghɨta ben timi hi yen a ghàh wu lùk afa ghɨta gbena ndùku bênà chyə, ghɨ toŋte na ndasu tât. Bôl yen ben nì ghɨta ni, fo àyòŋnà ha Yènfù khɨte təm a ta.

¹⁶À hì mô te ghàh bè tana a Lûm, ghɨ de na Bôl hi chyə̂ a wun a ngɨŋ, fî fo sojà na yì hi chînà wûn.

¹⁷Te tuk mù chya mù tât, Bôl toŋa wu tu we wu ndùku tihe ghɨt a Jûs na ghɨna bê yen wûn. Ghɨna bên, Bôl jis ha ghɨna na, “Wana noma, ghɨt a Jûs che kwo mu ni ghɨ fa mu a Jèlusalèm fî fo mu ha ghɨt a Lumà nâbi te mu chehì mô teka mu ni gha be yile ha ghɨt a ghàhnà, teka mu jîsà bobhi gha kum lum te be ghàhnà ndùku chyə atɨ̂n.

¹⁸Ghɨta sak mɨ ghɨ̂n bufti a gha ha mu hì khɨŋa hi dè mu beka ghɨna ndùku mô ma ghɨna ti yen na mu tà ni jə̂ gha shyəma ghɨ ywi mu.

¹⁹Biyani ghɨt a Jûs tunhî na kə ghɨ de mu, mu hì kəta hi bèn a Lûm na fə̀n wù chìk yu sak à mì nâbi te mu yê hì kəta wi gha yile hi jìs kum ghɨt a ma na hakoh.

²⁰À mò gha ye yi ne na mu yen ghàn, ma ghàhnà biti gha. Mu mò atɨ̂n à sù chyak ni beka mu ti bimi ha wùt we ghɨt a Isalì tì lèma kwâktì ghɨna ha wûn.”

²¹Ghɨna fîsì jis ha wun na, “Ghàh tà yen jə ŋwàklù te yì lo bena a Jùdiyà kum wò. Nâ wana ne ghaha ghe ghɨna lo bena afû tà jis jə gha be yile kum wò.

²²Biyani ghàh khɨŋa hi ywo yi kwâktì ya beka ghàh khə na nâbi afa ghɨt a Jûs jîsà lò gha be kum nki nòn ghɨ̂n a wò mò atɨ̂n ni.”

²³Ghɨna lem wu tuk hi bè yen a Bôl. Tuk wu tɨnu kpên, ghɨna fwu ben wu lùk afa wù ndùku chyə atɨ̂n nâ hidù. Wù bis yîmì hi tè jìs ha ghɨna jis kə ni yen tan wu yu kolô, fati fòktì banhi gha ye wù ndùku kəta hi fòktì ha ghɨna kum fə̂n wù Fùyènù, kəbi kum Jisòs. Wù fî taŋ a gha ghe ghɨ fwo ŋwàklù yì sak ye Musìs tì be nì yinì kəbi nì ŋwàklù su fòktìsu chiksu hi chwùtì na gha ye wù jîsà na yi mô hamok.

²⁴Ghɨt ale bimî na wù jîsà kə nâ hamok, ghɨ le tunhî na ghɨna bime wi.

²⁵Ghɨna jyâhì kə nì gùfna te Bôl jìsa gha mi yîn ha ghɨna na, Yohnà Yulena tî nî kə nâ chilichili hi tuma fòktì Ìsayà ha be ghàhnà ghɨ shyə. Wù tì jis na,

²⁶“Ndù jis ha ghɨt ghɨ̂n na ghàn bè hì ywo kəbi yi yû gha, khɨle wi na ghɨ jis na ghə agha, ke kəbi yi kî luktu biyani yena wi nâ hakoh,

²⁷beka tu ghɨt mɨ ghɨ̂n ta, ma ghɨna ti fə̂ntì tûŋlunu, fî baŋti a sê, bu ni ma ghɨna yenalò luktu fê ywo khɨle a ghâ kahi ben ha mu ma mu chwuk ghɨna.”

²⁸Bôl jis hi yè mihì jis na, “Yi ni chwùtè na ghàn kəta hi khɨli na tum yì jùŋ te Yènfù kəta hi bònhì à ghɨ̂t, ghɨ mò ma ghɨ ti tum ha tumu, ghɨna mô hi yû.”[6]

³⁰Bôl chyə kwôk afû wu lɨ̂m wù bà a lâkà kə nâ wûn ndâ à wûn. Wù hì fye nâbi nde we wù ndùku bê ha wûn nì saŋlînì.

³¹Fôktè a ghâ kum fə̂n wù Fùyènù, yike kum Bâba Jisòs Klistù. Wù ndùku jîsà nâ nì təm a ta, shyə ale tâhè wi wûn.