Read Bum Gàlesiyà 4 Bible Online

Gàlesiyà 4 - Bum bible

Gàlesiyà 4

¹Mu jìsà na, ghɨ ki lêmà walà ha yə̂ bɨn, wu baha tobtê, wù hi mô kəbi te a kwôs a bɨn afû, nâbi te mwə̀ mù tɨ̂n kəta kə nâ wûn a bɨn afû.

²Wu kəta ghɨta te ghɨ tôknè nì mwə̀ mù wûn fê tôknè nâ nì wûn hi tàn shyəma wù ləmà kpen te bè wun khɨŋa.

³Yi ni mò kəbi yi ghəl te à ndùku baha mô te ghàhnà baha mô teka ghɨ khɨli gha ghe a ghɨ mô hamok, ghàhnà fêtà te wu kwôs ha yohnù we a wu saka mbyî.

⁴Yu ben kwok kpên, Yènfù tum Wâ wûn na ghɨ bwɨ te wût, wù ləma kwôk a ghɨt a Jûs yi dèt yi Sak,

⁵shyəma wù yun tu ghɨt ghe a ghɨ ndùku mô yi dèt yi Sak afû, hi nì na ghàhnà hi mô wana ha Yènfù

⁶Te ghàn hì mô wana ha Yènfù, fu ti fo Yohnà Wâ wuna ha ghàhnà a təm, ghɨ nê ghàhnà toŋte Yènfù na, “Bàba, Bàba mù.”

⁷Yi ni chwùtè na ghàhnà fè wijə wu kwôs. Ghàhnà bɨlà mô a wan ha Yènfù, kum ni, kəta mwə̀ me a fu fo ha wana wuna.

⁸À ndùku mô ashyə̂ te ghàn ndùku baha mô teka ghɨ khɨli Yènfù, ghàn mô wu kwôs ha mwə̀ mùlè, a bu mù yèn.

⁹Biyani ghàn ghɨ hì khə Yènfù chîn, nâbi te à bɨlà lo wun hi khɨle ghàn. Yi mô hi tè fè mò yàni na ghàn kahi ma ghɨ hi fêtà kwôsà ha yohnù wu bot wuna, wu befa nyàblè mô ni agha? Njwô ghə te ghàn khɨŋa hi fè kahi ha wu kwôs ha yohnù wuna agha?

¹⁰Ghàn lèmà na tuk mùlè nì njoŋ su lesu nì ngàm su lesu kəbi nì lɨ̀m wule mò hanɨ̂ŋ.

¹¹Mu fànà na fèt yi mi ye a mu tì ne a ghàn a fùtɨ̂n ti ləha kə halô!

¹²Mu chyate ghàn a wana noma na ghàn hi mô kə te mu beka mu hì mô kəbi te ghàn. Ghàn tà ni jə be yìlè ha mu.

¹³Ghàn khə na mu tì ben hi fòktè tum yì jùŋ ha ghàn ashyə̂ ma à ni yi yaf te mu ndùku yafa.

¹⁴Yaf mi ye hì mô kəbi ha ghàn ni te yi mômhì yile biyani, ghàn tà tì nyahi jə mu, ghàn faŋ hi màkà mu. Ghàn fyi kə mu te ghàn fyi anjèl à Fùyèn. Ghàn tì fyi kə nâ mu te ghàn fyi Klistù Jisòs.

¹⁵À tì gan ghə kum saŋlî ye a ghàn ndùku kəta? Mu jìsà kə nâ hamok na, à ndùku mô na yi hi bonê ma ghàn ti chwokti se a ghana fo ha mu.

¹⁶Ba mu ti kahi hì mô bànà chîn ha ghàn kə kum mu jìsà hamok ma?

¹⁷Ghɨt mi ghe yusa lùmà a ghàn a yi ghâ, biyani kəta kə kwâktì yi be. Ghɨna khɨŋa na ghàn de mu ma ghàn hi lûmà kə a ghɨna yi ghâ.

¹⁸Yi jwôfàlò kə nâ hi tè lùm a gha a jûŋà nâbi wùni yu, a bu kə wu yu afa ghàhnà mò hamok.

¹⁹Wana noma ghɨ jûŋà, mu ywolò lûmì kum ghàn kə nâ te nè wan wu yu afa wù lima, hi tàn shyəma ghàn hi chyə chyənà ye a Klistù kəta.

²⁰Nde fo ma ghàhnà hi mô amok chîn shyəma mu khɨli lum we a mu mò hi jìs atɨ̂n ha ghàn agha? Kwâktì yi mi fo ngə̂k ha mu kum ghàn nâ haŋaŋ.

²¹Ghàn ghe a ghàn khɨŋa hi tè chyə yi dèt yi Sak, ghàn fokti lê ha mu nâ, ghàn ywo wi gha ye a Saki jìsà ma?

²²Ghɨ ti nyak a ŋwàklù Fùyèn na, Ablàhâm ndùku kəta wana lɨmànà à bà. Wùlè mô ma à bwɨ wut wù ywên, a mô a kwôs, wùlè mô ma à bwɨ wut wù ywên, a bu a kwôs.

²³Wan we a nè wûn ndùku mô a kwôs yâ mô ma ghɨ bwɨ kə nâ te ghɨ yè bwə nâbi nde biyani we a nè wûn ndùku bu a kwôs mô ma ghɨ bwɨ kum chwunu we a Yènfù tì chwùne.

²⁴Ghàhnà làhi lyè gha ghɨ̂n ma fəkna gha atɨ̂n. Ywen ghɨ̂n mò kə ni te kànû mù bà. Wù mòk lyê luk wu mu kàn me a Yènfù tì yə ghê Musìs a kun à Sinà, ma wù ti bwɨ wana, ghɨna mô hi tè mò wu kwôs. Yet yi wùt ywên wuna mô Hagà.

²⁵Hagà ni mò ni te kùn à Sinà yi lak yi Àlabiyà. Wu lyê luk wu Jèlusalèm ye a yì mò chîn njwo ghɨt a Jèlusalèm mò wu kwôs ha saki.

²⁶Biyani Jèlusalèm ye a yì mò a nyə̂ wijə a kwôs, a mô nì ha ghàhnà.

²⁷Beka ghɨ ti nyak a ŋwàklù Fùyèn na: “Wo saŋlê a wùt ywên we a wò tà timi bwɨ jə wan Wo jala a wo we a wan tà timi yaf jə wò, beka wùt ywen we a ghɨ maka bè hì kətalò wana, ghɨ dô chyâlà wana wùt ywên we a wù kəta lɨm.”

²⁸Wana noma, ghàn mò te Isìk beka ghɨ ti boŋ bwɨ kəbi ghàn kum chwunu wu Fùyènù.

²⁹À ndùku mô a wu tuk mefû, wan we a ghɨ bwə kə nâ te ghɨ yê bwə nâbi wùni wan hì chwoka wulu wan we a ghɨ tì shihi bwɨ ma à ni a Yohnà Yulena yâ. Yi ni gànà kəbi ya chîn.

³⁰Biyani ŋwàklù Fùyèn jìsà na ghə ni agha? Yì jìsà na, “Jum kwôs a wut ywên ghê nì wâ wûn, beka wâ à kwòs wuna bè yə wi shyə bè ghɨna, a bu kə wâ wùt ywên we à bu a kwôs.”

³¹Ghàn ti yen wana noma na, ghàhnà wijə wana wùt ywên we à mò kwôs yâ. Ghàhnà mò wana wùt ywên we wù wijə a kwôs.