Read Bum Gokhini 3 Bible Online

Gokhini 3 - Bum bible

Gokhini 3

¹Wù jis kəbi ha mu na, “Nyàk ha anjèl à Fùyèn ye a yì mò a chìntê ghɨt a bimena a Sadìs na: Wùt we a wù kəta yohnù Fùyènù we sàmba, kəta njèn me sàmba jis na, Mu khəlò fêt yani. Ghɨta yena na ghàn chyə lò biyani ma ghàn ti kputî.

²Ghàn yèma ma ghàn hi tôknè nì bimî yi teta ye a ghàn kəta, bu ya ma yi mê mihi beka mu yena na fêt yani kwoka kpene wi a Yèn famfu ashyə̂.

³Ghàn kahè kwàkti gha ghe a ghɨ tì yike ha ghàn nì ghe a ghàn tì ywo. Ghàn kahi təm ghana a ghàn a sùbe ma ghàn hi nê gha atɨna. Ghàn ki faŋ hi yèmà, ma mu bûŋhè ben ha ghàn kə te wùt wù chwoŋana, wu yu afa ghàn khə wi.

⁴“Biyani ghɨt ale baha làwû a Sadìs teka ghɨna nuk njusu ghɨna su nì be. Ghɨna bè mâkàlò njusu fufasu ma ghàh à ghɨna bê hi gbê ghanê beka ghɨna yule kpenelò.

⁵Ghɨt ghe a ghɨ no yə, bè lafalò kəbi nì njusu fufasu. Ma mu bê tê chikhe jə̀ yet a ghɨna a ŋwàklù yì bòn. Ma mu bê timè jis kə nâ a ndan na mu khəlò ghɨna a Bom ashyə̂ ghê anjèlsu wunsu.

⁶“À hì tofa nâbi nde, wu hi tôkà yute gha ye Yohnà Yulena jìsà ha nôn à ghɨt a bimena.”

⁷Wù jis ha mu na, “Nyàk ha anjèl à Fùyèn ye a yì mò a chìntê ghɨt a bimena a Fìlàdefìyà na: À gha ghɨ̂n jis wùt we a wù yule, mô kə hamok, kəta à chwok a Defìt a ndâ, chwoka jwo nda, wùt bu hi fà, wu fa, wùt bu hi jìmì.

⁸Mu khəlò fêt yani. Ghàn yen, mu ti jîmì de jwo nda ha ghàn, nâ wùt bu hi sèn. Mu khəlò na ghàn tòkà kəta wi jyaka, ma ghàn ti bimi ha mu, tê mana jə̀ mu.

⁹Ghàn hi khə na mu nè nêlò ghɨt a Satàn à nòn ghe a ghɨ wama jîsà na ghɨna mò ghɨt a Jûs bê ngumti a ghàn ashyə̂ ma ghɨ yen na mu kòŋàlò ghàn.

¹⁰Mu nè bônhèlò ghàn a wu yu afa ngək bèna a mbyî yì jɨ̀m hi mòmà ghɨt ghe a ghɨ chyə a mbyî, beka ghàn ywo gha ye a mu jîsà na, ghàn hi wunhê.

¹¹À faŋ kə fu yulâ ni shyəma mu ben. Ghàn hi samhe kə ha mu, kə wùt nè fye maktu wanu we a ghàn no yə.

¹²À no yə nâbi nde be, ma mu ni ma wù hi mô tôk à nda Yèn famfu, ma wù bê tè fè fwo atɨ̂n. Ma mu bê nyak yet yi Yèn famfu a wun wu wùn, ma mu fê nyak yet yi tèk yi chiki yi Fùyènì, a mô Jèlusalèm yì fê. Yi bè lô ha Yèn famfu a nyə̂ ma yi chwô ben. Ma mu bê nyak kəbi yet yi mi yi fe a wun wu wùn.

¹³“À hì tofa nâbi nde, wu hi tôkà yute gha ye a Yohnà Yulena jìsà ha nôn à ghɨt a bimena.”

¹⁴Wù jis kəbi ha mu na, “Nyàk ha anjèl à Fùyèn ye a yì mò a chìntê a ghɨt a bimena a Làdisìyà na: Yìna ni mò tum ma yì lo ha we a ghɨ toŋte na, Àmèn. A mô wûn wùt wù jùŋ we a wù mò, jîsà hamok kum Yènfù. Yènfù tì fati nâbi ghə a mbyî tohna a wùn.

¹⁵Mu khəlò fêt yani. Ghàn lùmà wi a ghàn a yi bimî, sana wi. Yi jwôfà na ghàn hi sanâ, bu ya ghàn hì lûmà!

¹⁶Te ghàn hì chînà mò kə ni, sana wi, lûmà wi, mu te manalò ghàn.

¹⁷Ghàn jìsà na ghàn kətalò ka, ma ghàn ti ghaklî fè gha wi shyə ale. Ghàn jîsà ni khə wi na ghàn mò bûkù ghɨ̂tù, yena ngə̂k. Ghàn fufalò, ma ghàn ti fêf, fê gbê nì sah a yima.

¹⁸Mu tobhe ghàn na ghàn yun kàntè gûl ha mu ma ghɨ twi wu wùs, ma ghàn hi mô ghɨt a mu ka. Ghàn yun njusu fufasu ma ghàn mak à baŋ wun wanu atɨ̂n, kə ghàn hi gbê wumê. Ghàn kina fo ma ghàn lem a ghàn a sê shyəma ghàn hi yena luktu.

¹⁹“Mu njaŋa ha ghɨt ghe a mu kòŋà, fo ngə̂k, tihe ghɨna. Ghàn hi lûmà. Ghàn kahi təm ghana a be.

²⁰Ghàn yen. Mu mò a yi jwô ndâ kûmtè, ma à yu nâbi nde jyə̀ mì jîmìlò, ma mu lyê ben, ma ghàh à wûn hi mô amok fê yə̂ amok.

²¹À no yə nâ nâbi nde be, ma mu ni ma wù ben ma ghàh à wûn ndokò a mu lùk wu fə̀nù. Kəbi yi ghəl te mu hì mô ma mu ti no yə̂ hì mô ghàh à Bôm a wun wu lùk wu fə̀nù.

²²“À hì tofa nâbi nde, wu hi tôkà yute gha ye Yohnà Yulena jìsà ha nôn wu ghɨt a bimena.”