Read Bunama Ibeliu 1 Bible Online

Ibeliu 1 - Bunama bible

Ibeliu 1

¹Mwalohene hali tuta ma hali tuta ꞌoidiya, ta nuwatuhu baibaiwana ꞌoidiyega Yehoba ꞌina gwae palopitao ꞌiꞌebwaediya, ta taudi sihepwaileya tubudao ꞌoidiya.

²Ma ꞌebelosaloha tauda ꞌida tuta ꞌina gwaeyao ꞌihepwailediya ꞌoida natuna ꞌoinega. Yehoba natunaina ꞌihesinuweya, ma ꞌabehega ginaula mabwaiyadi ꞌoidiya ꞌihetoloina, ta mwalohene natunaina baꞌidana ginaula mabwaiyana sihemasalehediya.

³Ma Yehoba natunaina tamana ꞌina ꞌasilala ꞌiꞌasiꞌasilalae ta tauna Yehoba ꞌana ꞌoleya gide. Ma ꞌina gwae waiwaina ꞌoinega ginaula mabwaiyana galewa ma baleꞌuwa ꞌiꞌabiꞌabi yahidi. Ma ꞌida puiyao ꞌoidiyega ꞌibuyogita ma muliyetega ꞌimiyatoiya Yehoba Tomiyahane hedade ꞌina ꞌebeulanega.

⁴Tauna aneloseyao ꞌimiyahane sinediya, ma saninaina Yehoba ꞌiꞌebwaeya anelose sanidiyao ꞌimadou sinediya.

⁵Weyahina geya ꞌeta tuta Yehoba anelose ꞌeta ꞌoina ꞌida gwae,“Cowa natugu, nige boꞌi yaꞌahwa natunegowa.” Geya wete anelose ꞌeta weyahina ꞌida gwae,“Taugu ꞌoiguwa ꞌida ꞌahwatamana, ma tauna ꞌoina yada ꞌahwanatuna.” Gwaeyedi bewa natunamo weyahina ꞌigwaenediya.

⁶Ma tutaina ꞌina tautuwa ꞌihesumaneyama baleꞌuwa, ꞌigwaeya,“Aneloseyao galewa sawasawahidi ma tauna ꞌoina siꞌetuluha.”

⁷Ma hesi aneloseyao weyahidi ꞌina gwae hagana, ꞌigwaeya,“Yehoba ꞌina aneloseyao ꞌihemasalehediya, ꞌoinega ꞌidi tauya gide yaumai, ma ꞌina topaihowaedi gide ꞌaiwe ninima.”

⁸Ma hesi natunaina weyahina ꞌigwaeya,“Cowa Yehoba maꞌino loina dumwaluna nata ꞌuloina hataya.

⁹Mumuga bwebweꞌana nuwau ꞌiꞌeweya ma galana ꞌa didiga. Coinega ꞌino Yehoba boꞌi ꞌiheholoigowa yaliyaya moisa ꞌoinega, ta ꞌino yaliyaya ꞌiyamwao ꞌidi yaliyaya ꞌimadou sinediya.”

¹⁰Ma ꞌaigeda wete ꞌina gwae natunaina ꞌoina ꞌigwaeya,“Bada yo, tuta nugeta ꞌoina baleꞌu ꞌuhemasaleheya ma nimauwega galewa ꞌupaihoweya.

¹¹Ginaulaedi ꞌabwa silohesa hesawala ma ꞌowa ꞌumiyamiya, ma ginaula mabwaiyadi sihemiyamiya gide ꞌwama,

¹²ma ꞌunupilidi gide ꞌaleꞌo, ta ꞌadi ꞌita ꞌiꞌegibui, ma ꞌowa geyaꞌabwa ꞌugibugibuigo ta hesi ꞌumiya hataya.”

¹³Ma hesi, Yehoba geya ꞌaigeda wete anelose ꞌoina ꞌida gwae,“Cigu ꞌebeulega ꞌumiyatoi ma ꞌana siga ꞌa ꞌalehao yalagu dobihedi ꞌaeu gabulena.” Ma bewa gwaeina natunamo ꞌoina ꞌigwaeneya.

¹⁴Ta anelose taudi yaluyaluwa tuwa ma tohalewasa, taudi Yehoba ꞌilagudiya ta ꞌabehega siꞌabihetegita tauda taiyawedi ꞌeguma ꞌabihetena weyahina ꞌihesinuwanegita.