Read Bum Gàlesiyà 1 Bible Online

Gàlesiyà 1 - Bum bible

Gàlesiyà 1

¹A nyàkà mu Bôl ŋwàklù yîn. Mu mô wut à tum teka à lem à ghɨ̂t. À tà chwok jə wùt mu. A chwok Jisòs Klistù mu ha wut wù tum ghê Yènfù, a Bì we a wù tì ne wù lôtì a yi kpû.

²Mu chinhe toŋtî yîn ghàh à wana ne ghe a ghɨ mô afân ha ghàn a nôn a ghɨt a bimena ghe a ghɨ mô yi lak yi Gàlesiyà.

³Yènfù, a Bì ghê Bâba ghàhnà Jisòs Klistù chwuti təm a jûŋà ha ghàn, ma wù fo yutìnì ha ghàn.

⁴Klistù tì fo ngɨŋ à wûn ha kpu kum besu ghàhnàsu bônhì ghàhnà a mbyî yì be afân, a mô kə yi gha ye a Yènfù, Bì ha ghàhnà ndùku khɨŋa.

⁵Kokhînì hi mô ha wûn a yû mù jɨ̀m. Àmèn.

⁶Mu mò nì kani na ghàn ti nyâŋhì kahi kə ni a yi bàm yi wùt we a wu tì toŋa ghàn kum təm a jûŋà Klistù, hì jûmtè yê nì tum yì lò.

⁷Mu jìsà wijə na yìna mò tum yì jùŋ. Mu jìsà na ghɨt ale bɨlà nê yi tof yani bu a jûŋ, mômhè hi fwəkte tum yì jùŋ yì Klistù.

⁸Biyani, nâbi wùt ha ghàh makə anjèl à Fùyèn ki fê fòktè tum, yi mô hanɨ̂ŋ atɨ̂n à ye a ghàh tì fòkte ha ghàn, Yènfù sûlì wùt àtɨ̂n.

⁹Ghàh che jis ha ghàn, mu wu hì fê jîsà kpenhe chin na, wùt ki fôktè tum yì lò ha ghàn, a bu ye a ghàn tì ywo ha ghàh, Yènfù sûlì wùt àtɨ̂n.

¹⁰Yi ni chwùtè chin na, mu nè yi gha ye a ghɨta khɨŋa ma, à ye a Yènfù khɨŋa agha? A ni mò na mu nè na ghɨta hi saŋle ma? Mu shìki khɨŋ kə hi tè nì na ghɨta hi saŋlê, ma mu hi fê bu wut wù Klistù wù fètana.

¹¹Wana noma, mu khɨŋa na ghàn hi khə na tum yì jùŋ ye a mu fòktè yì tà lo jə ha wùt.

¹²Mu tà tì yu jə tum mi yîn ha wùt, wùt tà tì yike jə mu nì gha yile. À tì chwuti Jisòs Klistù.

¹³Mu khəlò na ghàn tì yû chyənà ye a mu ndùku chyə te mu ndùku baha jûmtè chyəna ghɨt a Jûs. Ghàn khə te mu ndùku fo ngə̂k ha nôn à ghɨ̂t a bimena nâ haŋaŋ fê mômhè hi bobhe ghɨna.

¹⁴Mu ndùku khəlò hi chyə chyənà yì lak mi yîn chyâ ngwàk à mì yì dona, lêmà a tô atɨ̂n nâ haŋaŋ.

¹⁵Biyani, Yènfù tì chwok mu shyəma ghɨ bwɨ mu, toŋa mu kum təm a wuna a jûŋà na mu hi fêtà ha wûn.

¹⁶À ndùku mô te Yènfù kòŋa hi chwùtè Wâ wûn ha mu shyəma mu fokti tum yì jùŋ kum wûn ha tumu, mu tê yèn hi buf a yi gha ha wùt.

¹⁷Mu tà tì kwok jə nâ a Jèlusalèm hi buf a yi gha ha ghɨt a tuma ghe a ghɨ ndùku hì mô a mu ashyə̂. Mu bɨlì lo yen lumu a Àlabiyà, mu lo afû kaha ben kə a Dàmaskùs.

¹⁸Mu tì kwok a Jèlusalèm kə yi bàm wu lɨ̀m wu tât hi yen a Bità, ghàh à wûn chyə kwok a mu tuk njwòsù tân.

¹⁹Mu tà tì fî yen jə wùt tum wùlè afû a bu kə Jêms, a mô wâ nè Bâba.

²⁰Gha yin a mu nyàkà ha ghàn ni mò kə nâ hamok. Yènfù khəlò na mu wama wijə fəmi!

²¹Mu tì lo afû yen wu lùk wule a Siliyà nì a Sìlisiyà.

²²À ndùku mô yâ nôn a ghɨt ghe a ghɨ tì bime ha Klistù a Jùdiyà khə wijə mu.

²³Ghɨna ndùku ywo kə yi yû gha te ghɨta ndùku jîsà kum mu na, “Wùt we a wù chehì chwoka wulu ghàhnà ashyə̂ yâ ti kahi hi tè fòktè yi gha kum kəbi yi bimî ye a wù chehì khɨŋa na yi mi.”

²⁴Ghɨna hì bəmhe Yènfù kum mu.