Read Bum Fêt 6 Bible Online

Fêt 6 - Bum bible

Fêt 6

¹À ndùku mô mu tuk afû, ghɨt a bimena hì dô yênà kə ashyə̂, ghe ghɨ ndùku jîsà jîs yi Gɨlìs lôhì yi njâŋ ghê ghɨt ghe ghɨ ndùku jîsà jîs yi Hibùlùs. Ghe ghɨ ndùku jîsà jîs yi Gɨlìs yâ hì njaŋâ jîsà na, ghɨ jyâtè mwə̀lû mu tuk mù jɨ̀m, fo mu ywena nkwô ghe ghɨ mô a ghɨna nòn, mu kpene wi.

²Ghɨt a tuma Jisòs ghe njwòsù bà toŋa ghɨt a bimena ghɨ̂n nâ à jɨ̀m na bê yuŋti, ki jîs ha ghɨna na, “Yi jwôfà wi na ghàh de hi tè fòktè gha Fùyènì ma ghɨ ndoko hi tè jyàtè mwə̀ mù yə̂mù.

³Wana noma ghàh jìsà ha ghàn na, ghàn chwokti ghɨta sàmba a ghàn a fùtɨ̂n, a ghe ghɨna kəta chyənà yì jùŋ, tofâ, Yohnà Yulena fê tihe ghɨna, shyəma ghàh fo fêt yin ha ghɨna.

⁴Ghàn ki nî ni ma ghàh kwoti yu wù jɨ̀m a ghàh a sù ngɨŋ hi tè jə̀m fê fôktè tum yì jùŋ.”

⁵Nâ ghɨt a bimena à jɨ̀m hì saŋlê nâ jûŋ yi gha afa ghɨt a tuma Jisòs jìsa, ki chwoka Sìtifèn, a mô wùt ma wù ti lun nì bimînì ha Yènfù, Yohnà Yulena fê tihe wûn, fî chwok Filîb nì Bokolùs, nì Nìkano, nì Timòn, nì Bàmenàs, nì Nikolàs a mô wùt à Antiyòk ma wù ti kahi hì kəta bimî ghɨt a Jûs.

⁶Ghɨna chwokti ni, lyi yen nì ghɨna ha ghɨt a tuma Jisòs, ghɨna lem wu wô a ghɨna a tû jəm ha ghɨna.

⁷Gha Fùyènì hì yama yênà kə ashyə̂ ghɨt a bimena a Jèlusalèm hì dô yê kə yi dû, ngànsu ndâ Fùyènsu yu yi yiki yîn boŋ bimilò.

⁸Sìtifèn ndùku mô wùt ma Yènfù ti bonhi wûn nâ a jûŋ, fî fo a jyak ha wûn na wù hi nê gha kanana a ghɨta fùtɨ̂n ghɨ chwûtè jyak a Fùyènà.

⁹Biyani ghɨt a ndâ chìnti yìlè ghɨ toŋte na, “Ndâ chìnti ghɨt ghe a fê bu wu kwôs,” yîmì hi te gùfnà ghê Sìtifèn. Ghɨna ndùku mô ma ghɨ fwo yi tèk yi Sìlên nì Àlèksandiliyà a bàh a yi lak yi Sìlisiyà nì lak yi Esiyà.

¹⁰Ghɨna gûfnà a gha ghê Sìtifèn yen chem a yu wule hì fê kəta wi gha hi jìs beka Sìtifèn ndùku jîsà nì tofu a fo a Yohnà Yulena,

¹¹ghɨna ki fo a shyə ha ghɨt ale na ghɨna hi kama jîsà na, “Ghàh che yû wu jîsà gha be kum Musìs nì Yènfù.”

¹²Te ghɨna jìsa ni chuhi à ghɨ̂t nì chəhsu nì chichàsu saksu, ghɨ ben kwo Sìtifèn yen nì wun ha ghɨt a saka.

¹³Te ghɨna ndùku yênà ni, lye ghɨt ale na ghɨ ye wam fəmi a Sìtifèn a tû. Ghɨna lyi ben jis na, “Wùt wunâ yè faŋa wi hi jìs yi gha be kum ndâ ghàhnà Fùyèn yì chìk kəbi nì sak ye Musìs tì yike ghàhnà.[1]

¹⁴Ghàh tê yû te wù jìsà na, Jisòs wù Nasalì wunâ nè bwuhàlò ndâ Fùyèn ma wù fê kwuna chyənà ye Musìs tì yike ha ghàhnà.”

¹⁵Nâ ghɨt à jɨ̀m ghe a ndùku mô wu lùk wu saku afân ki yen nì Sìtifèn yen kə̂k yi wuni njə̂ntè kə ni te kə̂k yi anjèl à Fùyèn.