Read Bum Gokhini 12 Bible Online

Gokhini 12 - Bum bible

Gokhini 12

¹Chwena yì kana yìlè fwo a nyə̂, mu yen wùt wù ywên ma wù ti mak a yuchwî ha sùnju, njoŋ mô a wun a sah à wù, fota tù fə̀nà mô a wun a tû, kəta mu jên njwòsù bà.

²Wu mô wu lâ, ma wan hì luma wûn, wu jyê beka wù ndùku ywo lûmì.

³Chwena yì kana yìlè fî fwo a nyə̂, nyàm yì chìk yì bəmana yìlè fwu kə̂kì bâŋà yi bâŋ, kəta tu sàmba nì sesu ìwûm. Nâbi ghɨ̀ni to kəta fota tù fə̀nà.

⁴Kpènu wunu yâhà bâh à mù jènà à mòk atɨ̂n à bàh wù tât a nyə̂, wù mak chwohi a chyə̂. Nyàm àtɨ̂n time a wùt wù ywên we ashyə̂ a wù tì khɨŋa hi bwɨ yâ hì gbûtè hi kut a wan àtɨ̂n, a wu yu afa wù bwə.

⁵Wùt ywên àtɨ̂n bwɨ wan wù lɨmà, wu mô hi bè saka tu lak tù jɨ̀m nì jyaka a bəmana. Biyani ghɨ tesi wan àtɨ̂n kwok nì wûn ha Yènfù a nyə̂ a funfu kpòk wu tù fə̀nù.

⁶Wùt ywên àtɨ̂n tet yen a yi lak yi sùsi, a mô luk we Yènfù tì fate lema ha wûn na ghɨ tôknà kwok nì wûn afû a mu tuk kam nì ghə yì bà nì tuk mù mtufa.

⁷Yi bàm atɨ̂n, woŋi lôtì a nyə̂, Maykèl ghê anjèlsu wunsu nô nyàm àtɨ̂n, nyàm àtɨ̂n nì anjèlsu wunsu boŋa nô ghɨna,

⁸biyani Maykèl ghê anjèlsù wunsu no yə nyàm àtɨ̂n, ghɨna hì fè kəta wi luku a nyə̂.

⁹Ghɨ mak chwohi nyàm àtɨ̂n a chyə̂. A mô ni, a mô ywô ye a ghɨ toŋte na deblì yâ, a fê mô kəbi Satàn. A mô yì yîn ye yì ndùku lehe ghɨta a mbyî yì jɨ̀m. Ghɨ mak chwohi wûn a chyə̂ ghê anjèlsu wunsu kə sù jɨ̀m.

¹⁰Yi bàm atɨ̂n, mu yu jyə̀ yi fwo bênà a nyə̂ jîsà na, “Yènfù ghàhnà fu bònhè lò ghɨt a wuna chîn chwûtè jyaka a wuna te fə̀n. Chîn mô, Klistù ma a ni wut we a Yènfù chwoka tuma mô hi chwùtè a ghɨ wuna jyaka beka ghɨ ti mak chwohi we a wù chehì mô a Yènfù ghàhnà fù ashyə̂, ngane wana ne nchwì, ngane ntuksu yâ.

¹¹Wana ne mɨ ghɨ̂n ti nò yə wûn kum luŋ mù Wâ Njyə̀ nì hamok ye a ghɨna chehì fôktè fê kôŋà nâ hi fo ngɨŋsu ghɨna su hi kpû kum wûn.

¹²Nâ ghàn à jɨ̀m ghe a ghàn chyə a nyə̂, ghàn hi saŋlê! Yi nè hì bəmalò ha ghê ghɨ chyə a mbyî nì ghàn ghe a ghàn chyə a jwô yì chìk beka deblì ti chwo ben ha ghàn, lâ wanu wu yafa nâ haŋaŋ beka ghàn hì khə na yu ti tumhî shyəma fêt yi wuni mi.”

¹³À hì mô te ywò àtɨ̂n yena na ghɨ ti mak chwohi wùn a chyə̂, yì hì nyɨŋa a wùt ywên we yi bàm we a wù bwə wan wù lɨmà wê.

¹⁴Biyani ghɨ fo tu ghâ tu mbùk à wum tu ha wûn shyəma wù tet ywò mi yê ma wù yê tan a yi lak yi sùsi wù lùk afa a mô hi tòknà kwok nì wûn afû a wù lɨ̀m wù tât nì bəha.

¹⁵Ywò àtɨ̂n chwu mòlû a wùt ywên we yi bàm, mu mô kə te jwô shyəma mù lyê chya nì wûn.

¹⁶Biyani chyə gâmtì wùt ywên àtɨ̂n, mɨ jwò mi ye a ywò àtɨ̂n tì chwo yâ.

¹⁷Ywò àtɨ̂n bâŋhì wu lâ ha wùt ywên àtɨ̂n, lo yen lôhì yi woŋ ha ghɨta wùt ywên we yi sah yi nda, a mô nâ ghɨta à jɨ̀m ghe a ghɨ ndùku lêmà saktu Fùyèn tu fê fate khɨte hamok ye a Jisòs tì chwùte a ndan.

¹⁸Ywò àtɨ̂n timi kə a bi jwô yì chìk.