Read Bum Efisiyàns 6 Bible Online

Efisiyàns 6 - Bum bible

Efisiyàns 6

¹Mwəlà, ghàn hi ywo ha bì ghana nì ha nì ghana beka a mò gha ye a yi mô chilichili.

²Sak yi shyə a atɨ̂n à tu sak afa a Yènfù tì fo yi kəta wu chwuna atɨ̂n mò na, “Ngumli ha bâ nì ha nâ,

³shyəma gha à jɨ̀m hi gbê kə a jûŋ ha wò, ma wò fê chyəti a chyə afân.”

⁴Be mwəlà, kə ghàn hi nê wan ghana bâŋhè lâ. Ghàn hi bɨlà lê ghɨna fê tihe ghɨna wu lum afa a Bâba khɨŋa.

⁵Ghɨt a fetana, ghàn hi ywo ha be fèt ghana, fate ngumle ghɨna kə nì təm ghana à jɨ̀m. Ghàn hi fêtà kə te ghàn fètà ha Klistù.

⁶Ghàn hi ywo ha ghɨna te ghɨt a fetana Klistù kə nâ hamok, kə yi ghəl te Yènfù khɨŋa. Kə ghàn hi ywo ha ghɨna kə wu yu afa ghɨna lèmà se a ghàn wu wùn beka ghàn khɨŋa na ghɨ hi khə na ghàn fètàlò a jûŋ.

⁷Ghàn hi fêtà ha ghɨna nì saŋlînì kə te ghàn fètà ha Bâba, a bu ha ghɨta.

⁸Ghàn khə na wùt ki nê nâbi yìni jùŋ, mô a kwôs makə wù wi a kwôs, ma Bâba bê fo maktu tɨnu ha wûn.

⁹Be fètà, ghàn hi boŋa fate khɨte ghɨt ghana ghɨ fetana. Kə ghàn hi kàntè yi kântì gha ha ghɨna. Ghàn hi khə na wùt we a wù mò bì fèt ha ghàn à jɨ̀m mò a nyə̂, lyê nâbi nde kə yi ghəl.

¹⁰Hi gòkhì, mu wu hì jîsà na ghàn yiktè kə Yènfù wù wùn, a fu fo jyaka ha ghàn beka wù kəta jyaka kanana.

¹¹Ghàn lyi mwə̀ mù wòŋ me a Yènfù fo ha ghàn nâ mù jɨ̀m shyəma ghàn khɨli hi nò mùnàŋ me a deblì bakte.

¹²Ghàn ni ni beka ghàhnà nò wi ghɨta. Ghàhnà ni bɨlà nô yohnù wu be we a wu fela chyâ a nyə̂ nì jyak we wu saka mbyî yinâ nâ yì jɨ̀m nì yèn mù mbyî.

¹³Ghàn lyi lê mwə̀ mù wòŋ mù Fùyèn nâ mù jɨ̀m shyəma tuku be bê shihi kwok a bèn ma ghàn tum à yə deblì, ma à hi mô a gòkhi, ghàn baha ta kə yi tâ.

¹⁴Ghàn kwut lê gha ye a yi mô hamok a ghàn a yi sah te wu kwô ma ghɨ baŋ ngàŋtù ghana nì chyənà chilichili ma timè hi yutê.

¹⁵Ghàn lyi tum yì jùŋ ye a yì fo yutìnì ma ghàn tuŋ a ghàn wu wù te gwusu wùsu ma ghɨ hi yutê.

¹⁶Ghàn lyê kpenhi bimî yani ma khɨti te khə̀ksù wòŋsu hi tàmtè woŋ te a deblì tumle ghàn nì ghɨna, ghɨ bame te wu wus.

¹⁷Ghàn lyi kəbi bôn ye a Yènfù bònhe ghàn ha a fot a wòŋa, ma lyi Yohnà ghe a Yènfù fo, a mô gha Fùyènì ha yi fà.

¹⁸Ghàn shihi ne gha mɨ ghɨ̂n, ghàn hi jə̂mà ha Yènfù kə a yû mù jɨ̀m, bufa nâbi ghə kə yi ghəl te Yohnà a wuna tihe ghàn. Ghàn shihi jə̀m ghàn hi jə̂mà ha ghɨt a Fùyènà nâ à jɨ̀m. Ghàn hi tôknè, kə wùt lè bè yità hi jə̀m.

¹⁹Ghàn hi jə̂mà kəbi ha mu na mu lyi gha Fùyènì hi fòktì, mu khɨli gha ye a mu mò hi jìs, na mu shihi fòktè gha a letena ghe a Yènfù tì chwùtè ha ghàhnà a tum yì jùŋ, kə mu fan shyə ale.

²⁰Mu mò ma ghɨ ti tum na mu bê hi fôktè tum yì jùŋ mi yìna nâbi te mu mò chîn a chyak. Ghàn jəm na mu hi fôktè kə te mu kəta hi tè fòktì, fânà wi shyə ale.

²¹Mu tum Tìkikùs, na wù fokti nâbi ghə ha ghàn shyəma ghàn khɨli gha ye a mu nè. Ghàh kòŋà wûn nâ a jûŋ. Wu mô kə nâ wâ nè ghàhnà wù jùŋ, fêtà ha Bâba kə nâ nì təm a wuna à jɨ̀m.

²²Mu tuma kə nâ wûn ha ghàn ni shyəma wù ben ma wù fokti gha ha ghàn kum ghàh ma wù fè lumhi ghàn a ghàn yi bimî.

²³Yèn fe à mò Bì ghê Bâba Jisòs Klistù fo yutìnì ha wana ne nì kôŋ ye yi nê na ghɨ hi yikte kə wun a wù wùn.

²⁴Yènfù nè chwûtèlò təm a jûŋà ha ghàn ghe a ghàn faŋa hi tè kòŋà kə Bâba ghàhnà Jisòs Klistù.