Read Bum Gokhini 1 Bible Online

Gokhini 1 - Bum bible

Gokhini 1

¹Ghɨ̀na mò a gha ghe a Jisòs Klistù tì chwùte a ndan ha Jon. Yènfù fî fo gha mɨ ghɨ̂n na wù chwuti ha ghɨt a wuna ghɨ fetana shyəma ghɨna hi khə gha ghe a ghɨ hì khɨŋa hi gàn. À ndùku mô te wù khɨŋa na ghɨ hi khə gha mɨ ghɨ̂n, wù tum anjèl à wûn ha Jon, a mô kəbi wut wù fètana à wûn wùlè.

²Jon te wut we wù tì yena, fôktì kwok nì tum à Fùyèn kəbi nì gha ghe a Jisòs Klistù tì chwùte ha wûn a ndan, a mô nâ gha ghe à jɨ̀m a wù tì yena.

³Jùŋ mò ha wùt we a wù taŋa gha mɨ ghɨ̂n a Yènfù fòkte ni, ghɨta yutê. Jùŋ mô kəbi ha ghɨt ghe a ghɨ ywo, fê nê gha ghe a ghɨ nyaka a ŋwàklù afân, beka yu we a ghɨ lema na gha mɨ ghɨ̂n bê gan atɨ̂n hì bakhe bênàlò.

⁴À chinhi mu Jon ŋwàklù yina ha ghàn nôn wu ghɨt a bimena we sàmba a ghàn chyə yi lak yi Esiyà. Yènfù chwuti təm a jûŋà ha ghàn hi nì na ghàn hi chyə nì yutìnì. A mô funfu a fu mô, ma fu ndùku lâwû, mô hi bê bèn. Yènfù ghê yohnù we sàmba a wu mô ashyə̂ kpòk tù fə̀nù, chwuti təm a jûŋà ha ghàn nê na ghàn hi chyə nì yutìnì.

⁵Jisòs Klistù tî nê kəbi ni. A mô wûn wut wù jùŋ we wù fòktè kum Fùyèn. A mô wut wù shyə̂ we a wù tì lòte a yi kpû, a saka wûn fə̂ntù te a tu mô a mbyî. Wù kôŋà ghàhnà fê mô ma wù ti fo ngɨŋ à wûn kpulò suh luŋ mù wûn hi bònhè ghàhnà a ghàhnà sùbe,

⁶wù ni na ghàhnà hi mô wana toka ha Yènfù, fêtà te ngàŋsu ha Bè wûn Yènfù. Kokhînì nì jyaka mò ha Jisòs Klistù a yû mù jɨ̀m. Àmèn.

⁷Ghàn yen, wù we wù hì bênà atɨ̂n à sù bàk, nâbi nde mô hi yen a wûn, bakhe nì ghɨt à jɨ̀m a ghɨ ndùku sôlè wûn nì woŋa. Nâ ghɨt à jɨ̀m a mbyî bê hi jyê kum wûn. Yi mô kə nâ hamok. Àmèn.

⁸Bâba Yènfù, Bè jyak à jɨ̀m jis na, “Mu mò Yìmi, fê mô yi Gokhi.” A mô funfu a fu mô, ma fu ndùku lâwû, mô hi bè bèn.

⁹À mò mu wùt wù bimena ha Jisòs. A mô mu Jon, a wâ nì wânù. Ghàhnà chîntè yena ngə̂k kə à jɨ̀m, biyani kwuta kə a təm, yute hi bè tè mò wu lùk wu fə̀n wù Fùyènù. Ghɨ che kwo lem mu a Batmòs, a mô yi lak ma jwò ti jɨŋ kat yini beka mu fòktè tum à Fùyèn, fê fôktè gha hamok ghe a Jisòs tì chwùte.

¹⁰À ndùku mô wu tuk afa a ghɨ kokhe Bâba atɨ̂n, Yohnà Fùyènà khɨti kwâktì mi, mu yu te jyə̀ yì tâ fwo a mu yi bàm dûmà ni te yi soŋ te ghɨ toŋa,

¹¹yì jis na, “Nyàk gha ghɨ̂n a wò yena ni, ma wò chinhi ŋwàklù àtɨ̂n ha nôn wu ghɨt a bimena we sàmba a Efisùs nì Sɨminà nì Begamùm nì Tìyàtilà nì Sadìs nì Fìlàdefìyà nì Làdisìyà.”

¹²Mu kahi wu wun hi yen nâ a jìsà nde ha mu agha, kə wu yu mu yen kə mwə̀ mù tɨ̂n sàmba te ghɨ fate nì gûl hi tè tomte lâmsù atɨ̂n.

¹³Wùt mô a mwə̀ mù tɨ̂n a ngwùŋ, a mô Wâ Wùt ma wù ti mak njusu, su dâfà kə ni, kwut wu kwô a wun a ngàŋtù, ma ghɨ fati nì gûl.

¹⁴Nyuŋsu wunsu tusu fufa kə ni bwu, se a wuna ŋwântè kə ni te chwûlù wùsu.

¹⁵Wulu wunu njêntè kə ni te kah a jûŋà ale te ghɨ nyoka wu wùs, jyə̀ wûn kwô te fenani yè kwô, dùmà kə ni.

¹⁶Wu mô ma wù ti khɨti njènû sàmba a wun a kpen wu wo ta, fâ gbɨ̀liŋi fwu ben a wûn a yi jwô, kə̂k yi wuni bana kə te yuchwî a wu yu afa chwì bana ta.

¹⁷Mu yen ben nì wûn ni, fen a wûn ashyə̂ hì mô kə ni te mu kpulô, biyani wù lem a wo wuna ghɨ kpen wu wo ta a mu a tû, jis ha mu na, kə mu fan, na yi mò yìmi, fê mô gòkhi a gha à jɨ̀m,

¹⁸fê mô kəbi wûn we a wù chyə. Wù jis na yi tî kpû kahi hì chyə̂, mô hi tè mò kə yi mô a mu yu mù jɨ̀m. Wù fî jis na yi kəta a chwok a yi a wô, kəta jyak a kpo, fê kəta jyaka hi chwoka yi lak yi ghɨt a kpona.

¹⁹Wù jis ha mu na, mu nyak gha ghe a mu yena a wu yu mefû nì ghe a ghɨ baha mô hi gàn.

²⁰À mò gha a letena a kanana ghe a ghɨ mô kum jèn mê sàmba a mu yena a wûn a kpen wu wo ta kəbi nì mwə̀ me sàmba a ghɨ ye tomte lâm sê atɨ̂n ma ghɨ fate nì gûl yâ. Jèn munâ sàmba, mò anjèlsù Fùyènsu sàmba, su lyi luk wu ndasu ghɨt a bimesu se sàmba. Mwə̀ munâ a ghɨ tomte lâmsù atɨ̂n sàmba ni mô ndasu ghɨt a bimena se sàmba.