Read Bum Gokhini 4 Bible Online

Gokhini 4 - Bum bible

Gokhini 4

¹À ndùku mô te gha mɨ ghɨ̂n chyàla, gha fî fwo a mu yi kə̀k, jwo ndâ jîmì a nyə̂. Jyə̀ ye a mu tì ywo yi jîsà ha mu yâ, dûmà te yi soŋ jis ha mu na, “Kwok bi afân ma mu chwuti gha ye a yi kəta hi gàn ha wò.”

²Kə ni, Yohnà Fùyènà khɨti kwâktì mi, mu yen kpok wu tù fə̀nù a nyə̂, wùt mô atɨ̂n,

³njêntè jwôfà kə ni te ti jasbà nì ti kàniliyà, ma fìlinjoŋi ti jɨŋ kat kpok wu tɨnu boŋa njêntè jwôfà kə ni te ti èmelà.

⁴Kpòk mù tù fə̀n mùlè hì mô mbà njwòsù kìk ma mù ti jɨŋ kat kpok wu tù fə̀n mu wê, chəhsu mô atɨ̂n ma su ti mak njumù fufamù, so fotu tu fə̀nù ma ghɨ fati nì gûl.

⁵À ndùku mô ni, wuli mwânà, fê bwatê wu lùk afû, jyesu fwo bê afû. Tôs su lesu hì bana afû sàmba, a mô Yohnà Fùyènà.

⁶À hì mô kəbi ashyə̂ kpòk afû, shyə ale mô afû kə̂kà ni te wu lwî ma ghɨ fate nì mìjô, wu bana tohne ni te mte. Mwə̀ mù yòhna mùlè mù kìk hì mô a kwôkà ma mù ti jɨŋ kat kpok wu tɨnu, kəta a se kə wun wù jɨ̀m, kəta ashyə̂, kəta kəbi a yi bàm.

⁷Yohnà ashyə hì kə̂kà te bìkəm, kùmti kə̂kà te mbòŋ, ale kəta yi kə̂k, yi mô te kə̂k yi wûtì, a gokhena mô ni te mbùk te yì fela.

⁸Mwə̀ munâ ndùku mô, nâbi ghɨ̀ni shyə kəta tu ghâ tufa, kəta a sê kə wu wun wù jɨ̀m. Mù hì yema njàŋsù kə yû mù jɨ̀m, yema nchwì yema ntuksu jîsà na, “Yulînì, Yulînì, Yulînì, Bâba Yènfù a Bì jyak à jɨ̀m yulelò. Wò ndùku lâwû, mô chîn, fê mô hi bê bèn!”

⁹Mwə̀ muna kolo hì yema njàŋsù, fo àyòŋnà fê fo kokhînì nì ngumlînì ha wùt we a wù mò a wu kpòk wu tu fə̀nù afû, a wûn we a wù mò a yû mù jɨ̀m.

¹⁰Wù ndùku yema nâbi wùni yu, chəh se mbà njwòsù kìk, fen a wùt we ashyə̂ wù mò wu kpòk wu tu fə̀nù yâ, ghɨ hi ngumle wûn we wù mò yu mù jɨ̀m. Ghɨna hì chwokte kəbi fotu wu ghɨna tu fə̀nù we ghɨ lema ashyə kpòk wu tu fə̀nù mu wê, ghɨ hi yema toŋa jîsà na,

¹¹“Bâba wâhù nì Yèn fahifu, wò kpenelò hi fye yi kokhî, nì ngumlînì yi kpenê, beka à tì koŋ kə wò na mwə̀ mù jɨ̀m hi mô, ki fatî.”