Read Bunama Ibeliu 3 Bible Online

Ibeliu 3 - Bunama bible

Ibeliu 3

¹Ciyagwao, ꞌomi ma taugu Yehoba ꞌihesinuwegita ꞌina tupwa weyahina, ꞌilobwaineya ma Yesu tanuwatuhuyahi, weyahina tauna ꞌida tapwalolo ꞌana tohepwaila ta wete ꞌida topwaoli madouna,

²ta ꞌihetapeweya ꞌina paihowaina Yehoba ꞌiꞌebwaeya, gide mwalona Mosese* ꞌihehetapewa ꞌesa Yehoba ꞌina hada ꞌoina.

³Coinega Yesu hepwatu madouna ꞌilobeya, ta Mosese ꞌana hepwatu tupwanamo tuwa, hesi gide tuwa hada bwebweꞌana, geya hene hepwatu madouna ꞌida lobeya, ma hesi ꞌana toꞌabi. Ta Moseseina gide hada, ta Yesu toꞌabi.

⁴Moisa, hada ꞌaigeda ꞌaigeda ꞌadi toꞌabi simiyamiya, ta ginaula mabwaiyadi ꞌadi topaihowa Yehoba.

⁵Moseseina Yehoba ꞌina hada ꞌihehetapewa, topaihowa gide, ta Yehoba ꞌina gwaeyao ginaulaedi ꞌabwa silatu weyahidi ꞌihepwaila latuhediya.

⁶Ma ꞌiyamo Keliso Yehoba ꞌina hada ꞌihetapewa, geya topaihowa gide, ta hesi tauna natuna moisa. Tauda taboi Yehoba ꞌina hadaina tuwa, ꞌeguma tahemisa hataya maꞌida ꞌatepatu ta maꞌida yaliyaya. Yehoba ꞌana bodao taheꞌaiyawasi

⁷Coinega Yaluyaluwa Tabuna ꞌihegwaegita ꞌigwaeya,“Nata, ꞌeguma ꞌenana wahesagohe,

⁸sahena wadebadeba paꞌala gide tubumiyao mwalo hene yoho ꞌawawa ꞌoina sitohogauwa ta ꞌigu loina silogwahatediya.

⁹Weyahina bolime poti ꞌoidiya ꞌigu paihowa waiwaidi baibaiwadi siꞌitediya, ta tubumiyaowedi ꞌidi lomugiyega sitohogauwa ta weyahidi yaꞌalaꞌiꞌiwasa, ta yagwaeya, ‘Tuta mabwaiyana taudi ꞌidi nuwatuhuwega sitautauya pui, weyahina ꞌigu ꞌeda geya sisanapu.’

¹¹Coinega yagamwasowalediya ta yaloina paꞌalediya, yagwaeya, ‘Sahena wete ꞌigu ꞌebe ꞌaiyawasi ꞌoina siluhuluhu.’ ”

¹²Ciyagwao, waꞌitayahigomi ma sahena wadebadeba paꞌala nuwana walolopui, ꞌamuge ta Yehoba mayawasina wamiyasine.

¹³Ma bewa tuwa waboimimo wahelemalema sabwelo ꞌaigeda ꞌaigeda ꞌoidiya, ta ꞌoinega sahena mumuga galana ꞌiꞌabowegomi ta Yehoba ꞌenana walogwahate.

¹⁴Tauda mwalo ꞌida hemisa Keliso ꞌoina talaguya, ma ꞌeguma ꞌida hemisaina taꞌabiyahi bwaibwaini ma ꞌana siga tuta ꞌana ꞌebelosaloha ꞌoina, Keliso baꞌidadai tayaliyaya mahemahetena.

¹⁵Gide Buki Heꞌasisi ꞌina gwae ꞌigwaeya,“Nata ꞌeguma Yehoba ꞌenana wahesagohedi, sahena wadebadeba paꞌala gide tubumiyao mwalohene ꞌigu loina silogwahateya.”

¹⁶Taiyawedi Yehoba ꞌina gwae sihesagoheya ta silogwahateya? Taudi Mosese Itipita ꞌoinega ꞌihanugetediya ta silatuma, ꞌawa?

¹⁷Taudi weteyage bolime poti ꞌoidiya ꞌidi mumuga galadi weyahidi Yehoba ꞌiꞌalaꞌiꞌiwasa, ꞌoinega togalaedi yoho ꞌawawa siꞌamaꞌamasa hegumwala.

¹⁸Weyahina taudi ꞌina gwae geya simuliye, ꞌoinega ꞌadi gwae ꞌigwaeya,“Geyaꞌabwa wete ꞌigu ꞌebeꞌaiyawasi ꞌoina siluhuluhu.”

¹⁹Coinega tasanasanapu ꞌabehega taudi geya sida luhuwa, weyahina geya sihemisa.