Read Bum Fêt 7 Bible Online

Fêt 7 - Bum bible

Fêt 7

¹Ngàŋ à ndâ Fùyèn yì ngaŋtena buf ha Sìtifèn na, “Gha ghɨ̂n ghɨ jîsà kum wò mò hamok agha?”

²Sìtifèn jis na, “Bom ghɨ̂n nì wana noma ghàn yuti. Yèn fe fu kəta ban yi chiki tì bên ha bè ghàhnà wù shyə̂ Ablàhâm wu baha chyə a Mèsòbòtemiyà shyəma wù lo yê hi chyə a Halàn.”

³Jis ha wun na, ‘De lak ya, nì sah ya yi nda ma wò yen a yi lak afa mu nè chwûtè ha wò.’

⁴Ablàhâm ki dê lak yi Chyàdiyà mi yê, yen hì chyə a Halàn. Te bè wun kpo, Yènfù nî wù lo ben hì chyə a wu lùk afân ghàn chyə atɨ̂n chin ni.

⁵Yènfù tà tì fo jə̂ nâ luklà fu chyə fu ha wûn na à mò wu wun wu ngɨŋu, biyani chwûnà na yi bè folò chyə fu tɨnfu ha wûn nì ngwìk à wûn yì sah yi nda. Biyani, Yènfù tì fo chwunu wûn ha Ablàhâm wu kəta wi mwəlà.

⁶Yènfù jis ha wun na ngwìk yâ yi sah yi nda bè chyə lò yi lak yi tumi, ma ghɨ bê ni ghɨna ma ghɨna fet afû a wu kwòs, ma nyabli nì ghɨna a wu lɨ̀m yi ghə yì kìk.

⁷Biyani nâ yi Yènfù bè chəbhèlò ghɨta yi lak afû, yi bàm yi tɨ̂n, nâ ngwìk à wûn mi yê bê fwo ben ma yì hi ngumle ha yi wu lùk afân.

⁸Yènfù tî yə kànû ghê Ablàhâm jis na, ghɨ kəta hi tè bwə nâbi wùni wan a wo yi sah yi nda ghɨ fate wûn ha chwena hi chwùtì na sah ya yi nda ti bimi kàn mu muna. Ablàhâm bwə Isìk tuku chyâ sàmba, à hì mô a mu tuk fama, wù fati wûn. Isìk ben ni kəbi yâ ha wâ wûn Jakòb. Jakòb be boŋ ni kəbi yâ ha wana wuna, be ghàhnà ghɨ shyə njwòsù bà.

⁹Yu wule ben kwok kpên, be ghàhnà ghɨ shyə ghɨ̂n hì ghə̂kà wâ nè ghɨna Josèf bəkli wun na wù ye hi fêtà kwôsà a Ijìb. Biyani Yènfù hì tôknè ha wûn,

¹⁰fihi wûn a wun atɨ̂n à sù ngə̂k nâ sù jɨ̀m Josèf tî timi a fə̀n à Ijìb ashyə̂, Yènfù fo tofu kananu ha wûn, ni na fə̀n wunâ hi kòŋà wûn. Fə̀n àtɨ̂n yen ni, ni na Josèf hi kəta luk wu chiku yi lak yi Ijìb, fê tôknè nâbi nì ghə ghe ghɨ mô a wun a tôk.

¹¹Jìŋ yì tâ kwo lak yi Ijìb nì Kanà, ben nì ngəksu su dô kə ni. Be ghàhnà ghɨ shyə hì kəta wi nâ shyə hi yə̂.

¹²Jakòb yu na mwə̀ mù yə̂mù làwû a Ijìb tum a be ghàhnà ghɨ shyə na ghɨna yen afû.

¹³Ghɨna yen ni, ne fî kûmtì yenlò, Josèf chwûtì mihì ngɨŋ à wûn ha wana ne wuna, fi chwûtì ghɨna ha fə̀n à Ijìb, wù hì khə ghɨta a Josèf yi sah yi nda.

¹⁴Josèf chinhi tum ha bè wûn Jakòb na wù ben a Ijìb nì ghɨt a wuna ghɨ sah yi nda nâ à jɨ̀m. Ghɨna chîntè mô msàmba njwòsù tân.

¹⁵Jakòb yu lo yen yi lak yi Ijìb ghê ghɨt a wuna ghɨ sah yi nda. Ghɨna be kputi kə afû.

¹⁶Ghɨ be kaha bên nì gun tu ghɨna tu gûmà a Shekèm yi sì yile a Ablàhâm tì yuna ha wana Amò.

¹⁷À hì mô te yu we Yènfù tì chwùne Ablàhâm te wu kpene bênà, ma ghɨt a ghàhnà a Ijìb ti fî dû kpenhî.

¹⁸Tuk wule ben kpên ghɨ tuk wùt lè ha fə̀n à Ijìb wu khə wi Josèf.

¹⁹Fə̀n mu wunâ lehe ghɨt a ghàhnà, hì nyâblè nì be ghàhnà ghɨ shyə kan na ghɨna fihi mwəlà mù bot a ghɨna sù ndâ yê lêmà bɨn ma ghɨna tahi kputî.

²⁰À ndùku mô a mu tuk afân ni, a ghɨ tì bwə Musìs, wù hì mô njoŋ sù tât ghɨ tôknè kwoka kə nì wûn a bè wun a ndâ, wu jwôfà kə ni a Yènfù ashyə̂.

²¹À hì mô te ghɨ fihe lema Musìs a bɨn, wan tok à Ijìb wùlè lyi wûn, ha wun a wan, lyi kwok nì wûn.

²²Ghɨ yiki Musìs, wù hì kəta tof wu ghɨt a Ijìb kə yì jɨ̀m, wù ləma hì jîsà tof wu kananu, nê agha bəmana.

²³“Te Musìs ləma tana lɨ̀m mkìk, yi kwok a wun a tû na wù yê jikti ghɨt a Isalì, wana ne wuna.

²⁴Wù yen ni, yen wùt à Ijìb wu nyâblè nì wâ nè wûn wùt à Isalì. Wù yen hi gâmtì, sam ywi wùt à Ijìb mu wê.

²⁵Te wù ne ni hì kwâktè na ghɨt a wuna nè yena khɨlelò na Yènfù nè bònhè ghɨna tohne a yi wùn, biyani ghɨna tê yen a khɨlî.

²⁶Tuku yû, Musìs yen ghɨt a Isalì à bà nô, yen hi jyàhè ghɨna, ki buf ha ghɨna na, ‘Ghàn mò wana ne fê nyàblè nì ngɨŋ sanisu nì njwô ghə?’

²⁷Wùt we wù tì nyâblè nì wùt lè we chin buf ha Musìs nâ, ‘À lem nde wò na wo sak ghàh agha?

²⁸Wò khɨŋa kəbi hi ywe mu te wò che ywe wùt à Ijìb we yi yoni ma?’

²⁹Te Musìs ywo gha yîn ni, kə wu yu tet yi lak afû yen hì chyə a Midìyàn a mô lak yi tumi, ghê ywê wûn bwɨ mwəlà mù lɨmà afû mù bà.”

³⁰“Lɨ̂m mkìk chyâ, anjèl à Fùyèn ben ha wun a yi lak yi sùsi, a ngwùŋ à kùn à Sinà atɨ̂n à chwù tu wùstu a tô wù ghə̀n.

³¹Musìs yen hì mô nì kani yen hi yê yen na à gànà ghə agha, hì bakhe yênà yu jyə̀ Fùyèn yi jîsà na,

³²‘Mu mò Yèn fe bì ghana ghɨ shyə Ablàhâm nì Isìk nì Jakòb ndùku ngumle.’ Musìs yu ni fânì kwo wûn, wù tê fè mòmhì hi kî.

³³Bâba Yènfù jis ha wun na, ‘Chwokti gwusu wùsu sasu beka luk we wò time atɨ̂n ni, à mò luk wu yulenu.’”

³⁴Mu ti yen mihì nyâblì ye ghɨt a Ijìb nyàblè nì ghɨt a ma atɨ̂n. Mu ti yû jî ghɨna chwo ben hi bònhè ghɨna. “Mu te tumalò wò chîn na wò chwo yen a Ijìb!”

³⁵Sìtifèn jis ni fî jis na, “Musìs mu wùna mò wut we ghɨt a Isalì tì tunhe hì bufa ha wun na, ‘À lem nde wò na wò hi saka ghàh agha?’ À mô wûn we Yènfù tì tuma na wù nê hi saka ghɨta fê bônhè ghɨna. Yènfù tî tum anjèl à wûn na yì bê laka tum yìna ha Musìs a wu ghə̀n afa wusu ndùku bame atɨ̂n yâ.

³⁶Wù ni agha kanana fî chwûtì chwesu bəmasu a su ndùku chwûtè jyak a Fùyènà a Ijìb, lyi fwu nì ghɨt a Isalì afû. Wù tì ni kəbi gha kanana a jwô yì Bàŋana afâ, fî ni kəbi ale a lak yi sùsi a wu lɨ̀m mkìk.

³⁷Musìs wunâ mò wut mu we a wù tì jìsa ha ghɨt a Isalì na Yènfù bè chwoka tumalò wùt a ghàn à fùtɨ̂n ha fòktì wù chìk ma wù tum ha ghàn kəbi te fu tì tuma mu. À bê hì mô a wut ma ghɨ chwok kə a ghàn a yi sah yi nda.

³⁸À mò kəbi wûn a wù ndùku mô nì wana Isalì yi lak yi sùsi. Wù ndùku mô nì be ghàhnà ghɨ shyə nì anjèl à Bâba yê yi tì jìsa ha wûn a kùn à Sinà fo tu sak te tu tì faŋa hamok ha ghàhnà.

³⁹“Be ghàhnà ghɨ shyə bɨlì tunhi hi yu ha wûn chin lem wûn yi bè a ghɨna təm hì jyê hi kaha yèn a Ijìb,

⁴⁰ki jîs ha Alòn na, ‘Fati yèn mùlè ha ghàhnà, shyəma mù nê hi yênà ashyə̂. Ghàh khə wi nâ à gan ghə ha Musìs we wù tì lye fwo nì ghàhnà yi lak yi Ijìb agha?’

⁴¹Ghɨna fati fù mosò, fu kə̂kà te wâ nyàm à mbòloŋ, ghɨna hì fo tufô a tu nkì a tu nkì, saŋlê nâ jûŋ kum nì shyə mi ghê ghɨna fate nì wo yâ.

⁴²Yènfù fit jɨ̀m ha ghɨna de ghɨna na ghɨna hi ngumle njə̀n me a mù mò a nyə̂ kəta ghɨ nyàka a ŋwàklù fòktì su chiksu, kumtè ha ghɨna na, ‘Ghɨt a Isalì ba ghàn khə na, ghàn chehì sete nyamsu fo wijə te yi fô ha mu a lɨ̂m afân mkìk a ghàn chyə kwoka yi lak yi Sùsi?

⁴³Ghàn ndùku bɨlà bêkà chyâ nì ndalàfù Yènfù Molòk nì mosò fù jên, ghɨ toŋte na Lefàn yâ, a mosò me ghàn fate hì ngumle, kum ni, mu nè nê ma ghɨ jûmà fihi ghàn a yi lak afân ma ghàn yê chya nâ yi lak yi Babilòn’.

⁴⁴“Be ghàhnà ghɨ shyə tì kəta fù ndalà fu lefu, fu chwûtè na Yènfù làwû a ghɨna fùtɨ̂n yi lak yi sùsi. Ghɨ tì ba ndalà fu tɨnfu kə wu lum afa Yènfù tì chwûtì ha Musìs na wù ba.

⁴⁵À hì mô yi bàm yi tɨ̂n be ghàhnà ghɨ̂n ghê Joshwà, bêkà ndalà fu tɨnfu yen nì funfu a tu lak afa Yènfù tì jùma fihe ghɨta atɨ̂n fo ha ghɨna. Ndalà fu tɨnfu mô ma ghɨna tì fyi kəbi ha be ghàhnà. Fu hì mô afân hi chem a fə̀n Defìt wu tuk.

⁴⁶Defìt nî a ghâ Yènfù hì saŋle ha wûn nâ jûŋ. Wù chyati na Yènfù fo jyaka ma ba ndâ ha funfu a mô Yèn fe Jakòb ndùku ngumle.

⁴⁷Yènfù nî à bɨlì ba lô fə̀n Sòlomùn ndâ àtɨ̂n.

⁴⁸“Biyani, Yèn fe fu ngaŋte kpene, chyə wi a ndâ ma à ba à ghɨ̂t. Fòktì wù chìk tî jis na Yènfù jis na,

⁴⁹A nyə̂ mò kpok wu mu we mu ndòkò atɨ̂n saka mbyî, chyə mô luk we mu tomte wulu mu atɨ̂n. Ghàn mò hi ba a yìni nki ndâ ha mu agha? Mu mò hi tè chyə na afa agha?

⁵⁰Ba à tì fati mu nì mwə̀ muna nâ mù jɨ̀m!”

⁵¹Sìtifèn jis ni jis na, “Ghàn ta nì tu ni. Ghàn ti fə̂ntì tûŋlu, tahi təm ghana, ghàn mò kə te be bì ghana, ghàn ghɨ hì mô kəbi te ghɨt ghe ghɨ khə wi Yènfù. Ghàn ti faŋ hì tunhe kə yi tunhî na ghàn wi hi ywo gha ye Yohnà Yulena jìsà.

⁵²À ndùku mô nâ yini fòktì yì chìk a bì ghana ghɨ shyə tì faŋa hi fo ngə̂k ha yinì agha? Ghɨna tì ywiti ghɨt ghe ghɨ tì bèna ashyə̂ hì fòktè bên yì wùt wù chilichili wù Fùyèn, a mô wun we ghàn ti bəkle fî ywilò.

⁵³À mò ghàn ghe anjèlsù Fùyènsu tì bèna fo sak yi Fùyènì ghàn fyî biyani tê lêmà jə̀ saktu tɨntu.”

⁵⁴À hì mô te ghɨt a sakana ghe ywo kwoka nì gha ghe Sìtifèn jìsa, là mù ghɨna bâŋ nâ haŋaŋ.

⁵⁵Biyani, Yohnà Yulena tihi Sìtifèn wù ki kokhi yen a nyə̂ yen ban yi Fùyènì yi chiki, fî yen Jisòs, wù mô a Yènfù bàh à kpen wu wo ta.

⁵⁶Wù jis na, “Ghàn yen à ke! Mu ti yen te nyə jìme, fî yen Wâ Wùt, wu mô a Yènfù kpen wu wo ta.”

⁵⁷Ghɨna yu ni, bwat jî nâ a jyə̂ yì tâ fə̂ntì tûŋlu ghɨna shɨŋ yen kə ghɨna à jɨ̀m a wun wu wùn,

⁵⁸guf fwu nì wûn a yi tèk afû yîmì hi tè tumle wun nì te. À ndùku mô yâ ma ghɨt ghe ghɨ ndùku mô afû ti chwokti waf wu ghɨna lem a wan wù kpuŋ wùlè ashyə̂ yet yi wuni mô Sôl.[2]

⁵⁹Ghɨna faŋ hì tumle kə yi tumlî Sìtifèn wù hì jə̂mà jîsà na, “Bâba Jisòs lyi yohnà ma.”

⁶⁰Wù fî tum a lwe wuna a chyə̂ ji nâ a jyə̂ yì tâ jis na, “Bâba lèhifo be ghɨna yinâ.” Wù jis ni kə wu yu kpulò.