Read CHUYA QELLQA La Biblia en Quechua de Ayacucho 2012 Génesis 26 Bible Online

Génesis 26 - CHUYA QELLQA La Biblia en Quechua de Ayacucho 2012 bible

Génesis 26

¹Chay punchawkunapim muchuy karqa yaqa Abrahampa tiemponpi hinaraq, chaymi Isaacqa ripukurqa filisteokunapa reynin Abimelecpa kasqan Gerar llaqtaman.

²Chaypim rikuriykuspan Tayta Dios nirqa: Egipto nacionmanqa ama riychu, ñoqapa nisqay allpapi yachay.

³Chaynaqa, kay allpapi mana llaqtayuq hina yachay, ñoqam qanwan kasaq hinaspam bendecisqayki. Qanmanwan miraynikikunamanmi kay allpakunata qosqaykichik, chaynapim taytayki Abrahamman juramento ruwasqayta cumplisaq.

⁴Miraynikikunatam cielopi chaskakunata hinaña mirachisaq, kay allpakunatam miraynikikunaman qosaq. Kay pachapi llapallan nacionkunam miraynikirayku bendecisqa kanqaku.

⁵Chaynaqa, kanqa kunasqaykunata, decretoykunata, kamachikuykunata hinaspa yachachikuyniykunata Abraham kasukusqanraykum, nispa.

⁶Isaacmi Gerar llaqtapi yacharqa.

⁷Chaymi warmin Rebecamanta chay llaqtapi yachaqkuna tapuptinku Isaac nirqa: “Paniymi” nispa, “warmiymi” niyta manchakuspan. Buenamoza kasqanraykum piensarqa: “Warmiywan qepakunankuraykum wañurachiwanqaku”, nispa.

⁸Unayña chaypi yachachkaptinkum filisteokunapa reynin Abimelec ventananmanta rikururqa Isaacqa warmin Rebecata lluchkapayachkaqta.

⁹Chaymi qayachispan Isaacta Abimelec nirqa: Payqa warmikim kasqa, ¿imanasqataq “paniymi” nirqanki? nispay. Isaacñataqmi nirqa: Payraykuchá wañurachiwanqaku nispaymi piensarqani, nispan.

¹⁰Chaymi Abimelec nirqa: ¿Imanasqataq kayta ruwaruwankiku? Qonqaytachá hukkaqnin runaykunapas warmikiwan puñuruspa huchallikurunmanku karqa, nispa.

¹¹Chaynapim Abimelecqa lliw runankunata kamachirqa: Kay qarita otaq warminta pipas imanaqqa wañunqam, nispan.

¹²Isaacmi chay allpapi tarpurqa, hinaspam tarpusqanmanta chay wata cosecharurqa hukllamanta pachak kuti masta, Tayta Dios bendecisqanrayku.

¹³Chaynapim Isaacqa apuyaruspan llumpay kapuqniyuqllaña rikurirurqa.

¹⁴Ovejankuna vacankuna chaynataq serviqninkuna achkallaña kasqanraykum llapa filisteokuna envidiakurqaku.

¹⁵Taytan Abrahampa serviqninkunapa uchkusqan pozokunatam allpawan filisteokuna taparurqaku.

¹⁶Chaymi Isaacta Abimelec nirqa: Huklawman ripukuy, ñoqaykumantapas aswan atiyniyuqmi rikurirunki, nispa.

¹⁷Chaymi Gerar wayqoman Isaac ripukuspan chaypiña yacharqa.

¹⁸Hinas-pam taytan Abrahampa uchkuchisqan pozokunata, otaq Abraham wañukuptin filisteokuna allpawan taparusqankuta Isaac kasqallan kicharachirqa hinaspam taytanpa sutichasqan sutikunawan suticharqa.

¹⁹Huk punchawmi Isaacpa serviqninkuna chay wayqopi uchkuch-kaspanku huk pukyuta tarirurqaku.

²⁰Hinaptinmi Gerar lawpi michiqkunawan Isaacpa michiqninkuna piña-nakurqaku: “Kay yakuqa ñoqaykupam” nispanku. Chaymi chay pozota Isaac suticharqa: [23]“Esek” nispa chaypi piñanakusqankurayku.

²¹Uchkurqakutaqmi huk pozotapas, hinaspam chay pozomantapas pelearurqaku, chayraykum [24]“Sitna” nispa suticharqaku.

²²Chaynapim Isaacqa huklawman anchurikuspan chaypipas huk pozota uchkuchirqa, chaypim ichaqa manaña piñanakurqañachu. Chaymi “Hawkayay pozowan” suticharqa, hinaspam nirqa: Kunanqa Diosmi bendeciykuwanchik kay allpapi achkayananchikpaq, nispa.

²³Chaymantam Beerseba llaqtaman Isaac ripukurqa.

²⁴Chay tutam Tayta Dios rikuriykuspan nirqa: Taytayki Abrahampa Diosninmi kani. Ama manchakuychu qanwanmi kachkani. Ñoqam bendecisqayki, serviqniy Abrahamraykum miraynikikunatapas mirachisaq, nispa.

²⁵Chaymi Isaac huk altarta chaypi perqaspan Tayta Diosta mañakurqa. Chaypim carpantapas sayachirqa, serviqninkunañataqmi huk pozota uchkurqaku.

²⁶Huk punchawmi Gerar llaqtamanta Abimelec hamurqa Isaacwan rimanankupaq. Abimelectam hamuysirqa amistadnin Ahuzat, chaynallataq tropankunapa capitannin Ficol.

²⁷Paykunatam Isaac nirqa: ¿Imamantaq hamurunkichik cheqnispa qarqomusqaykichik runamanqa? nispa.

²⁸Chaymi paykunañataq nirqaku: Yachanikum Tayta Dios qanwan kasqanta, chaymi piensarqaniku juraspa qanwan pacto ruwayta, chay pactoqa kaynam kanqa:

²⁹Ñoqaykuqa manam qamtaqa imanarqaykikuchu, hawkallatataqmi kacharimurqaykikupas; chaynayá qampas ama imanaway-kuchu. Kunanqa Tayta Diospa bendecisqanmi kanki, nispa.

³⁰Chaymi Isaac paykunaman convidaptin mikuspa tomarqaku.

³¹Paqarinnintin tutapayta hatarispam juramentota ruwanakurqaku, chaymantam Isaac aviarurqa, hinaptinmi allinlla kutikurqaku.

³²Hina chay punchawllataqmi Isaacpa serviqninkuna hamuspa kaynata willakurqaku: Uchkusqaykupim yakuta tariruniku, nispanku.

³³Chay pozotam Isaac suticharqa: [25]“Seba” nispa, chayraykum kunankama chay llaqtapa Beerseba sutin.

³⁴Esaumi tawa chunka watayuq kachkaspan Het casta warmikunawan casarakururqa. Paykunam karqaku Beeripa churin Juditwan Elonpa churin Basemat.

³⁵Kay iskaynin warmikunam Isaacpa chaynataq Rebecapa umanta nanachirqaku.