Read Bum 2 Timotì 4 Bible Online

2 Timotì 4 - Bum bible

2 Timotì 4

¹Klistù Jisòs bê bênà te fə̀n ma wù sak ghɨt à jɨ̀m, ghe a ghɨ baha chyə nì ghe a ghɨ tì kpute. Kum ni, mu wu hì jîsà ha wò nâ nì jyaka, a Yènfù ashyə̂ nì Klistù Jisòs na,

²wò hi fôktè tum yì jùŋ ha ghɨta. Wo fôktè kə yi fôktì makə ghɨta kòŋàlò hi yû, makə ghɨ kôŋà wi. Wo chwûtè banhe gha ye a ghɨta nè bobhe, jîsà na kə ghɨna fi ni, chyate na ghɨna hi ywo gha mɨ ghɨ̂n. Wò shihi yike ghɨna, wò hi fate yike nì təm a yutena.

³Mu jìsà ni beka yu wu hì bakhe bênà, ghɨta nè hi yute wi yikî ye a yi mô hamok, biyani khɨŋa hi ywo gha ghe a ghɨna kôŋà, ghɨ hi gbê lyê bê nì chichà se a su nè bê yike gha mɨ ghɨ̂n ha ghɨna.

⁴Ghɨna ti de gha ye a yi mô hamok hì bɨlà yute màgân mù yîm.

⁵Ha wò, wò kəta hi khɨte ngɨŋ yâ, hi kwut a təm hi bèkà ngə̂k yâ hi tè fòktè yèn nì tum yì jùŋ fê nê fêt ya yì jɨ̀m te wut à Fùyèn wù fètana.

⁶Ha mu, mu hì mô ma mu hì fo yênà nì ngɨŋ à mì ha Yènfù te a yi fô. Yu mu kponu ti bakhâ.

⁷Mu ti nô kwok kə nâ a jûŋ. Mu ti nyiŋ tan te ghɨ khɨŋa, fî fati khɨti bimî mi.

⁸Mu hì yute kə maktu mu chyənà chilichili chîn. A Bâba ghàhnà we a wù saka ghɨta kə chilichili bè fo maktu mi wûn ha mu wu tuk wu gokhenu. Wù bè fo wi kə ha mu, wù bè folò kəbi ha ghɨt ghe a ghɨ chehì yute bên yi wuni yi chiki nì kôŋì.

⁹Mòmhi nâ nì jyaka hi nyàŋhè bèn hi yen a mu,

¹⁰beka Demàs ti kôŋ mwə̀ mù mbyî, tet de mu, yen a Tèsàlonikà. Kɨ̀lisèns ti boŋ lô yen a Gàlesiyà, Taytùs ti yen a Dàlàmàtiyà.

¹¹À faŋ kə Lûk afân ghàh à wûn. Wò shihi bèn wo ben ghàn à Mâk shyəma wù nê hi gâmtè mu nì fêtì.

¹²Mu ti tum Tichikùs a Efisùs.

¹³Wò shihi bèn, wo ben nì nju samsu wafa sê a mu tì de a Kabùs nda a Tɨ̀luwàs yâ. Nâ kəbi nì ŋwàklù sam se a ghɨ lima yi lîm yâ, nâbi nì se a ghɨ fate nì gwusu nyâmsù yâ.

¹⁴Àlèksandà we wù twe mwə̀lû yâ che mom gha ha mu, yi bəma kə ni. Bâba nè folò ngə̂k ha wûn kum gha mi yê.

¹⁵Nâ wò a wo ngɨŋ boŋa kəta hi tè tòknà kum wûn beka wù chehì jîsà gha nâ ha jyak, ghɨ jwôfà wi kum tum yì jùŋ ye a ghàhnà yike.

¹⁶À hì mô te mu timi wu lùk wu saku hi jìs hi gàmtè ngɨŋ à mì a wu tuk wu shyə, ghɨta tet kə yi têt, nâ wùt tê fwo bèn hi tòk à mu. Mu jə̂mà na Yènfù lehèfo ghɨna te ghɨna che tet a de mu.

¹⁷Bâba tî time hi tòk à mu shyəma mu khɨti jyaka hi fòktè mihì tum yì jùŋ ha tumu wù jɨ̀m. Wù fî bônhì mu a yi kpû.

¹⁸Mu khəlò na Bâba nè fihelò mu nâ a sù ngə̂k sù jɨ̀m, ma wù fê lyi mu na mu fate gbi kə ni hi lye wu lùk wu wunu fə̀nù a nyə̂. Ghɨta hi kokhe wûn a yû mù jɨ̀m. Àmèn.

¹⁹Toŋti ha Bìsilà nì Àkwɨlà nì ghɨt a Ònesfolùs ndâ ha mu.

²⁰Èlastùs tì faŋ a yi tèk yi Kolèn. Mu che shihi lò, de Tìlofimùs a yi tèk yi Mìlitùs, wu yafâ.

²¹Mòmhi nâ nì jyaka hi bèn teka bɨ̀ŋ chwu. Yùbulùs nì Budèns nì Lanùs nì Kɨ̀lodiyàs nâ nì ghɨt a bimena à jɨ̀m jis na mu toŋti ha wò.

²²Bâba nè gàmtèlò wò. Yènfù nè chwùtè lò təm a jûŋà ghe ha ghàn à jɨ̀m.