Read Bum Gokhini 15 Bible Online

Gokhini 15 - Bum bible

Gokhini 15

¹Mu fî yen chwena yì kana yìlè a nyə̂ yi bəmâ. Mu yen anjèlsù Fùyènsu sàmba, su kəta ngəksu sàmba, a mô ngək se a su chwûtè gokhe lâ baŋanu wu Fùyènù.

²Mu fî yen shyə ale ghe kə̂kà te jwô yì chìk, bana tohne te mìjô, ma ghɨ ti fəh nì wusu. Mu yen kəbi ghɨt ghe a ghɨ ye no yə nyàm ye a yì ye fwo kwoka a jwô yâ fî no fə̀khè atɨ̂n ghê bakhe nì kon a wuna yi yet ghê, ghɨt atɨna mô yi bi lwi afa, kəta tu luŋ tu Fùyèn tù a ghɨna wu wô.

³Ghɨna hì yema njàŋ à Musìs, a wut à Fùyèn wù fètana kəbi nì njàŋ à Wâ Njyə̀. Ghɨna hì yema jîsà na: “Bâba Yènfù, Bè jyak à jɨ̀m. Wò nèlò gha kana a bəmana! Wò mò fə̀n ha luk tù jɨ̀m. Lum tatu mô chilichili fê mô hamok!

⁴Bâ, à mò hi faŋa nâ nde hi tè fànà wò agha? À mò hi faŋa nâ nde hi tè kokhe wò? À mò kə wò nɨ̂ŋ a wò yule. Ghɨt a tu lak tù jɨ̀m bè bêlò ma ghɨ hì ngumli wò beka ghɨt à jɨ̀m ti yen a ndan na fêt ya mò chilichili.”

⁵Yi bàm atɨ̂n, mu yen ma ghɨ ti chwok luk we a wu yule kpene a ndâ Fùyèn a nyə̂,

⁶fî yen anjèlsu Fùyènsu sàmba te su fwo bena a ndâ Fùyèn afû, kəta tu nki tu ngək tu sàmba. Anjèlsu tɨnsu ndùku mô ma su ti mak njusu, su njêntè jwôfà, kwut tu kwô a ghɨna ngàŋtù ma ghɨ fati nì gûl.

⁷Shyə à mòk atɨ̂n à mwə̀ mù yòhna afa mù kìk fo wu kaŋ sàmba ha anjèlsu Fùyèn se sàmba, ma ghɨ fati nì gûl, kaŋu tɨnu mô ma wu ti lun nì mwə̀ me a mù chwùtè lâ wu baŋanu Fùyènù, Yèn fe fu mô a yû mù jɨ̀m.

⁸Ndâ Fùyèn atɨ̂n hì mô ma lɨkfu ti kûntì atɨ̂n, ma fu fwo yi bân afa a Yènfù ndùku kəta fî fwu kəbi a funfu a jyak, wùt bu hi lye a ndâ afû, a bu na ngək se anjèlsu Fùyèn se sàmba bè nì sinsu ti mî.