Read Bum Gàlesiyà 5 Bible Online

Gàlesiyà 5 - Bum bible

Gàlesiyà 5

¹Klistù ti fihi ghàhnà a yi fèt yì kwòsì shyəma ghàhnà hi khɨte ngɨŋsu ghàhnà su. Ghàn fatè khɨti lê ngɨŋ sanisu, kə wùt nè fê kaha lihe ghàn a yi fèt yi kwòsì.

²Ghàn yuti! Mu Bôl jìsà ha ghàn na, kə ghàn de na ghɨ se nam wanu, ma yi hi chwûtè na Klistù tà ni jə gha ha ghàn nâ hakoh.

³Mu fè fate fôktè kə nâ yi fôktì ha ghàn na, à fi bimi nâbi nde na ghɨ se nam a wuna, ma wù hi khə na wù kəta hi tè lèmà kə Sak tù jɨ̀m.

⁴Ghàn ghe a ghàn khɨŋa hi tè mò chilichili a Yènfù ashyə̂ kə njwo ghàn lèmà Saki hi khə na, ghàn ti jyâhì ngɨŋ sanisu ghàn à Klistù. Ghàn ti tunhi hi khɨte a təm a jûŋà a Fùyènà.

⁵Yohnà Fùyènà nèlò na ghàh hi khə hamok na ghàh mò chilichili a Yènfù ashyə̂ kum yi bimî yahi.

⁶Yi mô ni beka ghàhnà shìki mô ghàhnà Klistù Jisòs, makə wùt ti se nama a wuna makə wù tà se jə̂, ma yin hi fêtà wijə gha yile. Gha yi ta ni mò kə na wùt hi chwûtè bimî yi wuni tohne a yì kòŋ.

⁷Ghàn chehì gbê kə nâ wu lum wu jûŋù. Mu khə wi nâ à che fi tahe ghə ghàn na kə ghàn khɨti gha ye a yi mô hamok agha?

⁸Kwâktì mi yîn tà che lo jə ha wun we a wù toŋa ghàn.

⁹Ngàn yìlè mò na, chɨmlana tobte nâbi yàni, ghɨ làhi gbì kə bana kwaŋa chika à jɨ̀m.

¹⁰Mu khə na te ghàhnà chìntè mô kə a shyə̀ à mòk a Bâba yì dèt, na ghàn jùmtè wi gha wûtì, a bu kə yi gha ye a mu jìsà, bime na, Yènfù nè folò ngə̂k ha wùt we a wù fumhe ghàn, makə à mò nâbi nde.

¹¹Ghɨ chehì fê chwoka kə wulu mu, a wana noma njwô ghə, a wu yu afa yi shìki mô hamok na mu yike na ghɨ kəta hi tè fate ghɨta agha? Yi shìki hì mô hamok, ma yiki ye a mu yike kum yi fêt yi Jisòs a tô kàkfùtàfù hi fê yafa wijə ghɨt a Jûs.

¹²Mu jə̀mà na ghɨt ghe a ghɨ fumhe ghàn lahà yak à yen nì ngɨŋsu ghɨna su kə hamok!

¹³Yènfù ti chwokti ghàn a wana noma na kə ghàn hi fê mô wu kwôs ha saki biyani, kə ghàn lem kə na ghàn hì mô a ghàn a sù ngɨŋ na ghàn hi kwoti nâbi ghə ghe a ghɨ foma, nê nì wun wanu. Ghàn hi bɨlà kôŋà ngɨŋ sanisu, fêtà ha wana ne ghɨ le.

¹⁴Nâ sak tù jɨ̀m chìntè bê fwo kə a yi sak yì mòk na, “Kòŋ wâ nâ, kə yi ghəl te wò kòŋà ngɨŋ yâ.”

¹⁵Biyani ma ghàn ki kahe ha nyamsu ghə̀n sù hì lumle ngɨŋ sanisu, ma ghàn hi khə na chîntì yani làhi mè mìhì.

¹⁶Mu khɨŋa hi jìs ha ghàn na, ghàn hi gbê kə te Yohnà Yulena tihe ghàn. Ghàn shìki nî ni, ma ghàn hi fê nê wi gha ghe a ghɨ foma a njyàsu wùnsu.

¹⁷Gha ghe a ghɨ foma a njyàsu wùnsu kòŋàlò na ghàhnà hi nô gha ghe a Yohnà Fùyènà khɨŋa na ghɨ hi nê, Yohnà Fùyènà boŋa nô ghe a ghɨ foma a njyàsu wùnsu na ghàhnà hi nê. Gha mɨ ghɨ̂n wijə nì sunu, fê nê na wùt hi nê wi gha ghe a wù khɨŋa hi nì.

¹⁸Biyani ma Yohnà Fùyènà shìki tihe ghàn, ma ghàn hi fê chyə̂ wi yi dèt yi Sak.

¹⁹Gha ghe a njyàsu wùnsu kòŋà hi tè nì kə̀kà kə a ndan. Hi kòŋ na ghɨta hi chyə nì ywena makə nì lɨm à ghɨ̂tà, chyə chyənà su liŋ su, chyə te sù bû,

²⁰ngumle mosòmù, fiŋa sù njwòk, bânà à ghɨ̂t, nô, kəta ghə̀k, nyâŋhì bâŋhè wu lâ, kwâktè kə kum ngɨŋsu ghɨna su, bênà nì nôhìnì nì jyàhènà,

²¹kəta se a fwona, nyo chyâhè lùkû, kòŋà hi tè yùŋtì a tu lùk tu yə tu be tu. Gha atɨna dò kə ni. Mu kɨna ha ghàn chîn kəbi te mu tì kɨna ashyə̂ na, “Ghɨt ghe a ghɨ nê gha mɨ ghɨ̂n bè khɨte wi luk wu fə̀n wù Fùyènù.”

²²Biyani Yohnà Yulena mo tam wu jûŋù nê na ghɨta hi kôŋà ghɨ le, saŋlê, kəta yi yutì, wunhê, tôknè fê nê jùŋ ha ghɨta, kəta yi bimî,

²³kəta yi ngumlî, khə hi khɨte sù ngɨŋ. Sak yile tunhe wi nâ gha yì mòk atɨ̂n à gha afân.

²⁴Ghɨta Klistù Jisòs mò ma ghɨ ti banti njyàsu wùnsu ghɨna su bakhe nì gha ghe a ghɨ foma na ghɨ hi nê a kàkfùtàfù.

²⁵Chin te ghàhnà hì chyə kum Yohnà Yulena, ghàhnà kəta hi tè gbì kə wu lum afa a ghɨ tihe ghàhnà atɨ̂n.

²⁶Kə ghàhnà hi ghaŋhe wunu, kə ghàhnà hi shikà təm a wana ne, kə ghàhnà fî ghək ngɨŋsu ghàhnàsu.