Read Bum Gokhini 9 Bible Online

Gokhini 9 - Bum bible

Gokhini 9

¹Anjèl à Fùyèn yìlè toŋ yi soŋ yi wuni, na à hi mô anjèlsù tân. Mu yen njênfù te fu lo a nyə̂ chem a chyə̂, ghɨ fo a chwok yi jwô yi be yile yi lye chwo yênà kə yi yên ha wûn.

²Njên fu tɨnfu chwok jwo yi be mi yê, lɨkfu lefu hì fwo kwoka atɨ̂n, kə̂kà kə te fu fwo yi jwô wù wùs yi ghaka kə ni. Lɨkfu tɨnfu fwo kwok finhi yuchwî luktu hì finâ.

³Bensu fwo fùtɨ̂n à fulɨk afû chwo a chyə̂. Ghɨ fo kəbi a jyak ha bensu tɨnsu na su hi tale kəbi te nyak mù chyə̂

⁴ghɨ jis ha sinsu na kə su kum shyə a chyə̂ makə nâbi shyə a nyə̂ makə a fukâk. Ghɨ bɨlà jis na su hi tale ghɨt ghe a ghɨ kəta wi chwena Fùyènà a ghɨna yulu shyə.

⁵Bensu tɨnsu ndùku wi hi ywe ghɨt mɨ ghɨ̂n. Mô kə hi fo ngə̂k ha ghɨna a njoŋsù tân. Ngə̂k ye a ghɨna ndùku mô hi yên ni mô kəbi te yê a wùt ndùku ne wu yen wu yu afa nyakfu chyəfu luma wûn.

⁶À bè hì mô a mu tuk mefû ma ghɨta hi khɨŋa kə nâ kpu yena wi, ma ghɨ hi kôŋà kə nâ hi kpû, ma kpu tunhi na yi lyê wi ghɨna.

⁷Bensu tɨnsu ndùku mô ni te nyamsu kwaŋsu wu yu afa su gbûtè hi shik a yi woŋ, tû tɨnu mô ni te ghɨ so fotu wu tù fə̀nù atɨ̂n ma ghɨ fati nì gûl, kə̂k tu tɨntu mô ni te kə̂k tu ghɨ̂tù,

⁸nyuŋsu tɨnsu mô te nyuŋsu tusu wut ywên su, soŋa mô te soŋa bìkəm.

⁹Bensu tɨnsu mô ma ghɨ ti khɨŋtì nì mwə̀lû ma ghɨ fati nì kaha, ghâtu tɨntu kûmà te wulu nyamsu kwaŋsu wu yu afa su gûfà chyaksu su dô kə ni, nyɨŋa shika yi woŋ.

¹⁰Su ndùku kəta tù kpèn tu tale kə te nyak mù chyə̂, fê kəta kəbi sù chyâk. Jyaka hì mô a tu kpèn mefû kpenê hi chə̀bhè wut na wù yu lûmì a njoŋ sù tân.

¹¹Bensu tɨnsu hì kəta fə̀n we a wù saka ghɨna, a mô anjèl ye a yì kəta be ye a yi lye chwo yênà kə yi yên yâ, yet yi wuni mô yi jìs yi Hibùlùs na Àbadòn, mô yi jìs yi Gɨlìs na, Àbolìyòn, yi fôktè na, “Wùt wù Bobhena.”

¹²Yi ni chwùtè na ngə̂k yì shyə ti chyâ, su ti faŋ sù bà hi bèn.

¹³Anjèl à Fùyèn yìlè fî toŋ yi soŋ yi wuni, na à hi mô sù anjèl tufa. Mu yu te jyə̀ fwo a tu bûlà tù kìk te tu mô a baŋ yi fo afa a ghɨ fate nì gûl yâ. Baŋ atɨ̂na mô a Yènfù ashyə̂.

¹⁴Jyə̀ àtɨ̂n jis ha anjèl à Fùyèn yìlè ye a yì ndùku kəta soŋi, bênà a sule se yi bàm sù tân yâ na, “Ghàn yenti anjèlsu Fùyèn se sù kìk a ghɨ kwuta ghaŋta a jwô yì chìk afa a ghɨ toŋte na, Yufelèt yâ.”

¹⁵Ghɨ yêntì anjèlsu Fùyèn mu sê sù kìk beka yu ndùku mô ma wu ti kpên, tuk mù kpên, njoŋ nì lɨ̂mà boŋ kpên shyəma ghɨ ywi wùt wù mòk wù mòk fùtɨ̂n à ghɨt à tât a mbyî.

¹⁶Ghɨ fôktì ha mu na nôn à sù sojà ghe a ghɨ nyiŋa a tû sù nyàm mò malàmsù yi ghə yì bà.

¹⁷À hì mô gha mi ye a yi fwo a mu yi kə̀k ni te yi fwo a jem, mu yen nyamsu kwaŋsu, ghɨta nyɨŋa a tô àtɨ̂n, kəta khə̀ksù wòŋ su, su bâŋà kə te wu wus, nyimà yê ni te mkân, fê mô yê te yì ngòm yi baŋani. Tû sù nyam mu we kə̂kà te tu sù bìkəm, wusu nì lɨkfu nì kànû fwo a sinsu yi jwô.

¹⁸Ngəksu be mu sîn sù tât, a su tì fwo nyàm sina yi jwô tî ywî wùt wù mòk atɨ̂n à ghɨ̀t afân à tât. À ndùku mô ni wusu nì lɨkfu nì kànû fwo kəbi nyàm se yi jwô.

¹⁹Jyak a nyam se hì mô yi jwô fê mô kəbi a tù kpèn. Kpèn tu tɨntu mô te sù ywô, kəta wu tû, ghɨna lemhe ghɨta nì kpèn tu ghɨna tu.

²⁰Ghɨt ale ghe a ngəksu bəma se tì faŋa hi ywite ghɨna yâ, tê kahe jə̀ təm a ghɨna a ghɨna sùbe. Ghɨna faŋ hì ngumle kə deblìsu nì mosò me a ghɨ fate nì gûl yâ nì silfà nì kaha ale, ghɨ bâŋà yi baŋ, ghɨ fate wule nì te, nì kàkû a mô mu mwə yena wi luktu, ywo wi gha, gbê wi.

²¹Ghɨna tê bɨ̀nhì nâbi təm a ghɨna a ghɨna sùbe beka ghɨna ndùku ywite ghɨta, nê a gha a fintena, chyə nì ywena makə ghe lɨmànà, a kəta wi ghɨna fê chwoŋâ.