Read Bum Gokhini 10 Bible Online

Gokhini 10 - Bum bible

Gokhini 10

¹A yi bàm atɨ̂n, mu yen anjèl à Fùyèn yì ngaŋtena yìlè, yì lo hì chwo bênà a nyə̂. Yi mô ma mbàksù ti lim yinì, fìlinjoŋi mô a wûn a tô, kə̂k yi wuni bana kə te yuchwî. Fwəni anjèl àtɨ̂n mô te a fûŋ a wùsa te ghɨ bame.

²Yi kəta fubuklâ fu ŋwàklù fù ma ghɨ ti lîm a wun a wô ma ghɨ ti bəh. Yi mô ma yì ti tom wula wuna ghɨ kpen wu wo ta a jwô yì chìk, tom ghɨ kpen wu wo kôwì a chyə̂.

³Anjèl à Fùyèn àtɨ̂n toŋa jis nâ a jyə̂ yì tâ yi dûmà te jyə̀ bìkəm wu yu afa yì jyè. Yi toŋa nâbi wùni yu, wuli dum a ghan sàmba.

⁴À hì mô te wuli tɨ̀ni dùma, mu hì khɨŋa hi nyàk gha ye yi jisa, biyani mu yu jyə̀ te yì bè a nyə̂ jîsà na, “Lèti gha ghe a wuli duma yin jìsa a ghan sàmba, kə wò nyak.”

⁵Yi bàm atɨ̂n, mu fî yen te anjèl à Fùyèn ye a mu ye yena yi mô a jwô fê mô a chyə̂, te yì lòhe kpen wu wunu wu wo ta a nyə̂,

⁶wù kan yi yet yi Fùyèn fe a fu mô a yû mù jɨ̀m, a mô funfu a fu fate nyə nì chyə nì jwò yì chìk nâ nì mwə̀ mù jɨ̀m me a mù mò a tu lùk afân. Yì kântì na ghɨ nè fê chyâhè wi yu.

⁷Yi jîsà na, à ndùku mô a mu tuk afû te anjèl à Fùyèn yì gòkhena atɨ̂n à anjèl se sàmba toŋa soŋi wuni, Yènfù ni gha wuni yi leteni ye fu tì lèma, kə yi ghəl te fu tì fòkte ha ghɨt a wuna ghɨ fetana a mô fòktìsu chiksu.

⁸Yi bàm atɨ̂n, mu yu jyə̀ ye a mu ye ywo a nyə̂ yâ, yi fê jîsà ha mu na, “Ndù fyi ŋwàklù ye a yì mò a anjèl à Fùyèn yê, à yì mò a jwô fê mô a chyə̂ ma ghɨ ti bəh yâ.”

⁹Mu yen yen anjèl à Fùyèn mi ye jis ha wun na yì fo ŋwàklù fe ha mu. Yì jis ha mu na, “Kò kût. Wò nè shihi kut, ma yì hi tofa kə te wu lû biyani ma yì nê shihi chwo tàn a wò wu là, ma yì nê hi lwê yi lwî.”

¹⁰Mu fyi fù ŋwàklù fu tɨnfu a anjèl à Fùyèn àtɨ̂n a wô, shihi châm, yì hì tofa kə te wu lû a mu yi jwô, yì kahi hì lwê yi lwî a mu wu là.

¹¹Anjèl àtɨ̂n fî jis ha mu na mu kəta hi tè fòktè tum à Fùyèn ha ghɨta ma ghɨ fwo a tu lak, tu dô kə ni, kəta tu kə̂k, tu dô kə ni, jîsà tu jîs, tu dô kə ni, nì fə̂ntù, tu dô kə ni.