Read Bum Fìlibiyàns 3 Bible Online

Fìlibiyàns 3 - Bum bible

Fìlibiyàns 3

¹Hi mihì a wan a noma, ghàn hi saŋlê na ghàn à Bâba mò amok. Mu tà bot hi nyàk à kunte gha ma mu hì mô ma mu ti nyâk. Gha mɨ ghɨ̂n mô kə hi gàmtè ghàn.

²Ghàn hi tôknè kum ghɨt a be ghɨ̂n a ghɨ mô te sù bû. Ghɨna lèmà kə na ghɨ kəta hi se luk wu wùnu wûtù shyəma Yènfù hi mô hi bònhè wûn.

³A mô ghàhnà ghɨt ghe a Yènfù tì se nam a ghàhnà kə nâ wu lum afa a ghɨ kəta hi se atɨ̂n, a bu ghɨna. A mô ghàhnà a Yohnà Fùyènà gàmte na ghàhnà hi kokhe wûn, a fê mô kə ghàhnà ghɨt ghe a ghɨ jala te ghàhnà nì Klistù Jisòs mò amok, lêmà wi təm a ghàhnà a gha njyàsu wùnsu.

⁴Nâ mu làhi lèmà kəbi təm a ma a gha njyàsu wùnsu afân. À shìki kwâktì nâbi nde na yi kəta hi tè tòkà chyənà mi yîn, ma mu jis na mu làhi tòk hi chyà nâ wûn.

⁵Ghɨ tì bwɨ mu, à hì mô a mu tuk fama, ghɨ se nam a ma. Mu mô wut à Isalì ma mu fwo yi sah yi nda Benjamìn. Mu mô wut à Hibùlùs kə nâ yi bwɨ̂. Mu ndùku mô a nòn à ghɨt a Falàsî, lêmà kə nâ sak te a Musìs tì fo hanɨ̂ŋ.

⁶Mu hì lumà nì wunu nâ haŋaŋ, chɨma wulu ghɨt a bimena. Wò shìki kwâktè kə nâ te wùt kəta hi tè mô chilichili, lêmà sak ye a ghɨ fo ha wûn, ma mu jis na mu ndùku kəta wi njahi.

⁷Mu ndùku lyê nâ gha mɨ ghɨ̂n à jɨ̀m na à mô mbì, biyani hì lyê kə chin na à mô a lə̀hà kum fêt yi Klistù.

⁸Mu yena chin na gha mɨ ghɨ̂n kəta wi fêtì nâ hakoh beka gha yi ta ha mu hì mô kə hi tè khə Bâba Klistù Jisòs. Nâbi ghə hì mô kə ha mu chin te wu ghât. Mu ti de nâbi ghə beka mu kòŋà na ghàh à Klistù hi mô amok.

⁹Mu khɨŋa na ghàh à wûn hi chîntè mô kə ha shyə̀ à mòk, mu mô chilichili a Yènfù ashyə̂, a bu kum jyak a ma a ngɨŋa. Mu fè lêmà wi Saki hi tê mô chilichili, mu hì mô wut à chilichili chin kum yi bimî mi ha Klistù. A ni lum we a Yènfù lyè ghàhnà atɨ̂n ha ghɨt a chilichili.

¹⁰Mu khɨŋa hi tè khə Klistù, hi yen a jyak ghe a Yènfù tì fo ha Jisòs ghɨ nî wù lôtì a yi kpû shyəma mu boŋa yen ngə̂k kum fêt yi wuni ma mu kpu kəbi te wûn,

¹¹ma Yènfù ni, ma mu boŋà kahà lòti a yi kpû.

¹²Mu jìsà wi na gha mi yin hì mô ma yi ti kpên ha mu, jîsà wi na mu ti time mihì. Mu mòmhè kə hi tè khə Klistù Jisòs fê mô te wûn beka à mò gha ye a wù tì chwoka mu atɨ̂n na mu hi mô wut à wûn.

¹³Wan a noma, mu lèmà wi na mu hì mô ma mu ti khɨli shyə ghe a mu khɨŋa. Gha ni mò kə yì mòk na, mu fè lêmà wi to a yi gha ma yi ti chyâ, mu fètà yênà kə ashyə̂.

¹⁴Mu nyiŋa yê kə ashyə̂ hi kwote maktu we a Yènfù nè toŋa mu hi fô. Maktu wuna mô na, Yènfù tì toŋa mu tohne a Klistù Jisòs fo chyənà ye a yì bè mê wi ha mu.

¹⁵Mu wu hì jîsà na, mu khə na ghàhnà à jɨ̀m ghe a ghɨ ti ghəknâ a ghàhnà yi bimî kəta kəbi kwâktì mi yîn. Biyani, ghàn ghɨ le shìki kəta kwâktì yilô, ma Yènfù ni, ma ghàn ywo khɨli gha mɨ ghɨ̂n wu lum afa ghɨ kəta hi tè mô atɨ̂n.

¹⁶Ghàhnà ni kəta kə hi tè nè kə gha ye a Yènfù tì chwùte na ghàhnà hi nê.

¹⁷Wana noma, ghàn hi sine kə chyənà mì. Ghàn hi gbê kə te ghɨt ghe a ghɨ jûmtè lumtu jûŋ te a ghàh tì chwùtè na ghàn hi gbê atɨ̂n.

¹⁸Ghɨt a dona chyə̂ wu lum wule yi chwùtè na ghɨna bànàlò gha ye a Klistù tì kpo a kàkfùtàfù kum yini. Mu hì mô ma mu ti jis gha ha ghàn kum ghɨt a be mɨ ghɨ̂n kə ghan hidù, mu wu hì fê jîsà yîn chin nâ nì semù a mu sê.

¹⁹Yènfù nè bobhelò ghɨna beka ghɨna ngumle kə mwə̀ me a mù foma a ghɨna wu wùn. Ghɨna ni bɨlà saŋle kə gha afa a ghɨna kəta hi tè wume atɨ̂n. Ghɨna lêmà kə kwâktì tu ghɨna tu à mwə̀ mù chyə̂.

²⁰Biyani, a mô ha ghàhnà, ghàhnà khə na lak yi ghàhnà mò a nyə̂, ghàhnà yute Bònhè à ghàhnà Bâba Jisòs Klistù na wù kahè ben ma wù lyi ghàhnà.

²¹Wu bênà ma wù kwuna wun wu ghàhnà wunâ a wu mô hi kpu ni, ma wu kahè hi mô kəbi te wun wu wunu wu njentenu. Wu bênà hi nè gha mɨ ghɨ̂n nì jyak ghe a wù kəta ghɨ mô hi nì na mwə̀ mù jɨ̀m hi mô kə a wun a sah yì sâk.