Read CHUYA QELLQA La Biblia en Quechua de Ayacucho 2012 Génesis 16 Bible Online

Génesis 16 - CHUYA QELLQA La Biblia en Quechua de Ayacucho 2012 bible

Génesis 16

¹Abrampa warmin Saraiqa qolluqmi karqa. Paypam karqa Egiptomanta kaq Agar sutiyuq esclavan.

²Chaymi Abramta Saraí nirqa: Mana wachakuqta Tayta Dios ruwawasqanraykum mañakuyki esclavaywan puñunaykipaq, icharaqpas paymantaña wawaykuna kanman, nispa. Hinaptinmi Saraipa nisqanta Abram kasurqa.

³Chunka wataña Canaán allpapi yachachkaptinkum Saraiqa Egiptomanta kaq esclavan Agarta Abramman warmin kananpaq qoykurqa.

⁴Chaymi Agarqa Abrampa churinta wiksayakuruspan patronan Saraita despreciowan qawarqa.

⁵Hinaptinmi Abramta Saraí nirqa: Qanmi huchayuq kanki kay esclavay kayna qawawananpaq, qanman qoykuptiymi wiksayakuruspan despreciowan qawawachkan. Tayta Diosyá juzgawasun qamtawan ñoqata, nispa.

⁶Abramñataqmi nirqa: Kayqaya esclavaykiqa makikipi, munasqaykitayá paywan ruway, nispa. Chaymi Saraiqa Agarta ñakarichiyta qallaykurqa hinaptinmi qayllanmanta lluptikurqa.

⁷Lluptikuspanmi chunniqpi pukyuman chayarurqa, chay pukyum Shur lawman riq ñanpi tarikun. Chaypi kachkaptinmi Diospa angelnin tariykurqa,

⁸hinaspam nirqa: Saraipa esclavan Agar ¿Maymantataq hamuchkanki? ¿Maymantaq richkanki? nispa. Agarñataqmi nirqa: Patronay Saraipa qayllanmantam ayqekuchkani, nispa.

⁹Chaymi Tayta Diospa angelnin nirqa: Patronaykipa qayllanman kutiy hinaspa humillakuspa kasukuy.

¹⁰Miraynikikunatam mirachisaq, nana-nanaq kasqankuraykum mana yupay atina kanqaku.

¹¹Wiksayuqmi kachkanki, qari wawata wachakuspaykim [15]Ismaelwan sutichanki. Waqasqaykitam Tayta Dios uyarirusunki.

¹²Ismaelqa mana mansasqa purun asno hinam kanqa, lliwpa contranpim sayarinqa, llapa runakunataqmi paypa contranpi hatarinqaku, wawqenkuna cheqnichkaptinpas paykunapa qayllanpim yachanqa, nispa.

¹³Rimapayaqnin Tayta Diostam Agar suticharqa: Qamqa “Rikuqniy Diosmi” kanki, nispan. Agarqa nirqataqmi: Diosta rikuruchkaspaypas kawsachkaniraqmi, nispa.

¹⁴Chayraykum chay pozota suticharqa: “Rikuwaqniy kawsaq Diospa pozon” nispa. Chay pozoqa Cades llaqtamanta Bered llaqtaman riq ñanpim kachkan.

¹⁵Agarmi wachakururqa Abrampa churinta, hinaptinmi Abramqa Ismaelwan suticharqa.

¹⁶Abram pusaq chunka soqtayuq watanpi kachkaptinmi Ismaelta Agar wachakurqa.