Read Bum Fêt 3 Bible Online

Fêt 3 - Bum bible

Fêt 3

¹À ndùku mô tuk lefu, Bità ghê Jon yen a ndâ Fùyèn a mbɨŋlu sù tât a bɨn a bonana, wu yu afa ghɨta ndùku nê ghɨ jəm atɨ̂n.

²Wùt wu kə̀blena wùlè mô afû ma ghɨ tì bwɨ wûn kə yâ. À ndùku mô ni, ghɨ bêkà wûn bê lêmà wu lùk wule we ghɨ ndùku toŋte na, “Jwo mbàn yi jûŋì.” Ghɨ ndùku bênà kə nì wûn afû a mu tuk mù jɨ̀m na wù hi lona ka afû ha ghɨt ghe ghɨ bênà a ndâ Fùyèn.

³Wùt kə̀blena wuna yen te Bità ghê Jon chyàlà hi lye a ndâ Fùyèn, wù shìki lona ka ha ghɨna.

⁴Ghɨna duŋ ki yen kə nì wun yi kə̀k, Bità ki jîs ha wun na, “Ki bî nì ghàh ni.”

⁵Wù hì ke yê kə Bità nì Jon, kwàktè na ghɨna nè folò shyə ale ha wûn.

⁶Biyani Bità jis kə ha wun na, “Mu kəta wi ka nâ hakoh hi fo ha wò, biyani mô kə hi fo shyə ghe mu kəta. Mu jîsà ha wò a Jisòs Klistù a jyak a wù Nasalì na wò loti ma wò hi gbê.”

⁷Wù jis yâ khɨti kpen wu wunu wu wo ta lôhì wûn, wù timi a nyə̂. Kə ni, fwəni wuni ta kə wu yu mefû.

⁸Wù chyâktì kwok a nyə̂ yîmì hi te gbì, yen lye a ndâ Fùyèn ghê Bità nì Jon hì chyâktè kata afû saŋlê kokhe Fùyèn.

⁹Ghɨt à jɨ̀m a ndâ Fùyèn yen te wù gbè chyâ kokhe Fùyèn,

¹⁰khɨli na à mò wut we wù chehì yisa mô kə jwô mbàn yi jûŋì lona wu ka yâ. Jwo yim ghɨna kum nì gha ye yi gana ha wùt kə̀blena wùna.

¹¹À hì mô te wùt kə̀blena wuna ta yênà kə Bità ghê Jon yi bàm, nâ ghɨt à jɨ̀m hì mô nì kani hì nyiŋa yênà wu lùk afa ghɨna ndùku mô atɨ̂n, ghɨ toŋte luk wu tɨnu na, Jem a Sòlomùn.

¹²Ni te Bità yena ghɨt ghɨ̂n ni, buf ha ghɨna nâ, “Ghɨt a Isalì, njwô ghə te ghàn mò nì kani kum wùt wuna? Ghàn dùŋà ke kə ghàh ni ha ghə? Ghàn kwàktè na à ni ghàh na wùt wuna lôtè hi gbê a ghàh a jyak a ngɨŋa ma, ma à mò beka ghàh jwòfà chyâhè a Yènfù ashyə̂?”

¹³Ghàn khəlò Yènfù be ghàhnà ghɨ shyə, a mô Ablàhâm nì Isìk nì Jakòb. À ni Fùyèn fe ghɨna ndùku kokhe gha mi yîn. Fu ni ni shyəma wùt à wûn wù fètana Jisòs, hi kəta kokhînì chiki. Ghàn tî khɨti wûn fo ha ghɨta yi saka fî mana wûn a Balèt ashyə̂. Ghàn ni gha mi yina nâbi te Balèt ndùku mô ma wù ti lem na ye nè bònhèlò Jisòs.

¹⁴Jisòs tì fo kə nâ ngɨŋ à wûn yì jɨ̀m ha Yènfù hì mô chilichili, biyani ghàn mana wûn fî bɨlì kanlô na Balèt fihi wùt we wù ndùku ywite ghɨta.

¹⁵Ghàn ti nî, na ghɨ ywi wûn we wù nè na ghɨta hi chyə̂, biyani Yènfù nî wù lôtì a yi kpû. Ghàh nì ngɨŋ sahisu tì yen gha mi yîn.

¹⁶À mò a jyak ghe ghɨ mô a Jisòs a yi yet a ghe ghɨ ne na wùt wuna ta. Wùt wuna a ghàn yena ni, fê khə, ta beka yi samhî ha Jisòs.

¹⁷“Nì chîn a wana noma, mu khə na gha ye ghàn nì ghɨt ghe ghɨ tihe ghàn tì ne ha Jisòs tì gan ni beka ghàn ndùku khə wi wùt we Jisòs ndùku mô wunù.”

¹⁸Biyani Yènfù tî nî wu tuk wu shyə na fòktì su chiksu wunsu jîs à fòkti na wùt we wù chwoka lema kəta hi yen a ngə̂k ni, yi gan kə yâ.

¹⁹Mu wu hì jîsà ha ghàn na, ghàn kahi lê təm ghana a ghàn a gha be ma ghàn kahà ben ha Yènfù ma fu tahi sò jìhè gha ghana ghɨ be ma Bâba nê fo yutìnì a ghàn a təm.

²⁰Ma wù nê tum Jisòs Klistù we ghɨ chwoka lema ha ghàn.

²¹Wù kəta hi faŋ a nyə̂, shyəma yu bè kpen, ma nâbi ghə kahè hi mô a fê, a mô yu we Yènfù tì jìsa tohne a fòktìsu chiksu wunsu ashyə̂

²²Kə te Musìs tì jìsà na, “Bâba Yèn fanifu bè chwokalò wùt a ghàn a fùtɨ̂n te fòktì wù chìk ma wù tum ha ghàn kəbi te wù tì tuma mu. Ghàn kəta hi tè yu nâbi ghə wù jìsà.

²³Ma yi bê hi mô na à ki faŋa nâbi nde hi tè yû ha fòktì wù chìk mu wuna ma ghɨ fihi wûn atɨ̂n à nòn à ghɨt a Fùyènà ma mihi nì wûn.

²⁴Nâbi fòktìsu chiksu sù jɨ̀m se Yènfù tì tuma na su bê jis, su tî jis nâ gha à jɨ̀m ghe ghɨ gana kwoka a mu tuk afân. Fòktìsu tɨnsu ndùku mô bakhe nì Samwèl nì sule se a su tì bèna a wun yi bàm.

²⁵Nâ gha mɨ ghɨ̂n à jɨ̀m a ghɨna tì jìsa ndùku bênà kə nâ ha ghàn, yi mô kəbi atɨ̂n à mu kàn me Yènfù tì yə ghê be ghàhnà ghɨ shyə. Fu tì jis ha Ablàhâm na, ‘Mu bè tohnelò a wo mwəlà ma mu bonhi ghɨt à jɨ̀m a chyə afân.’

²⁶Yènfù ki chwoka wùt wù fèt à wûn ki yità tum ha ghàn na wù bê bonhi ghàn hi nì na nâbi nde a ghàn a fùtɨ̂n de lumtu wun tu betu ma wù khɨti yutì mi yîn.”