Read Bunama Loma 9 Bible Online

Loma 9 - Bunama bible

Loma 9

¹Ciyagwao, geya yaꞌabo, nuwagu ꞌigala moisa ꞌigu susuwao meIsileli weyahidi, ma tuta mabwaiyana ꞌategu ꞌimuyamuya weyahidi, weyahina Keliso geya sida hemisaeya. Cigu gwae bewa Keliso ma Yaluyaluwana Tabuna sisanasanapu ꞌabehega yagwaegwae moisa.

³Ma weyahidi yanuwanuwatuhu madouna ꞌeguma togidega ma Yehoba ꞌina helauina ꞌiꞌebwaegauwa, beno Yesu Keliso, ꞌoiguwega ꞌiꞌewa ma ꞌiꞌebwaedi ꞌigu bodaedi, ma taugu ꞌana mwau yaloba, taudi weyahidi.

⁴Ta moisa ꞌigu bodaedi beno mwalo Yehoba ꞌihesinuwa pwaidiya ta ꞌiꞌahwa natunediya. Cina wasawasa ma ꞌina gwae hemisao eema ꞌina loinao bwebweꞌadi ꞌiꞌebwaediya. Ma wete tapwalolo ta ginaula ꞌausaladi ꞌigwae hemisaeya babada nugenugetadi ꞌoidiya. Taudi gide Ebalahamo ma Aisake ma Yakobo, eeta muliyetega Ebalahamo ꞌina susuina ꞌoinega Keliso ꞌilatuma. Tauna Yehobaina tahepwatuwe tuta mabwaiyana ꞌoidiya, ꞌiboi ꞌihane hedadeya. Emeni.

⁶Yehoba ꞌina gwaeyedi bewa geya ꞌehetete, ma hesiyage huwaina ꞌiꞌabihelatuya susu Isileli moisa ꞌoidiya, ta geya wete susu Isileli mabwaiyadi ꞌoidiya, ma tuwa hesihesinuwadimo.

⁷Ta ꞌana moisa beno Ebalahamo ꞌina susuwao mabwaiyadi Yehoba geya ꞌida ꞌahwa natunedi, weyahina Yehoba Ebalahamo ꞌihegwae pwaiya, ꞌigwaeya,“Cino susuwao beno natuina Aisake natunao,” ma geya wete taiyawedi tasina natunao ꞌoidiyega.

⁸Gwae bewa ꞌana sanapu ꞌiheꞌita pwaigita moisa, beno Yehoba natunao geya Ebalahamo ꞌina susu ꞌoinega, ma hesiyage taiyawedi taudi Yehoba ꞌigwae hemisaediya.

⁹Weyahina mwalo Yehoba Ebalahamo ꞌoina ꞌigwae hemisa, ꞌigwaeya,“Cabwa tuta yahesinuwaneya matada ꞌoina yahilama ma natuu loheyana yaꞌebwaego mwaneu Sela ꞌoinega.”

¹⁰Ta gide wete tubumai Aisake ꞌiheloheya ma Libeka ꞌihaiya, ta natudiyao didiluwaluwa ꞌiꞌelagatediya, ta ꞌabwa ꞌina tuta ꞌahalaina ma Yehoba Libekaina ꞌihegwaeya, ꞌigwaeya,“Ceguma natumwaowedi ꞌuhenatunedi, ꞌalomau ꞌabwa tolenugetainaina ꞌiloinae.” Eeta bewa Yakobo ma Iso* ꞌoidiyega tasanapu bwaibwainiya ꞌabehega gwagwamaidiyedi geya ꞌidi paihowa bwebweꞌana nuwana galana ꞌoidiyega ꞌihesinuwedi, ma hesi ꞌiboi ꞌina gwae hemisa ꞌoinega. Weyahina Yehoba ꞌihesihesinuwa geya tomota ꞌidi paihowega ma hesi ꞌiboinamo ꞌina nuwatuhuwega.

¹³Yehoba gide wete ꞌihepwaila ꞌina Bukiya ꞌigwaeya,“Yakobo yahelauweya madouna, geya Iso.”

¹⁴Cabwa toꞌaha hede nata tagwaene Yehoba ꞌina paihowa bewa gidemusa, galana bo geya? Geya galana!

¹⁵Weyahina Mosese ꞌina loina ꞌoina Yehoba ꞌigwaeya,“Ceguma taiya nuwanuwagu yahelauwe nata yahelauwe, ma ꞌeguma taiya wete yaꞌatemuyamuyae, nata wete yaꞌabihete.”

¹⁶Ma bewa ꞌiheꞌitegita ꞌabehega Yehoba ꞌina helau geya ꞌida latu daitama tauda ꞌida nuwatuhuwao nuwana paihowao ꞌoidiyega, ma hesiyage tauna tuwa ꞌina ꞌatemuyemuyega.

¹⁷Ma bewa wete ꞌaigeda ꞌebeꞌita Pelo* ꞌoinega, weyahina mwalo Yehoba ꞌina gwae Peloina weyahina, ꞌigwaeya,“Cebe loina yaꞌebwae pwaigowa ꞌabehega ꞌuloꞌalehegau, eema ꞌane taugu ꞌigu waiwai ꞌuꞌita, eema ꞌane sanigu ꞌiꞌedadana baleꞌu mabwaiyana ꞌoina.”

¹⁸Eeta, ꞌeguma Yehoba nuwanuwana taiya ꞌihelauwe, nata ꞌihelauwe tuwa, ma ꞌeguma nuwanuwana wete taiya ꞌiꞌabihedeba paꞌali, nata tuwa ꞌideba paꞌala sehe. Yehoba ꞌina gamwasowala ma ꞌina ꞌatemuyamuya

¹⁹Nuwana tupwami nuwatuhu bewa weyahina wanuwanuwatuhu ꞌabehega ꞌeguma mabwaiyada mumugadaina Yehoba ꞌina hesinuwega, toꞌaha hede weyahina ꞌiheꞌewegita?

²⁰Ciyagwao, tauda geya ꞌilobwainegita ma Yehoba ꞌoina tagwae hila, eema ꞌebeꞌita gide towalataꞌabi, ꞌaigeda tuta loheyainaina walata ꞌiꞌabidiya, ma ꞌaigeda walataina ꞌihegwaeya toꞌabiina, ꞌigwaeya, “Toꞌaha weyahina geya ꞌuꞌabigau gide ꞌiyaguina?”

²¹Ta ꞌana dumwalu hesi beno toꞌabiina ꞌiboi ꞌina ꞌabi ꞌiloinae, ꞌeguma nuwanuwana baleꞌu ꞌaigedaina ꞌoinega walata ꞌeluwa ꞌiꞌabidi, ma ꞌaigeda ꞌana ꞌita ꞌausalana, ta ꞌaigedaina geya. Bewa bwebweꞌana!

²²Ta Yehoba wete gidemusa ꞌina paihowa ꞌiboi ꞌiloinae, weyahina tuta mabwaiyana togala ꞌoidiya ꞌiheꞌalamaꞌiꞌita madouna ꞌabehega ꞌidi pui weyahina sahena ꞌida hemahemaisedi, ma tuwa geya sida hematamataneya, ma ꞌinuwatuhuwa ꞌabehega sowasowana tuwa ꞌiloinaedi, ꞌina gamwasowala ta ꞌina waiwai matadiyega siꞌita.

²³Ma nuwanuwana wete ꞌina wasawasaedi mwalo ꞌiꞌatububudiya tauda ꞌihelauwegita weyahida, ꞌiheꞌitae.

²⁴Coinega boda ꞌeluwa ꞌoidiyega ꞌibwauwegita, tauma boda Yudiya ma ꞌomi tomiya ganamuli.

²⁵Gidemusa palopita Hoseya ꞌina bukiya ꞌihepwaila, ꞌigwaeya,“Tomotaiyedi taudi geya ꞌigu bodao taudi nata yabwauwedima ꞌigu boda ꞌoina siluhuma, weyahina mwalo taudi geya ꞌigu helau ꞌalona sida miya, ma bewa tuta yahelauwediya.

²⁶Mwalo Yehoba ꞌihegwaediya, ꞌigwaeya, ‘Comi geya ꞌigu bodao’, nata bewa sibuihila ta sibwauwedi, sigwae, ‘Taudi Yehoba miyamiya hatayana natunao.’ ”

²⁷Aiseya gidemusa wete meIsileli weyahidi ꞌigwaeya,“Cabwa, susu Isileli sihenatuna yadayada gide namonamowedi hola lasalasa, ma ꞌiyamo ꞌoidiyega nata tupwatupwadimo Yehoba ꞌiꞌetolemedi.

²⁸Weyahina Yehoba nuwanuwana gogo gabulena mabwaiyana ꞌiloina mwamwayauwe.”

²⁹Ma Aiseya wete gide ꞌina hepwaila ꞌigwaeya,“Yehoba ꞌiboimo Tohewaiwai, ꞌoinega ꞌeguma geya ꞌeta ꞌina boda tupwatupwadi ꞌiꞌatemuyamuyaedi, nata mabwaiyada ꞌilamanigita, gide ꞌaneyage Sodoma* ma Gomola*, mabwaiyadi ꞌimutudiya.” MeIsileli geya sihemisa

³⁰Bewa ꞌoinega tasanapu ꞌabehega taudi tomiya ganamuli geya sitohotoho ma Yehoba ꞌiꞌahwa dumwaluwedi, ma hesi ꞌidi hemisa tuwa ꞌoinega ꞌiꞌahwa dumwaluwediya.

³¹Ma Isileliyedi hesiyage siꞌaiꞌaipate ma ꞌabehega loina ꞌana muliya ꞌoinega Yehoba ꞌiꞌahwa dumwaluwedi, ta siꞌaipate ꞌasaya.

³²Taudi ꞌidi nuwatuhu ꞌabehega ꞌidi paihowa weyahina Yehoba ꞌiꞌahwa dumwaluwedi, ma geya sihemisa ꞌoina, eeta beno ꞌidi pui gidemusa daꞌule ꞌoina sihetupediya.

³³Ma Yehoba ꞌina Buki ꞌoina daꞌule ꞌebe tupaina weyahina ꞌihepwaila, ꞌigwaeya,“Waꞌitayahi bwaibwainigomi, weyahina daꞌuleina nata Saiyoni ꞌoina yalagu, ma tomota nata ꞌoina situpa ma sibeꞌu, ma ꞌeguma taiyawedi tauna tuwa daꞌuleinaina sihemisaeya nata geyaꞌabwa siweꞌaweꞌa.”