Read Bum Fìlibiyàns 4 Bible Online

Fìlibiyàns 4 - Bum bible

Fìlibiyàns 4

¹Mu wu hì jîsà ha ghàn a wana noma ghɨ jûŋà na, mu kòŋàlò ghàn nâ a jûŋ fê kôŋà hi yen a ghàn. Ghàn nè mu saŋle kə ni. Ghàn mô ha mu ni te maktu wu fèt tù. Mu jala ha ghɨta kum ghàn, mu jîsà a wana noma na, ghàn faŋ à hi ta kə yi tâ a ghàn fùtɨ̂n à yì bimî, chyə chyənà ye a Bâba khɨŋa.

²Yùwodìyà, mu chyate na ghàn à Sìntekì maka gùfna yanì yê beka ghàn mò wana nê fùtɨ̂n à yi bimî afa a ghàn kəta ha Bâba.

³Mu jìsà ha wò we a ghàh à wò fètà, wo fate fêtà kə nâ hamok na, wò gamti ywên ghɨna a bə. Ghɨna mò ni ma ghàh à ghɨna chehì fôktè tum yì jùŋ amok bakhe nì Kɨ̀limèn nì ghɨt ale, yet a ghɨt atɨ̂na mô a ŋwàklù yì bòn.

⁴Ghàn hi saŋlê na ghàn à Bâba mò amok. Mu jîsà fê kumte kə yi kûmtì na ghàn hi saŋlê.

⁵Ghàn ni ma nâbi nde yen na ghàn bonelò. Yu wu hì bakhe bênà shyəma Bâba kahè ben.

⁶Kə ghàn fî kwakti gha yile. Ghàn hi bɨlà jə̂mà kə yi jə̂m, lona nâbi ghə ha Yènfù te ghàn khɨŋa. Ghàn shihi lôn, ghàn hi fo àyòŋnà.

⁷Ghàn shìki nî ni, ma Yènfù ywi təm ghana nì kwâktì yani wu lum wule wùt bu hi khɨlî beka ghàn à Klistù Jisòs mò amok.

⁸Gha yi gokheni a wana noma mò na, ghàn hi lêmà kwâktì yani nâbi a ghə ghe a ghɨ mô hamok fê lêmà nâbi a ghə ghe a ghɨ kokne nì ghe ghɨ mô chilichili nì ghe a ghɨ yule. Ghàn hi kwâktè gha ye be yìlè bu atɨ̂n. Gha mɨ ghɨ̂n ni mò ghe ghɨ jwôfà kpene fê mô shyəma ghɨta hi bəmhê.

⁹Ghàn hi nê gha ghe a ghàn yike ha mu fê nê ghê a ghàn chehì ywo te mu jìsà nì ghe a ghàn chehì yena te mu nè. Ghàn shìki nî ni, ma Yèn fe a fu nê na ghàhnà hi chyə nì yutìnì hi mô ghàn à ghɨna.

¹⁰Mu saŋlê kə ni fê fo àyòŋnà ha Bâba kum te ghàn ti fî chwûtì ha mu chîn na ghàn kəta kə nâ kwâktì yi jûŋì ha mu nâbi te lumu dàfà ni. Mu khə na ghàn chehì chyə, kəta kə nâ kwâktìnì ha mu biyani, lumu bu hi chwùtì.

¹¹Mu jìsà wi gha mi yîn chin ni te mu gha a shyə ale. Mu ti yiki hi tè chyə, ke wi shyə ale ha wùt.

¹²Mu ti yikî hì khə hi tè chyə nâbi wu yu afa mu kəta wi shyə ale, fî yiki hi khə hi chyə nâbi wu yu afa mu kəta mwə̀lû mu fê dô ghaknê. Mu yiki a gha mɨ ghɨ̂n shyəma à hi mô nâbi afa, nâbi wùni yu, mu mô kə a jûŋ, makə mu kətalò shyə ale hi yə̂, makə mu kəta wi, makə mu kəta, mu dô, makə mu kəta mu tobtê.

¹³Nâ gha yile wi hi bè ta ghak a mu beka jyak ghe a Klistù fo ha mu.

¹⁴Biyani, yi chehì jwôfàlò te ghàn chehì gâmtè mu a mu atɨ̂n à ngə̂k.

¹⁵Nâ ghàn ghɨt a Fìlibây hi khə na, mu tì fôktì tum yì jùŋ ha ghàn ha shyə̂ lo a Màsìdoniyà hì fôktè yênà a tu lùk tu letu, a hì mô kə ghàn ghɨt a shyə hi fo yi gâmtì ha mu. Ndâ Fùyèn yìlè tà tì fî gâmtì jə mu. À mò kə ghàn ghe a ghàhnà tì tumne mwə̀lû.

¹⁶À hì mô kəbi te mu mò a Tèsàlonikà, ghàn hì chinhe yi gâmtì ha mu kə mu yu, a mu yu.

¹⁷Mu jìsà wi ni na mu fè khɨŋa na ghàn fo shyə ale ha mu. Mu bɨlà khɨŋa kə na ghɨ kpenhi maktu wanu.

¹⁸Mu jìsà ha ghàn chin na, mu hì kəta nâbi ghə te mu khɨŋa, kəta chyâ. Èbàfàlòditùs tì bên nâbi nì ghə ghe a ghàn tì fo na wù bê fo ha mu, mu fè gha wi shyə ale. Mwə̀ munâ mò yi fô ha Yènfù, lɨ̂mtè foma kə ni. Fu ti fyî hì saŋle kə ni.

¹⁹Yèn famfu kəta kə mwə̀ mù jɨ̀m. Fu nè folò nâbi ghə ghe a ghàn boŋa khɨŋa tohne yi gha afa a Klistù Jisòs tì ne ha ghàhnà.

²⁰Ghàhnà hi fo kokhînì ha Yènfù, Bì ha ghàhnà a yû mù jɨ̀m. Àmèn.

²¹Ghàn toŋti ha ghɨt ghe a ghɨ bime ha Klistù Jisòs afa nâ à jɨ̀m. Wana ne ghàhnà ghe a ghàh à ghɨna mò afân amok jis na, mu toŋti ha ghàn.

²²Ghɨt a bimena ale ghe a ghɨ mô afân jis na mu boŋà toŋti ha ghàn nâ à jûŋ, ghê a ghɨ fêtà a fə̀n wù chìk a tôk jis na mu toŋti ha ghàn nâ hanɨ̂ŋ.

²³Bâba Jisòs Klistù chwuti təm a wuna ghɨ jûŋà ha ghàn.