Read CHUYA QELLQA La Biblia en Quechua de Ayacucho 2012 Génesis 1 Bible Online

Génesis 1 - CHUYA QELLQA La Biblia en Quechua de Ayacucho 2012 bible

Génesis 1

¹Tukuy imapa qallariyninpiqa Diosmi unancharqa hanaq pachatawan kay pachata.

²Kay pacham mana imayuq hatun chaqwa karqa, tutayaypa pampasqan uku-uku lamar qocham karqa, Diospa Espiritunñataqmi yakukunapa hawanpi muyurqa.

³Diosmi nirqa: Achkiy kachun, nispa. Hinaptinmi achkiy karqa.

⁴Diosmi chay achkiyta allin kasqanta qawarqa hinaspam tutayaymanta chay achkiyta rakirqa,

⁵chay achkiytam “punchaw” nispa suticharqa, tutayaytañataq “tutawan”. Hinaptinmi tardeykuqmanta paqarinnintin tardeykuqkama punta kaq punchaw karqa.

⁶Chaymantam Dios nirqa: “Yakukuna rakinaq vacío kachun, chaynapi yakukuna rakinasqa kananpaq”, nispa.

⁷Diosmi ruwarqa yaku rakinaq vaciota, hinaspam vaciopa ukunpi kaq yakuta rakirqa vaciopa hawanpi kaq yakukunamanta. Hinaptinmi chayna karqa.

⁸Yakukuna rakinaq vaciotam Dios suticharqa cielowan. Hinaptinmi tardeykuqmanta paqarinnintin tardeykuqkama iskay kaq punchaw karqa.

⁹Chaymantam Dios nirqa: Cielopa ukunpi yakukuna huk hawaqllaman huñunakuptin chaki allpa rikurichun, nispa. Hinaptinmi chayna karqa.

¹⁰Diosmi chaki kaqta “allpa” nispa suticharqa, huñunasqa yakukunatañataqmi “lamar qochawan” suticharqa. Chaykuna allin kasqanta qawaspanmi

¹¹Dios nirqa: Allpamanta tukuy rikchaq plantakuna wiñamuchun: Qorakuna, tukuy rikchaq sachakuna, rurunpitaq murun kachun; sapakama muhunman chaynataq murunman hina, nispa. Hinaptinmi chayna karqa.

¹²Allpamantam wiñamurqa tukuy rikchaq qorakuna sapakama rurunman hina muhuyuq, chaynataqmi ruruq sachakunapas sapakama rurunman hina muruyuq. Chaymi allin kasqanta Dios qawarqa.

¹³Hinaptinmi tardeykuqmanta paqarinnintin tardeykuqkama kimsa kaq punchaw karqa.

¹⁴Chaymantam Dios nirqa: Cielopi rikurichun punchawtawan tutata rakinaq achkiqkuna, chaynapi watakuna, killakuna hinaspa punchawkuna kananpaq.

¹⁵Chaykunayá cielomanta kay pachata kanchamuchun, nispa. Hinaptinmi chayna karqa.

¹⁶Hinaspanmi Dios iskay hatun achkiqkunata unancharqa: Hatun kaqtam punchawpi achkinanpaq, taksa kaqtañataq tutapi achkinanpaq. Unancharqataqmi chaskakunatapas.

¹⁷Chaykunatam Dios churarqa cielomanta kay pachata kanchamuspa

¹⁸punchawpipas tutapipas munaychakunankupaq hinaspa tutatapas punchawmanta rakinanpaq. Diosmi chaykuna allin kasqanta qawarqa.

¹⁹Hinaptinmi tardeykuqmanta paqarinnintin tardeykuqkama tawa kaq punchaw karqa.

²⁰Chaymantam Dios nirqa: Yakukunapi paqarichun tukuy rikchaq animalkuna, paqarimuchuntaq kay pachapi alton pawaq animalkunapas, nispa.

²¹Diosmi unancharqa yakupi kaq hatun animalkunata, chaynallataq castanman hina qasqonpa puriq tukuy rikchaq urukunatapas, unancharqataqmi alton pawaq animalkunatapas castanman hina. Chaykunatam Dios qawarqa allin kasqanta.

²²Tukuy chaykunata bendecispanmi Dios nirqa: Anchallataña miraspa lamar qochapi yakukunaman huntaychik, mirachuntaq kay pachapi alton pawaq animalkunapas, nispa.

²³Hinaptinmi tardeykuqmanta paqarinnintin tardeykuqkama pichqa kaq punchaw karqa.

²⁴Chaymantam Dios nirqa: Allpamanta paqarimuchun castanman hina tukuy rikchaq animalkuna, uywa animalkuna, qasqonpa puriq urukuna, tukuy rikchaq purun animalkunapas, nispa. Hinaptinmi chayna karqa.

²⁵Diosmi unancharqa castanman hina: Purun animalkunata, uywa animalkunata hinaspa qasqonpa puriq urukunatapas. Diosmi qawarqa chaykuna allin kasqanta.

²⁶Chaymantam Dios nirqa: Runata ruwasun ñoqanchikman rikchakuqta, ñoqanchik kaqllata; challwakunapi, alton pawaq animalkunapi, qasqonpa puriq urukunapi chaynallataq tukuy rikchaq animalkunapi munaychakunanpaq, nispa.

²⁷ Diosmi runata unancharqa kikinman rikchakuqta, qaritawan warmitam unancharqa.

²⁸Paykunata bendecispanmi Dios nirqa: Anchata miraspa kay pachaman huntaychik, hinaspa munaychakuychik challwakunapi, alton pawaq animalkunapi, qasqonpa puriq urukunapi, tukuy rikchaq animalkunapipas, nispa.

²⁹Chaymantam Dios nirqa: Kay pachapi muhuyuq llapallan plantakunatawan muruyuq sachakunatam mikunaykichikpaq qoykichik.

³⁰Alton pawaq animalkunaman, qasqonpa puriq urukunaman hinaspa tukuy rikchaq animalkunamanñataqmi mikunankupaq pastokunata qoni, nispa. Hinaptinmi chayna karqa.

³¹Diosmi qawarqa unanchasqankunaqa llumpay allin kasqanta. Chaymi tardeykuqmanta paqarinnintin tardeykuqkama soqta kaq punchaw karqa.