Read Bum 2 Jon 1 Bible Online

2 Jon 1 - Bum bible

2 Jon 1

¹À nyak mu chəh à ndâ Fùyèn, ha wùt ywen we a Yènfù chwoka wûn ghê wana wuna ghe a mu kòŋà hamok. À kòŋà wi kə mu, nâ ghɨt à jɨ̀m ghe a ghɨ khə gha ye a yi mô hamok boŋa kôŋàlò ghɨna.

²Mu kòŋà ghàn beka hamok ye a yì mò a ghàhnà fùtɨ̂n, mô hi faŋ hi tè mò kə yi mô.

³Bâba Yènfù ghê Jisòs Klistù, Wan ghê Bì chwuti təm a jûŋà nì kwohi seni nì yutìnì nì kôŋì hamok ha ghàhnà.

⁴Mu saŋlê nâ haŋaŋ te mu yena mwəlà mâ mùlè, ghɨ nê kə gha ye a yi mô hamok kə yi ghəl te Bì tì jìsa ha ghàhnà.

⁵Wùt ywên, mu wu hì jîsà ha wò chin na, mu fo wi sak yi fe ha wò, à mò kə ye a ghàhnà khə kə nâ a yìmi. Mu jîsà na ghàhnà hi kôŋà ngɨŋsu ghàhnàsu.

⁶Kàntè yì kòŋ mò a wu yu afa ghàhnà nè te saktu Fùyèn tù jìsà. Saktu wun tu mô na, ghàn hi gbê kə a fùtɨ̂n à yì kòŋ kə yi ghəl te ghàn hì mò ma ghàn tî yû a yìmi.

⁷Ghɨt a fəma ti fwu hì gbê chyâlà a mbyî, dô kə ni, bime wi na Jisòs Klistù tì bên a mbyî wu wùn wu wûtù. Nâbi nde a fùtɨ̂n à ghɨt afân mò bànà Klistù, lehe à ghɨ̂t.

⁸Ghàn hi tôknè kə ghàn nê lə̀si shyə ghe ghàhnà fèta, khɨŋa hi khɨtî. Ghàn hi bɨlà khɨŋa lumu hi khɨte maktu tɨnu kə wù jɨ̀m.

⁹Nâbi nde we a wù nyiŋa yênà ashyə̂, chyə̂ wi kə te yikî Klistù chwùtè wijə ghê Yènfù, ma à hì mô nâbi nde chyə kə a fùtɨ̂n à yi yikî Klistù, ma wù hi mô ghe Bì fê mô kəbi ghê Wan.

¹⁰À ki bên nâbi nde ha ghàn hì yike wi yikî mi yîn, kə ghàn fyi wûn a ghàn a sù ndâ, kə ghàn fati toŋti nâbi ha wûn.

¹¹À fate toŋti nâbi nde ha wûn, ma wù hi mô ghê wûn nê fêt tu wun tu gha a be tê ghê wûn amok.

¹²Mu kəta a gha hi jìs ha ghàn, ghɨ dô kə ni, biyani mu kôŋà wi hi nyàk yi nyâk. Mu bɨlà kwàktèlò hi jikte ghàn hi jìs kə nâ ha ghàn nì ngɨŋ à mì, shyəma saŋlî ghàhnà kwok à kpen.

¹³Wana jàmtù wâ ghe Yènfù chwoka, ti chinhi toŋtînì ha wò.