Read Bum Fêt 8 Bible Online

Fêt 8 - Bum bible

Fêt 8

¹Ghɨ ndùku nyâblè nì Sìtifèn nì Sôl mô afû tòkà jîsà kə na yi jwôfà na ghɨ ywi wûn. À ndùku mô kəbi mu tuk afû, ghɨt a bimena ghe ghɨ ndùku mô a Jèlusalèm yîmì hì yena ngə̂k yìlè, yi bəma kə ni. Ghɨ shihi fo ngə̂k ni, ghɨna tet kə nâ ghɨna à jɨ̀m yen a sù ngunsu Jùdiyà nì Sàmaliyà, à faŋ kə ghɨt a tuma Jisòs afû.

²Ghɨt ghe ghɨ ndùku ngumle Yènfù gûmà Sìtifèn ji kpu wuni nâ jûŋ.

³Biyani, Sôl yîmì hì khɨŋa ghɨt a bimena lye kə ndâ nì ndâ khɨte à lɨmà nì ywena, lêmà a ndâ chyâk.

⁴Ghɨt a bimena ghe ghɨ teta hì yênà nâbi afa, fôktè yênà kə nì tum yì jùŋ.

⁵Filîb lo yen nì lumu a tèk yi chik yile a Sàmaliyà fôktè a gha afû kum nì wùt we Yènfù chwoka lema.

⁶Nôn à ghɨ̂t ghe ghɨ ndùku mô afû yen gha kanana ghe Filîb ndùku nê fî fati yuti nâ gha à jɨ̀m ghe wù ndùku jîsà.

⁷À ndùku mô yâ ghɨt a dona afû kəta wu yohnù be. Filîb jum fihi yohnù tɨnu nâbi ghɨ̀ni hì jyê kə a jyə̂ yì tâ fwo teta kə yi têt. Ghɨt a kəblena tâ, ghɨt a ngəhana tâ.

⁸Yi ni ghɨt ghe ghɨ ndùku mô yi tèk afû hì saŋle kə yi saŋlî.

⁹À ndùku mô ni wùt à lûm wùlè mô yi tèk afû yet yi wuni mô Samùn, wu nê gha fintena, ghɨta a yi lak afû hì mô nì kani. Wù ndùku nê ni fate na yi mò nâ wùt wu bəmana.

¹⁰Ghɨta ta nâ à jɨ̀m nì ghɨt a fufana hì ywo kə ha wûn, jîsà na, “Yèn fe ghɨ toŋte na Yènfù jyak a chika fu tî bên tohna a Samùn wu wùn.”

¹¹Ghɨna hì ywo kə ha wûn beka wù ndùku nê gha fintena a ghɨna fùtɨ̂n nâ wu yu dâ.

¹²Biyani, à hì mô te ghɨna bime tum yì jùŋ ye Filîb fòkte kum fə̂n wù Fùyènù, na Jisòs mò wùt we Yènfù chwoka lema, ghɨ fo mòlû ha ghɨna, fo ha lɨmànà fo ha ywena,

¹³nâ Samùn a wuna ngɨŋ boŋ bimi tum yì jùŋ mi yê fyi mòlû faŋ kə ghê Filîb, hì boŋa mô nì kani kum nì chwena se a Filîb ndùku chwûtè nì gha kanana ghe wù ndùku nê.

¹⁴À hì mô te ghɨt a tuma Jisòs ywo a Jèlusalèm na ghɨt a Sàmaliyà ti bimi tum à Fùyèn, ghɨna tum Bità ghê Jon ha ghɨna.

¹⁵Bità ghê Jon yen jəm ha ghɨt a bimena atɨ̂na shyəma Yohnà Yulena ben ha ghɨna;

¹⁶beka Yohnà Yulena ndùku mô teka ghɨ ben ha ghɨna; ghɨna mô ma ghɨ fyi kə mòlû a Bâba Jisòs yi yet.

¹⁷Bità ghê Jon lem wu wô a ghɨna tû na Yohnà Yulena ben ha ghɨna.

¹⁸À hì mô te Samùn yena na ghɨta tuma ti lem wo a ghɨt a bimena tû, Yènfù fô a Yohnà Yulena ha ghɨna, wù hì fo wu kâ ha Bità ghê Jon jîsà na,

¹⁹“Ghàn fo kəbi jyak ghe ghàn kəta ni ha mu, shyəma mu nê hi lêmà wo nâbi a nde a tû Yohnà Yulena boŋ ben ha wûn.”

²⁰Biyani Bità fîsì jis na, “Fùshâŋ, wò nì ka wa mu we ləha, beka wò kwàktè na wò làhi yun a fo Fùyènì nì ka.

²¹Wò kəta wi nâ yi gha yile a ghàh a fùtɨ̂n à yì fèt afân, beka Yènfù yenalò təm ya khə na wò wijə chilichili.

²²Kwuna kwâktì ya yi be yê ma wò jəm ha Bâba na wù lehêfo gha ye wò ye hì kwâktè a wò yi təm,

²³beka mu ti yen na wò kəta ghə̀k yì kanana mô a kwôs ha be.”

²⁴Samùn mu we jis ha Bità ghê Jon na, “Ghàn hi jə̂mà ha Bâba kum mu, kə nâ na gha yile atɨ̂n à gha afân ghàn jìsa ni kə nè gânà ha mu.”

²⁵À hì mô te ghɨna fòkte mihe gha ghe ghɨna khə kum Bâba nì yiki wuni, Bità ghê Jon kaha kolo a Jèlusalèm, hì kolê fôktè yênà kə nì tum yì jùŋ a tu tèk tu dotu a Sàmaliyà.

²⁶Anjèl à Bâba tî jis ha Filîb na, “Lo chwo ndù lumu a bàh à nchwô a lum afa wu lo a Jèlusalèm chwo a yi tèk yi Gasà yâ.” Lumu tɨnu tohna chyâ yi lak yi sùsi.

²⁷Filîb lo hì yênà, yen wùt à Ìtobiyà wùlè, à mò nâ wùt wù tâ, tôknà nì ka wùt ywên we wù ndùku saka Ìtobiyà, ma wù kwok hi kokhe Fùyèn a Jèlusalèm,

²⁸hì kaha kole yi kolô, nyɨŋa a tô fùchyâk fu lefu a gûfà sù nyâm, taŋa kole bênà nì ŋwàklù fòktì Ìsayà kə nâ a jyə̂ yì tâ.

²⁹Yohnà Yulena jis ha Filîb na wù yê bakha a ngwùŋ à fùchyâk afâ shyəma ghê wùt àtɨ̂n hi gbê yênà amok.

³⁰Filîb nyiŋ yen bakha ha wûn, yu te wù taŋa gha a ŋwàklù fòktì Ìsayà. Filîb buf ha wun na, “A wò ywo khɨlelò gha ye wò taŋa agha?”

³¹Wùt fètana mu we fîsì na, “Mu mò hi ywo khɨle yàni, a bu kə na wùt fati fôkti lô ha mu?” Wù jis ni jis ha Filîb na wù kwok à bê ndòko a wun a tô fùchyâk shyəma ghê wûn hi gbê yênà amok.

³²Luk wu ŋwàklù we wù ndùku taŋa yani ndùku jîsà na, ‘Wù hì kəta wi nâ gha tetani yile hi jìs, kəbi te bwu njyə̀ a wu yu afa ghɨ gûfà yênà hi sê makə te wâ njyə̀ a wu yu afa ghɨ kwoma nyuŋsu wunsu.’

³³Ghɨ wumhi wûn, wùt tê fwu jə̀ hi tòk à wûn. “Wùt bè fôktè wijə gha kum mwəlà mù wûn beka wù hì mô ma wù ti kpû kəta wi wan.”

³⁴Wùt fètana wuna jis ha Filîb na, “Mu chyate wò, fòkti ha mu nâ, wù ndùku jîsà gha ghɨ̂n kum ngɨŋ à wûn ma, ma wù ndùku jîsà kum wùt lè agha?”

³⁵Filîb yîmì luk wu ŋwàklù wûn fôktì kwok nì tum yì jùŋ kum Jisòs.

³⁶Ghɨna hì gbê yênà yen tan wu lùk wule, yen fu chɨmlâ, wùt wu fètana we jis ha Filîb na, “Yen ke chɨm a mòla, a mò hi tàhè ghə chin na kə mu fi mòlû agha?”[3]

³⁸Wùt fètana àtɨ̂n jis ha wùt we wù ndùku tihe chyak fê, wù timî Filîb ghê wùt fètana àtɨ̂n chwô lyi yena a chɨ̀m afâ. Filîb fo mòlû ha wûn.

³⁹À hì mô te ghɨna fwo kwoka bena afû, Yohnà Fùyènà bûŋhì lyi lo nì Filîb. Wùt fètana mu we faŋ hi fè yen a wûn, lô hì kole yênà saŋle nâ haŋaŋ.

⁴⁰Te Yohnà Bâba lye Filîb ni, wù bûŋhì yen kə ngɨŋ à wûn a wu lùk wule ghɨ toŋte na Àsotùs gbi tohna nâ tèk tù jɨ̀m afû, fôktè yênà kə nì tum yì jùŋ, gbi kə ni ben tan a Sìsaliyà, a mô tèk yi chik ye yi ndùku mô afû.