Read Bum Gàlesiyà 2 Bible Online

Gàlesiyà 2 - Bum bible

Gàlesiyà 2

¹A hì mô yi bàm yi lɨ̀m njwòsù kìk, mu fî kaha kwok a Jèlusalèm ghàh à Bànabàs. Mu lyi kəbi Taytùs.

²Mu kwok afû beka Yènfù chwùte ha mu na mu kəta hi kwôk. À ndùku mô te mu mò afû, mu nyamte jis a yi bàm ghàh à ghɨt ghe a ghɨ ndùku tihe ndâ Fùyèn, fôktè kwoka nì tum yì jùŋ ye a mu ndùku fôktè ha tumu. Mu ndùku fôktè ni shyəma fêt ye a mu nè chîn nì ye a mu chehì nê ma yi tê ləhà jə̀ halô.

³Taytùs ndùku mô kəbi ghàh à wûn biyani ghɨ faŋ hi kàn na ghɨ kəta hi se nam a wuna nâbi te wù ndùku mô wut à Gɨlìs.

⁴Gha mi yin na ghɨ se nam a Taytùs ni ndùku fwo ma à lòhè ghɨt a bimena yi fəma ghɨ le afû, te ghɨ bena lye a ghàh a fùtɨ̂n hi yute hi yen na ghàh yə yàni jùŋ ye a ghàh kəta a Klistù Jisòs agha. Ghɨna ndùku khɨŋa kə lumu hi kahe ghàh a wu kwòs ghɨt a Jûs yi sak.

⁵Ghàh tà tì bimi jə gha yi ghɨna mi ye nâ hakoh beka ghàh ndùku khɨŋa na tum yì jùŋ faŋà kə hamok ha ghàn.

⁶Ghɨt ghe a ghɨ ndùku lyê ha ghɨt a tihena afû ndùku fê kəta wijə gha hi kpenhe a tô yi gha afa a mu yike. Makə ghɨna ndùku mô kəbi ghɨt a tihena ma ghɨna ndùku wijə, yìna chwùtè wijə gha yile ha mu beka Yènfù lyè wijə wùt wùlè hanɨ̂ŋ.

⁷Ghɨna ndùku bɨlà yena na Yènfù ti fo fêtì ha mu na mu fokti tum yì jùŋ ha tumu, kəbi yi ghəl te fu tì fo ha Bità na wù fokti ha ghɨt a Jûs.

⁸Yèn fe a fu tì ne na Bità hi mô wut à tum ha ghɨt a Jûs mò kəbi wun we wù ne na mu hi mô wut à tum ha tumu.

⁹A nê hì mô te ghɨt a tihena ghɨ tâ mu ghɨ̂n ni te Jêms ghê Bità nì Jon yena na Yènfù ti chwûtì təm a jûŋà ha mu fî ni mu hì boŋa fôktè tum yì jùŋ, ghɨna fo a wo ha ghàh à Bànabàs, hi chwûtì na ghàh à ghɨna hì mô kə a shyə̀ à mòk. Ghàh à ghɨna ki lêm na, ghàh hi fôktè tum yì jùŋ ha tumu, ghɨna fôktè ha ghɨt a Jûs.

¹⁰Ghɨna fî jis kpenhi na kə ghàh nè yità hi tè gàmtè ghɨt a fufana, a mô kə gha ye a mu kòŋà nâ haŋaŋ hi tè nì.

¹¹À ndùku mô te Bità bèna a Antiyòk, mu njaŋ ha wûn kə a ghɨta ashyə̂ kum gha ye a wù ndùku nê yi bu chilichili.

¹²À ndùku mô shyəma ghɨt ale lo ha Jêms ma ghɨ ben afû, Bità yə ghê tumu. Ghɨt atɨna bên, Bità yîmì hi kòtì a yi bàm, wù ghaŋ a gha hì fê yə wijə ghê tumu mu we beka wù ndùku fânà ghɨt mɨ ghɨ̂n a ghɨ ndùku jîsà na, ghɨ kəta hi tè se nam wu tumu we a wu tì bime.

¹³Ghɨt a Jûs ale hì boŋa nê yê kəbi te wûn, nâbi Bànabàs sina gha fəmi mi yîn.

¹⁴À hì mô te mu yena na ghɨna nè a gha ghɨ bu chilichili te tum yì jùŋ ye a yì mò hamok yike, mu jis ha Bità kə ghɨta ashyə̂ à jɨ̀m buf na, “Wò gbi yàni hi tè mò wut à Jûs, chyə̂ te wu tûm, bɨlà kânà na tumu hi chyə te ghɨt a Jûs agha?

¹⁵“Ghàhnà nâ a ghàhnà à sù ngɨŋ mò ghɨt a Jûs kə nâ a yi bwɨ̂, bu wu tûm we a ghɨ jîsà na à mò ghɨt a gha a be,

¹⁶biyani khə na ghɨ lêmà wijə kə na wùt hì mô chilichili beka wù lèmà Saki. Wùt mò chilichili kə wu yu afa wù bime ha Jisòs Klistù. Ghàhnà hì mô ma ghɨ ti boŋ bimî ha Klistù Jisòs shyəma ghàhnà hi mô chilichili a Yènfù ashyə̂ kum yi bimî yi ghàhnà ha Klistù, khə na Saki wi hi nì na wùt hi mô chilichili a Yènfù ashyə̂ kə njwo wùt àtɨ̂n lèmà Sak mi yê.

¹⁷Biyani ghàhnà shìki mômhì hi tè mò chilichili a Yènfù ashyə̂ beka ghàhnà nì Klistù mò hamok, ghɨ fê yena na ghàhnà boŋa nê be, yi hi chwûtè na Klistù tòkà be ma? Yi wijə ya nâ hakoh!

¹⁸Mu ki kahi hì bime a gha, ma mu chehì tunhelò, ma yi hi chwûtè na mu ti khɨm Saki.

¹⁹Mu chehì chyə yi dèt yi Sak biyani mu de Saki shyəma mu nè hi chyə̂ kə hi tè kokhe a Fùyèn. Ghɨ tì banti mu a kàkfùtàfù ghàh à Klistù.

²⁰Mu hi mô chîn, fê chyə wijə a mu a ngɨŋ, à hì chyə Klistù a mu fùtɨ̂n. Chyənà ye a mu chyə chîn mò beka yi bimî ye a mu kəta ha Wâ Fùyèn we a wù tì kòŋà mu fo ngɨŋ à wûn kpu kum mu.

²¹Mu wijə hi tè tunhe təm a jûŋà a Fùyènà. Wùt shìki tê mò chilichili ghê Yènfù kə njwo wù lèmà Saki, ma à hi mô na Klistù ni tì kpu kə halô.”