Read Bum Gokhini 21 Bible Online

Gokhini 21 - Bum bible

Gokhini 21

¹Yi bàm a gha mɨ ghɨ̂n, mu yen nyə fe nì chyə a fe, ma a nyə ashyə nì chyə ashyə hi mô ma wu ti chyâ, bakhe nâ nì jwò yì chìk.

²Mu ki yen te Yènfù chinhe Tèk yi yulani ye, a mô Jèlusalèm yì fê, yi chwo bênà a nyə̂ ma ghɨ ti fati labhi yini te ghɨ labhi ywê lɨ̂m na wù yê yen lɨm à wûn.

³Mu fî yu jyə̀ yì tâ yìlè te yì fwo bênà wù kpòk wu tù fə̀nù afû, yì jis ha mu na, “Yên, Yènfù hì chyə ghê ghɨta chîn. Fu hi mô ghê ghɨna, ghɨna mô ghɨt a Wuna. Yènfù nâ a Wun a ngɨŋ hì mô ghê ghɨna.

⁴Fu bè yàhàlò semù nâ mù jɨ̀m a ghɨna sê, ma kpu hi fê bu. Wùt bè fê kwohe wijə seni, jyê wi shyə ale, fê yafa wi, beka gha a mwo ti chyâ.

⁵Wùt we a wù ndùku mô a wu kpòk wu tù fə̀nù mu we, ki jîs na, “Ghàn yen! Mu nè a gha à jɨ̀m ma ghɨ kahè hi mô a fê.” Wù fî jîs ha mu na, “Nyàk gha mɨ ghɨ̂n. Ghɨ mô kə nâ hamok, kpenê shyəma nâbi nde bimi.”

⁶Wù jis kəbi ha mu na, “Gha à jɨ̀m ti kpên! Mu mò Alfà fê mô Òmegà, a mô yìmi nì gokheni gha à jɨ̀m. Mu nè folò mòlû nâbi ha nde we a kuŋ à mòlû yima wûn, ma wù nyu, ma wù tê fo shyə. Mòlû muna nè fwo yi tok afa yi fo chyəna ha ghɨta.

⁷A no yə nâbi nde be ma mu fo mòlû mu muna ha wûn ma mu hi mô Yènfù wun fu, ma wù hi mô wâ mù.

⁸Ha ghɨt ghe a ghɨ fânà nì ghɨt ghe a ghɨ tà bimi jə̂ ha mu, nì ghɨt ghe a ghɨ nê gha ghe a ghɨ yule wi, nì ghê a ghɨ ywite ghɨta nì ghê a ghɨ chyə nì ywena makə lɨmànà a kəta wi ghɨna, nì ghɨta funyaka nì ghe a ghɨ ngumle mosòmù nì ghɨta fəma nâ à jɨ̀m, ghɨna kəta luk wu ghɨna a yi be afa a wusu bame atɨ̂n yâ ma ghɨ ti suh kànû atɨ̂n. Luk mu wûn ni mò kpû kumteni.”

⁹Anjèl à Fùyèn yìlè atɨ̂n à anjèlsu Fùyèn se sàmba a su ndùku kəta kaŋ we sàmba ma ghɨ ti lunhi nì ngəksu gokhe se atɨ̂n sàmba ni, ben jis ha mu na “Bî, ma mu chwuti ywê Wâ Njyə̀ ha wò.”

¹⁰Yohnà Yulena khɨti kwâktì yi mi, anjèl à Fùyèn atɨ̂n lyi kwok nì mu a tô kùn yìlè, yi dâfà kə ni, chwûtì Jèlusalèm ha mu, ma a ni Tèk yi yulani te yi lo a nyə̂ ha Yènfù hì chwo bênà.

¹¹Tèk mi yina ndùku kəta ban yi chiki yi Fùyènì. Tèk yi tɨni ndùku bana njêntè jwôfà, nyɨ̂mà kəta ti yile ghɨ toŋte na jasbà, fê bana tohne kə te mìjô.

¹²Yi ndùku kəta kəbi mbàn yì dà yìlè te ghɨ bwəma jɨŋa kata, yi kəta jwo njwòsù bà, nâbi yìni jwo kəta anjèl à Fùyèn atɨ̂n. À ndùku mô nâbi yìni jwo ma ghɨ ti nyak yet yi sah yi nda ghɨt a Isalì yì mòk atɨ̂n.

¹³Mbàn mi ye ndùku kəta jwo à tât a bàh afa yuchwî sata, kəta à tât a bàh afa a yuchwî lye, kəta à tât a bàh à kwôkà, kəta à tât a bàh a nchwô.

¹⁴Yi ndùku mô ma ghɨ ti ba a tô chyə sù nda njwòsù bà, a mô kəbi ghɨ̀ni chyə nda ma ghɨ ti nyak yet yi wùt wù tûm atɨ̂n, a mô ghɨt ghe a ghɨ fêtà ha Wâ Njyə̀.

¹⁵Anjèl à Fùyèn ye a yì ndùku jîsà ha mu, ndùku kəta fù mbàŋlà fe ghɨ fêkà mwə̀lû atɨ̂n ma ghɨ fati nì gûl. Wù ndùku kəta hi fèk yi tèk yi tɨni nì jwo tɨni nì mbàn yì tèk mi yê nì mbàŋlà fu tɨnfu.

¹⁶Tèk mi ye ndùku mô bâh wù tɨnu wù jɨ̀m mô kə yi ghəl, ghak yi tɨni mô kəbi te dâf yi tɨni. Anjèl à Fùyèn mi yê fek tèk yi tɨni nì mbàŋ à wûn mi yê, yi hì dâfà tala mihè mâl su kam nì ghə yì tân, dâfà kwoka kəbi yâ.

¹⁷Anjèl àtɨ̂n fek fifà mbàn mi ghê, ghɨ hì mô tàmsù mtufa njwò tufa. Yì fek mbàn àtɨ̂n kə nâ te wût.

¹⁸Wunu mbàn wu tɨnu mô ma ghɨ bwəm nì jasbà, nâbi gha a yi tèk afû mô ma ghɨ fati nì gûl, yi bana tohne kə te mìjô.

¹⁹Sah yi mbàn yi tɨni mô ma ghɨ ba nì nki tu ti tu jûŋ tù kə tù jɨ̀m. Ti yi shyə mô jasbà, kùmti mô sàfayà, yile mô agàt, yile mô èmelà.

²⁰À ndùku kûmtè onìs, tufa mô kànelìyà, sàmba mô kɨ̀lisolìt, fama mô behî, bulamòk mô topàs, ìwûm mô kɨ̀lisofàs, njwò yì mòk mô jasìn, njwòsù bà mô ametìs.

²¹Jwo mbàn atɨna njwòsù bà kəta wu bâk ma ghɨ ba nì fwatu, nâbi ghɨ̀ni bâkà mô ma ghɨ ni nì se fwa yì mòk. Lum wu ta we a wu ndùku mô a yi tèk afû mô ma ghɨ twi nì gûl, yi bana tohne kə ni te mìjô.

²²Mu tê yena jə̀ ndâ Fùyèn yi tèk afû beka ndâ Fùyèn afû ndùku mô kə nâ Bâba Yènfù, a Bè jyak à jɨ̀m nâ nì ngɨŋ à wûn ghê Wâ Njyə̀.

²³Tèk mi yina khɨŋa wi na chwì makə njoŋ hi bana atɨ̂n beka bân yi Fùyènì mò atɨ̂n, Wâ Njyə̀ fê mô lâm atɨ̂n.

²⁴Ghɨt a tu lak tù jɨ̀m bè hì gbê a ban yi tɨni, fə̂n tu mbyî tu lyi ghak yi ghɨna ma ben nì yini atɨ̂n.

²⁵Ghɨ bè hì khɨ̂ŋà wi jwo mbàn atɨna beka tuku bè fê jə wi.

²⁶Lak tù jɨ̀m bè lyê yi ghak yi ghɨna ma ben nì yini a yi tèk afân.

²⁷Shyə ale bè lye wi fùtɨ̂n à yi tèk afân, yule wi. Wùt à gha tu fiŋa makə wùt yì fə̂m bè lye wi atɨ̂n. A bè hì lye kə ghɨt ghe a ghɨ tì nyàka yet a ghɨna a Wâ Njyə̀ ŋwàklù yì bòn.