Read Bum Fêt 4 Bible Online

Fêt 4 - Bum bible

Fêt 4

¹Bità ghê Jon hì baha jîsà kə yi jîs ha ghɨta, ngàŋsù ndâ Fùyènsu ben wu lùk afa ghɨna ndùku mô atɨ̂n nì tu ghɨt ghe ghɨ ndùku chînà ndâ Fùyèn nì ghɨt ale ghɨ toŋte na Sadùsî.

²Ghɨna bênà yâ ma ghɨna ti bâŋhì lâ beka Bità ghê Jon ndùku yike ghɨta na Jisòs ti lôtì a yi kpû, yi chwûtè na ghɨt ale bè lôtèlò a yi kpû.

³Ghɨna ben yâ khɨti Bità ghê Jon yen fa a ndâ, hì yute na tuku yu beka à ndùku mô wu yu kolô.

⁴Biyani ghɨt a dona te ghɨna ywo gha ye Bità ghê Jon yike bimilò, ghɨt ghe ghɨ tì bime ndùku kwoka tânà yênà kamsù tân.

⁵Tuku yû, tu ghɨt a Jûs nì chichàsu saksu nì chəhsu yûŋtì a Jèlusalèm

⁶nì Anàs ngàŋ à ndâ Fùyèn yì ngaŋtena nì Kàyafàs nì Jon nì Àlèksandà nì ghɨt ale ghe a ghɨ ndùku bakhe a ngàŋ à ndâ Fùyèn yì ngaŋtena,

⁷lyi bên nì Bità ghê Jon jis na ghɨna chyâ timi a ghɨta ashyə̂, ki buf ha ghɨna na, “Ghàn che lyi afa jyaka hi nì na wùt wunâ loti ma wù hi gbê? Ghàn che chwuk wûn a nde yi yet?”

⁸À ndùku mô ni ma Bità ti lûn nì Yohnà Yulena. Wù fîsì ha ghɨt ghe ghɨ ndùku tihe ghɨta nì chəh se na,

⁹“Ghàn ni bufa gha ghɨ̂n ha ghàh lan ni beka jùŋ ye ghàh ne ha wùt kə̀blena wunâ wù ti ta ma?

¹⁰Ghàn ghɨt à jɨ̀m a Isalì kəta hi tè khə na wùt wunâ wù time a ghàn ashyə̂ ni, ta njwo a jyak ghe ghɨ mô a Jisòs Klistù yi yet, wù Nasalì. A mô wun we ghàn tì bante a tô kàkfùtàfù wù kpû, biyani Yènfù nî wù lôtì a yi kpû.

¹¹Jisòs mu wunâ mò wut we a ŋwàklù Fùyèn jìsa gha ghɨ̂n kum wun na, ‘Ti ye ghàn ghɨt a bana tì tuma maka, yi ti kahi ha yi ti bûlà nda.’

¹²À mò kə wun wù nɨ̂ŋ a wù mò hi bònhì à ghɨ̂t, beka Yènfù tà fî fo jə wùt lè a mbyî yì jɨ̀m a wù mò hi bònhè ghàhnà.”

¹³Bità ndùku jîsà ni, ghɨt ghe ghɨ tì yena nki təm ghe Bità ghê Jon kəta fî yen na ghɨna ndùku mô kə chìnà à ghɨ̂t, khə wi nâbi ŋwàklù. Ghɨna hì mô nì kani, ki yen hamok na Bità ghê Jon ndùku mô a ghɨt ma ghɨna ndùku gbê kə nâ ghê Jisòs.

¹⁴Biyani hì fê kəta wi gha yile hi jìs beka wùt we ghɨ ne wù ti tâ ndùku baha mô kə Bità ngwùŋ ghê Jon.

¹⁵Ghɨna kân Bità ghê Jon nì wùt àtɨ̂n fwu yen a bɨn. Ghɨna ndokò tihi yi jîs hi yen na ghɨ mô hi gbì yàni agha,

¹⁶ghɨna hì kante na ghɨna ti nê yàni nì Bità ghê Jon agha, beka nâbi nde a Jèlusalèm ndùku mô ma ghɨna hì khəlò gha kanana ghe ghɨna ne, ma nâbi a ghɨna a chìnte afû wi hi tunhe gha ye ghɨna ne, ki jîs na,

¹⁷“Ghàhnà toŋa ghɨt atɨ̂na ma tunhi na kə ghɨna fî jis gha kum Jisòs ma ghɨta tê fè ywo jə̀ gha tɨni hidù.”

¹⁸Ghɨ kanti yâ, kaha toŋa Bità ghê Jon tunhi na, kə ghɨna fi mom hi jìs makə hi yiki yi gha kum Jisòs na hakoh.

¹⁹Bità ghê Jon fîsì ha ghɨna na, “Ghàn kwakti gha ye yi jwôfà a Yènfù ashyə̂ a ghàn a sù ngɨŋ, na ghàh yu ha Yènfù ma ghàh yu ha ghàn agha?

²⁰Ghàh wi hi faŋ hi jìs gha ye ghàh mò ma ghɨ ti yên fî yu lò.”

²¹Ghɨt atɨ̂na tè fè kwote wu lum wule hi fo ngə̂k ha Bità ghê Jon wu yu mefû beka nâ ghɨt à jɨ̀m ndùku kokhe kə Yènfù beka gha kanani ye yi gana wùt mu we ti tâ. Wùt àtɨ̂n mô yâ ma wù ti ləma chyâ lɨ̂m mkìk. Ghɨna fî tunhi kə yi tunhî gha ha Bità ghê Jon de ghɨna na ghɨna lo.

²³À hì mô kə wu yu te ghɨ de Bità ghê Jon na ghɨna lo, ghɨna kahi yen a ghɨna a yi yûŋtì fôktì kwok gha ye ngàŋsù ndâ Fùyènsu chiksu nì chəhsu jìsa.

²⁴Ghɨna yu yâ, yûŋtì à jɨ̀m jəm ha Yènfù na, “Bâba a fati wò nyə nì chyə nì jwò yì chìk nì nâbi ghə ghe ghɨ mô atɨ̂n.

²⁵Wò tî nî Yohnà gha ghɨ Yulena tihi bì wâhù wù shyə̂, a mô wùt wâ wù fètana Defìt, wù jis buf na, ‘Njwô ghə te tumu bàŋhè lâ, Njwô ghə te ghɨta ba gha kum Bâba ghɨ bu hi kpên agha?

²⁶Fə̂ntù mbyi tu bakte ngɨ̀ŋsu ghɨna su gbûtè hi nò ghɨt ghe ghɨ tihe ghɨta yi lak, gbê yûŋtè bakte kəbi hi nò Bâba Yènfù nì wùt we wù chwoka lema.’

²⁷À ni mò gha ye yi bè gânà yi tèk afân. Fə̀n Helòd ghê Bontiyùs Balèt nì ghɨt a tuma ale nì ghɨt a Isalì tî yûŋtì hì bakti hi nò Jisòs wùt wâ wù fèt wù yule we wò tì chwoka lema.

²⁸Ghɨna tì yûŋtì ni ki gha ye wò ndùku mô ma wò ti fati lem kə wò jyak na yi bè gânàlò.

²⁹Chin ni, a Bâba, kwàkti chiŋhî yê a ghɨ chiŋhe ghàh atɨ̂n ni ma wò fo kpenhi jyaka ha ghàh ghɨt gha ghɨ fetana ma ghàh hi fôktè tum yâ de wi gha yile.

³⁰Nê na ghɨta hi khə na wò kətalò jyaka fê nê na ghɨt a yablena ta. Gàmti ghàh ma ghàh hi chwûtè chwesu kanasu tohna a Jisòs yi yet wùt wâ wù fèt wù yulena.”

³¹À hì mô a yi bàm atɨ̂n te ghɨna jə̀ma mihe, luk we ghɨna ndùku mô atɨ̂n nêk, Yohnà Yulena fo a jyak nâ ha ghɨt à jɨ̀m ghe ghɨ ndùku mô afû, ghɨna yîmì hi tè fòktè tum ye Yènfù khɨŋa na ghɨna hi fôktè nì təm a ta.

³²Nâ ghɨt a bimena à jɨ̀m hì mô kə a shyə̀ à mòk, kəta kə yi kwâktì yì mòk. Wùt mòk jîsà wi na shyə ghɨ̂n kəta kə yi, nâbi nde lyê a shyə jyàtè fo wâ nè wûn.

³³Ghɨt a Jisòs ghɨ tuma hì fôktè nâ nì jyaka ha ghɨta na Jisòs ti lôtì a yi kpû. Yènfù bonhi ghɨna à jɨ̀m nâ jûŋ.

³⁴Nâ wùt ndùku wijə a ghɨna fùtɨ̂n à nòn gha a shyə ale. Ghɨt ghe ghɨ ndùku kəta fùkmù nì ndasu ndùku bəkle mwə̀ muna bê fo ka tɨnu,

³⁵ha ghɨt a tuma Jisòs, ghɨna jyâtè ha ghɨt a bimena, nâbi nde fye kə ghe ghɨ kpene ha wûn.

³⁶Wùt yi lak yi Sibulùs wùlè boŋ fwu bên nì ka te wù bəkle fûk à wuna fo ka tɨnu ha ghɨt a Jisòs ghɨ tuma na ghɨna jyati ha ghɨt a bimena. Yet yi wùt àtɨ̂n ndùku mô Josèf, ghɨ toŋte kəbi wûn na Bànabâs ma ghɨ ya jìsà na “Lùmhè a təm.” Wù ndùku mô yâ a mô wùt yi sah yi nda Lefì.