Read Bum Efisiyàns 3 Bible Online

Efisiyàns 3 - Bum bible

Efisiyàns 3

¹À mò kə kum yi chîntì ghàhnà mi yin a mu jə̀mà ha Yènfù kum ghàn. Mu mô wut à ndâ chyâk kum yi fêt ye a Klistù Jisòs fo ha mu na mu hi fôktè tum yì jùŋ ha ghàn tumu.

²Mu khə na ghàn ti yû te Yènfù chwùtè təm a jûŋà ha mu fo fêt mi yîn na mu hi nê ha ghàn.

³A mô gha yi leteni ye a Yènfù tì bakte lema, à hì khə kə wûn, chwûtì banhi ha mu, kə yi ghəl te mu hì mô ma mu ti nyak kə yi tum.

⁴Ghàn taŋ gha mɨ ghɨ̂n nâbi wùni yu, ghàn yen khɨli na mu khə a gha a letana mɨ ghe a Yènfù bakte kum Klistù.

⁵A mô a gha teka fu chwuti ha ghɨta ashyə̂ te wù chwùte chin ha tumu wunu wu yulenu nì fòktìsù tohne a wun a Yohnà Yulena.

⁶Gha yi kanani mi ye a ghɨ tì khə wi ashyə̂ mò na, tumu we wu bime tum yì jùŋ bè chîntè yə fə̂n wù Fùyènù ghê ghɨt a Isalì ma fê chintê hi mô a bâh atɨ̂n à wùn wù mòk, fê mô hi bè chìntè khɨte bôn ye a Yènfù tì chwùne tohne a Klistù Jisòs.

⁷Mu tì yìmi fêt yi tum yì jùŋ mi yîn ma à fo Fùyèn jyaka wuna ha mu na mu hi nê. À tì fo wûn jyaka na ghɨ fet a mu yi təm ma gamti shyəma mu hi nê fêt yi tɨni. Yènfù tì ni ni kum təm a wun a jûŋà.

⁸Mu mô kə nâ wut we a wù tobte gokhe atɨ̂n à ghɨt a Fùyènà, biyani ma fu ti tôknà nì mu, ni mu na mu hi jîsà ha tumu, fôktè ghak yi kanani ye a ghɨt ghe a ghɨ bime ha Klistù kəta,

⁹fê fôktè banhi lum we a fêt yi kanani yi Fùyènì mi yîn gbè atɨ̂n nâbi ha nde. A mô gha ye a Yèn fe fu fate mwə̀ mù jɨ̀m lèta ha ghɨta a yìmi hi bè tàn chîn,

¹⁰fu ni yohnù nì jyak we a wu fela chyâ a nyə̂ hi khə tof wu Fùyènù we fu chwùte kə a tu lum a tu lûm tohne a yi ləmâ yi ndâ Fùyènì,

¹¹kə yi ghəl te wù hì mô ma wù ti fati lem na yi gan tohne a Bâba ghàhnà Klistù Jisòs shyəma wù fati mbyî.

¹²Bimî ghàhnà nì chîntì ye a ghàhnà kəta nì Klistù ti nî na ghàhnà hi mô hi yèn ha Yènfù fânà wi shyə ale, khə hamok na fu nè fyelò ghàhnà.

¹³A ni gha ye a mu jìsà ha ghàn na kə ghàn bot kum ngə̂k ye a ghàn ywo na mu yenalò beka mu fòktè tûm yì jùŋ ha ghàn tumu. Ghàn kəta hi tè khə na ngə̂k àtɨ̂n nè yênà kə ha ghàn a jùŋ.

¹⁴À mò gha ye a yi ne mu na mu tum a lwe ma a Bì ashyə̂ hì jə̂mà kə yi jə̂m ha ghàn,

¹⁵à mô wûn we a wù yìme sah a sù nda ghe a ghɨ mô a nyə̂ fê mô a chyə̂ nâ à jɨ̀m.

¹⁶Yènfù kəta yi ghak nâ haŋaŋ. A ni gha ye a mu jə̀mà na fu fo jyaka a ghàn a təm tohne a wun a Yohnà,

¹⁷shyəma bimî yani ni ma Klistù hi fate chyə̂ kə nâ yi chyə̂ a ghàn a təm. Mu jə̂mà na ghàn ləma atɨ̂n à yi kòŋ ma yi hi tâ,

¹⁸shyəma ghàn hi chîntè tofa kpene a ghàn a ghɨt a Fùyènà ale, hi tè khə na kôŋì Klistù ghaka kə a lum tù jɨ̀m.

¹⁹Ma ghɨ hi khə na kôŋì wuni ti chya tofu, shyəma ghàn ghəkna ma kpene hi tè chyə̂ chyəna Fùyènà kə nâ a jûŋ.

²⁰Kokhînì yen ha Yèn fe a fu kəta jyaka hi fo mwə̀ mù domù nâ haŋaŋ, chyâ me a ghàhnà lona yi jə̀m, nì yu we ghàhnà mò kwàktè wi nâbi hi lôn. A mô yi fêt, a nê jyak a wuna ghe a ghɨ mô a ghàhnà fùtɨ̂n.

²¹Ban yi wuni mi ye faŋ à kə yi fâŋ ha ghɨt a bimena ghe a ghɨ mô a Klistù Jisòs a yû mù jɨ̀m! Àmèn.