Read Bum 2 Timotì 3 Bible Online

2 Timotì 3 - Bum bible

2 Timotì 3

¹Mu khɨŋa kəbi na wò hi khə na, à bè hì mô a mu tuk mù gòkhemù, ma ngəksu hi mô nâ hidù.

²Ghɨta bè hi tôknè kə nì ngɨŋsu ghɨnasu, kôŋà wu kâ nâ à jûŋ, ghaŋhe wu wun, lyi wi na wùt lè mò shyə ale. Ghɨna bè hi sûlè à ghɨ̂t, fê tâ nì tu ha be ghɨna nì ne ghɨna. Ghɨna bè hi fo wi yòŋnà ha wùt kum nâ gha yi tetani yile te wùt ne ha ghɨna, fânà wi Yènfù.

³Ghɨna bè hì kəta wi kwohi seni ha wùt, lehèfo wi ghɨta, jîsà gha a be kum ghɨta, khɨte wi ngɨŋsu ghɨnasu, chyə̂ kə te sù nyâm, kôŋà wi hi tè yen a yi gha yi jûŋì.

⁴Ghɨna bê hi bəkle ghɨta nì jîs yi ghɨna, shɨŋa nê kə yi nî gha teka ghɨ kwakti, chaha à ghɨ̂t. Ghɨna bè hì kôŋà wi Yènfù, bɨlà kôŋà kə mwə̀ me a mù nè na ghɨna hi ywo jùŋ.

⁵Ghɨna bè hì funa yi funâ ghɨt ghe ghɨ kokhe Yènfù, biyani ywo wi ha Yènfù nâ hakoh. Kə wò hi kəta gha yile hi nì ghàn à nki yi ghɨt mɨ ghɨ̂n.

⁶Ghɨ le mò a ghɨna fùtɨ̂n, gbê fìklè lye a ghɨta sù ndâ, lehe à ywên ghe a ghɨ kəta təm a bota, mô ma ghɨna ti ni chyâhì gha be gha tɨna fo ngə̂k ha ghɨna. Ghɨna wu hì chyə kə ghɨna tɨ̂n à sù səm.

⁷Ywên mɨ ghɨ̂n yusa mòmhè kə hi tè khə gha yi fe, biyani teka ghɨna timè khɨli kum yikî ye a yi mô hamok.

⁸Ghɨt mɨ ghɨ̂n nò yikî ye a yi mô hamok kəbi te Janìs ghê Jambès tì be hì nô yikî yi Musìs. Ghɨna kəta kwâktù betu, fê kpene wi yi gha yile atɨ̂n à yì bimî.

⁹Ghɨna nè yênà wijə ha ghaf beka a tuk wule ghɨta bè yena mihèlò na ghɨna mô wù ngwò. À ni mò kəbi te sah yi Janìs ghe Jambès tì bana a ndan.

¹⁰Timotì, wò hì mô kə nâ chîn ma wò ti jûmtì kwôk nì yikî mi nì chyəna ma, nì gha ye a mu chehì kwâktè hi bè nì. Wò ti yen lum we a mu samhe ha Klistù atɨ̂n, kəta təm a yutena, kôŋà ghɨta, khə hi kwut a təm.

¹¹Wò tì yên te ghɨ chehì chɨma wulu mu nì ngəksu nì gha ghe ghɨ tì gàna ha mu a yi tèk yi Antiyòk. Wò khə kəbi ghe a ghɨ ndùku ngane mu a yi tèk yi Ìkonìyùm nì Lìsɨtɨlà, mu kwut kə a təm kum ngəksu tɨnsu, biyani Bâba fihe mu a sù ngə̂k afû nâ sù jɨ̀m.

¹²Mu jìsà hamok na, à shìki kôŋà nâbi nde hi tè chyə chyəna Fùyènà, jûmtè Klistù Jisòs, ma ghɨta hi chɨma wulu wunu.

¹³Ghɨta be nì ghɨt ghe a ghɨ chwûtè na ghɨ mò a shyə bu, bè hì befa yê kə ashyə̂, jɨ̂ŋhè à ghɨ̂t, ghɨt ale boŋa jɨ̂ŋhè kəbi ghɨna.

¹⁴Biyani Timotì, bimi kə hamok ye a ghɨ tì yike wò nì yini. Nâ wò khəlò chichà se a su tì yike wò nì gha mi yîn.

¹⁵Wo kwâktè kəbi te ghɨ ndùku yike wò nì gha ma ghɨ fwo a ŋwàklù Fùyèn kə nâ wo baha mô walà. Gha mɨ ghɨ̂n mò hi fo tofu ha wò shyəma wò bimi ha Klistù Jisòs ma wù bonhi wò.[1]

¹⁶Nâbi yìni gha te ghɨ nyàka a ŋwàklù Fùyèn mò ma à fo Fùyèn na ghɨ nyak, jwôfà kpenê na ghɨ hi yike ghɨta atɨ̂n, fôktè njahi ghɨ̂tì atɨ̂n, tihe à ghɨ̂t atɨ̂n, chwûtè ha ghɨt atɨ̂na shyəma ghɨ hi chyə chyəna chilichili.

¹⁷Gha mɨ ghɨ̂n ni mò hi nì na wùt wù fètana wù Fùyèn hi kpene mihè hi tê nì nâ nki tu fèt tu jûŋ tù jɨ̀m.