Read Bunama 1 Tesalonaika 5 Bible Online

1 Tesalonaika 5 - Bunama bible

1 Tesalonaika 5

¹Ciyamayao, geya sowasowahina ma ꞌimi leta bewa ꞌoinega ꞌahegwaegomi to tuta ꞌoina Kelisoina ꞌihilama,

²weyahina boꞌi wasanapuya, ꞌabehega geya tasanapu, ma hesi ꞌina tauyama ꞌabwa gide toyagaha ꞌina tauyama gide nihuwanega,

³ma ꞌeguma tomota sigwae, “Cida miya mabwaiyana bwebweꞌana tuwa,” ma muliyetega hesilae taudi ꞌilohesalutuidi, gide wahine ꞌina ꞌabihelolo ꞌina henatuna ꞌoina. Coinega nage gide hesilaeina, ma geya sowasowahina sidenasine.

⁴Ma ꞌiyamayao ꞌomi geya tupwa guguyou ꞌoina wamiyamiya, ꞌoinega Bada ꞌabwa ꞌina hilama sahena waꞌateꞌateyoho, ma hesi guguyou ꞌana tomiyanao ꞌiloheꞌateyohodi, gide tuwa toyagaha.

⁵Weyahina ꞌomi maedana ꞌoina wamiyamiya, ꞌoinega maedanega tatauya, ma sahena guguyou ꞌina ꞌedega.

⁶Coinega sahena taꞌenoꞌeno, gide tomota mabwaiyadi siꞌenoꞌeno ꞌesa, ma hesi Yesu tayamwayamwa ꞌida nuwatuhu dumwalunega.

⁷Ma sahena tauda gide taudi tomataꞌenoꞌeno, ma bwasi galana ꞌana tonumao, taudi guguyou ꞌidi ꞌebepaihowa.

⁸Ma tauda hesi gide ꞌasiꞌasilalada, ꞌoinega taboi taꞌitayahigita, ma yaluyaluwada tahabodebode, Yehoba ꞌana hemisa ma ꞌana helau ꞌoidiyega, ma wete ꞌida nuwatuhuyahi ꞌada ꞌabihetena ꞌabwa taloba ꞌoinega.

⁹Weyahina Yehoba geya ꞌabehega ꞌiloinegita ma tatauya ꞌebeyatala ꞌoina, ma hesi nuwanuwana ꞌida Bada Yesu Keliso ꞌina paihowega ꞌiꞌabihetegita.

¹⁰Coinega Kelisoina weyahida ꞌiꞌamasa, ma nuwana mayawasida bo ꞌamaꞌamasida, ta ꞌeguma ꞌihilama ꞌiꞌewegita ma baꞌidada tamiya hataya.

¹¹Coinega ꞌilobwainegomiya ma waboi waꞌabihepaꞌali hilegomi ma wete wahelemalema hilegomi, beno paihowaedi gide sauga bewa wapaipaihowa ꞌesedi. Cina ꞌebegumwala

¹²Ciyamayao, ꞌima ꞌahwanoi ꞌoimiya sowasowana ꞌimi tohanugetao waheꞌasisiyanedi, ma wahelau bwaibwainidi, weyahina ꞌida Bada ꞌina paihowa sipaipaihowa, beno siꞌitaꞌita yahigomi ma siloguloguguya ꞌoimiya. Ma wete ꞌaigeda, sahena heꞌahwa lasalasa, ma hesi daumwalega wamiyamiya.

¹⁴Ma ꞌiyamayao, sowasowana wete tolowahiꞌwatao walohatotodi, wete toꞌateyoho waꞌabihe ꞌatepatuwedi, ma wete toweꞌa waꞌabihetedi, bewa ginaulaedi ꞌalamaꞌiꞌitega wapaipaihowadi.

¹⁵Waꞌitayahigomi, sahena ꞌeta ꞌoimiyega galana ꞌihehemaise galana ꞌoinega, ma hesi tuta mabwaiyana wahelau hilegomi ma waꞌabihetena ma wete tomota hagadi waꞌabihetedi.

¹⁶Wayaliyaya tuta mabwaiyana.

¹⁷Wete gide ꞌahwanoi Yehoba ꞌoina sahena walololagu.

¹⁸Ma wete tuta mabwaiyana waloyauwedo Yehoba ꞌoina, ꞌeguma ꞌimi miya bwebweꞌadi ꞌoidiya ma wete miya galadi ꞌoidiya, ꞌimi yaliyayaina beno Yehoba ꞌina nuwatuhu, tauda Yesu Keliso ꞌina bodao weyahida.

¹⁹Ma sahena Yaluyaluwa Tabuna ꞌina paihowa waꞌetoꞌetobode.

²⁰Coinega ꞌeguma toguguya ꞌeta ꞌipalopisai*, sahena ꞌina gwae nugeta walologwahate,

²¹ma hesi gwaeina watoho, ma ꞌeguma bwebweꞌana waꞌabiyahi,

²²ma ꞌeguma galana beno mabwaiyana walogwahate.

²³Yehoba tauna daumwala huhuna, ꞌoinega yaluyaluwami ta nuwami ta wahimi ꞌiꞌabiheꞌehau bwaibwainidi ma siꞌasilala, ma ꞌane mumugami bwebweꞌana wamiyamiya ꞌana siga Yesu Keliso ꞌihilama.

²⁴Yehobaina ꞌihesinuwegomiya, tauna maꞌana hemisa, eeta toꞌaha ꞌihegwaegita, nata ꞌipaihowa.

²⁵Ciyamayao, waꞌahwanoi weyahima Yehoba ꞌoina.

²⁶Ma wete tohekalesiyao mabwaiyadi helauwega waꞌatusapwala hiledi.

²⁷Ta yaloinaegomi Yehoba saninega leta bewa wahasili ꞌiyadao matadiya.

²⁸Cida Bada Yesu Keliso ꞌina helau ꞌoimiya.Taugu Paulo.