Read Bum Gokhini 18 Bible Online

Gokhini 18 - Bum bible

Gokhini 18

¹À ndùku mô te gha mɨ ghɨ̂n chyàla, mu yen anjèl à Fùyèn yìlè yi chwo bênà a nyə̂. Yi kəta nâ jyak a chika hi tê sâk, bân yi wuni mô ma yi ti baŋ kə mbyî yì jɨ̀m.

²Yi bwata jîsà nâ nì jyə̀ yì tâ na, “Yì ti fên! Babilòn, a yi tèk yi chik ye ti fên! À hì mô luk we a deblìsu chyə atɨ̂n nì yohnà wu be nì nyɨ̀mû fina mù be, nâ mù jɨ̀m.

³Yi mô ni beka nâ ghɨt a mbyî ghɨ̂n à jɨ̀m ti nyu lùk mù wûn mù ta me a mù nè ghɨta chyə chyəna liŋa ghê ywena. Fə̂ntu a mbyî ti chyə nì wûn, ghɨta bəklena a mbyî ti ghakli kum kə nì chyəna wuna ghɨ kpàlànà.”

⁴Mu fî yu jyə̀ yìlè, yi fwo bênà a nyə̂ jîsà na, “Ghɨt a ma, ghàn fwu afû, bu ya ma ghàn hi chîntè a wun a sùbe, ma ngəksu wunsu boŋà kwoti ghàn.

⁵Besu wunsu ti dû ni kwok tan a nyə̂, Yènfù mô hi fo ngə̂k ha wûn kum gha mɨ ghɨ̂n.

⁶Ghàn hi nê kə gha ha wûn a ye wù tì ne ha ghàn. Ghàn shihi làk a wûn, ghàn lak yomta a gha afa wù tì ne ha ghàn. Ghàn shihi fo mu lûk ha wûn, ghàn fo mu tâ chyâ me a wù ndùku fo ha ghàn.

⁷Ghàn fo ngə̂k ha wûn nâ ni, ma wù yu lûmì. Wù ndùku kokhe ngɨŋ à wûn, chyə̂ atɨ̂n à yi ghak. Wù ndùku nê ni jîsà kə ha ngɨŋ à wûn na, ‘Mu mò nè fə̀n, mu wijə ywê nkwû. Mu bè jyê wi kpu.’

⁸Yi ni chwùtè na ngə̂k mi sîn bè kwote wûn kə wu tuk wù mòk. Yaftu nì ngə̂k su lesu nì jìŋ, bè chîntè bê ha wûn kə wu tuk wù mòk. Ghɨ bè nyôkà lò wûn nì wusu beka Bâba Yènfù fe fu saka wûn, kətalò jyaka, ghɨ kpenê.”

⁹Fə̂ntu mbyî tê a tu ndùku boŋa chyə a wun atɨ̂n à yi ghak, fê chyə̂ chyəna wuna yi liŋa ghê, bè hì jyêlò wu yu afa ghɨna yena te wù bame, lɨkfu kwokâ.

¹⁰Ghɨna bè time kə hadà beka ghɨna fànà na kə ngə̂k à wûn mi ye boŋà kwoti ghɨna, ma ghɨ hi jîsà na, “Yi bəmalo! Yi bəmalò ha Babilòn yi tèk yi chik yìna! Wù chehì kətalò jyak a kanana biyani ghɨ lyi kə afu yula ni fo ngək yì chìk ha wûn.”

¹¹Ghɨta bəklena a mbyî bè hì luŋle jyê beka nâ wùt lè bê fê wijə hi yun a shyə ha ghɨna.

¹²Wùt bê fê yuna wijə shyə ha ghɨna. Wùt bê fê yuna wijə gûl ha ghɨna nì silbà nì fwatu tatu nì njusu ta se a ghɨna ndùku bəkle kə a tu nkì a tu nkì, nì kàk mù jùŋ nâ mù jɨ̀m, nì mwə̀ me a ghɨ fate nì soŋa nyàm à jyə̀ nì me a ghɨ fate nì kaha baŋana, nì sô nì me a ghɨ fate nì kàkû, nì me a ghɨ fate nì te njentena.

¹³Wùt bè fê yuna wijə Làmindâ ha ghɨna. Ghɨ bè fè yuna wijə leŋi nì yûhì su lɨmtesu jûŋ sù ha ghɨna. Wùt lè bè fê yuna wijə lùkû ha ghɨna nì gutû nì kùŋ mù jùŋ nì wît nì nyamsu mbòloŋsu nì bwusu njyə̀sù nì nyamsu kwaŋsu nì chyak se a ghɨ gûfà nyamsu kwaŋsu. Wùt lè bè fè yuna wijə wùt ha ghɨna hi lèm a kwòs.

¹⁴Ghɨt a bəklena mɨ ghɨ̂n bè jîsà lò ha Babilòn na, “Nâ mwə̀ mù jɨ̀m me a wò chehì nyɨŋa yi bàm atɨ̂n ti samî, bakhe nì ghak ya nâ yì jɨ̀m. Mwə̀ mu munâ ti yên, wo bu hi bè fè yen!”

¹⁵Ghɨt a bəklena ghe a ghɨ chehì bəkle ghê wûn bè time kə hadà beka ghɨna fànà na kə ngə̂k à wûn mi yìna boŋà kwoti ghɨna. Ghɨna bè hì jyê fê khɨmte wu wun,

¹⁶jîsà na, “Yi bəmalo! Yi bəmalò ha tek yi chik yina! Yi chehì lafa nì njusu ka su baŋasu fê lafa ngɨŋ à wûn nì chyakmù ma ghɨ fate nì gûl nì te njentena nì fwatu tatu!

¹⁷Mwə̀ munâ ti chîntì mî kə afu yulâ ni.” Be sù ngwùkà nì ghɨt ghe a ghɨ gbê a sù ngwùksu tɨnsu nì ghɨt ghe a ghɨ fêtà atɨ̂n nì ghê a ghɨ yə kə beka jwò bè time kə hadà

¹⁸bwata jyê te ghɨna yena te Babilòn fyime, lɨkfu kwokâ. “Nâ tek yi chik yile tà timi hì fê mô te tek mi yina!”

¹⁹Ghɨna bè fukalò bûtù a ghɨna tû jyê nâ haŋaŋ, khɨmte wu wun jîsà na, “Yi bəmalo! Yi bəmalò ha tek yi chik yina ha ghɨt ghe a ghɨ fêtà a jwô tì ghakle kə kum yini ni. Ghàn ti chîntì ləha nâbi ghə kə a fu yulâ ni!

²⁰“Ghàn ghe a ghàn chyə a nyə̂, ghàn hi saŋlê. Ghàn hi saŋlê ghɨt a Fùyènà nì ghɨt a tuma, nì fòktì su chiksu beka Yènfù ti fîsì gha ye a wù tì ne ha ghàn!”

²¹Anjèl à Fùyèn yì chìk yìlè ki lyê yi ti, yi ghaka kə ni te yi ti yi bani tum chwohi a jwô, jis na, “A ni mò kə te ghɨ bè lyê Babilòn yi tèk yi chik yina ma tum à chwohi nâ nì jyaka, ma ghɨ bê tè fè yên.

²²Wùt bè fê ywo wijə te ghɨ buka luŋtu makə yema njàŋsù makə toŋa ndoŋ su makə tu soŋ a wo tu lum tu tèk tu; nâ wùt mòk we wù fètà mwə̀lû nì wo bè hì fê wi a ghàn à wûn, ma ghɨ bê tè fè yû te wùt gwò a yi ti.

²³Wùt bè fê yena wijə te lâm bana, ma wù bê tê fè yu jyə̀ ghɨt a malana a wo fùtɨ̂n. Wò khə na ghɨt gha ghe ghɨ ndùku bêkà mwə̀lû ha wò ndùku mô kə nâ ghɨt a ta a mbyî, wo fê gbê lehe ghɨta lak tu tù jɨ̀m nì fiŋi fu nyaki.

²⁴“Luŋ mù fòktì su chiksu nì luŋ mù ghɨt a Fùyènà nì mù ghɨt ghe a ghɨ ywite a chyə afân beka yi bimî ghɨna hì mô kə wun a wô.”