Read CHUYA QELLQA La Biblia en Quechua de Ayacucho 2012 Génesis 27 Bible Online

Génesis 27 - CHUYA QELLQA La Biblia en Quechua de Ayacucho 2012 bible

Génesis 27

¹Isaacmi yuyaqyaruspan rampa-rampallataña qawakurqa, chaymi huk punchaw piwi churinta qayaspan nirqa: Churilláy Esaú, nispa. Esauñataqmi nirqa: ¿Imata taytáy? nispa.

²Hinaptinmi Isaac nirqa: Yuyaqyaruniñam, manam haykapi wañukunaytapas yachakunichu.

³Chaynaqa, flechaykitawan arcoykita aparikuspayá purun animalta hapirapamuway.

⁴Hinaspayá gustawasqan mikuyta ruwarapamuway, mikuykuspay manaraq wañukuchkaspa bendicionniyta qoykunaypaq, nispa.

⁵Rebecañataqmi uyarichkarqa Esauman taytan Isaacpa imakunam nisqanta. Chaymi purun animal hapiq Esaú pasaptin,

⁶wawan Jacobta Rebeca nirqa: Uyariramunim wawqeki Esauman taytaykipa kayna nisqanta:

⁷“Purun animalta hapiramuspa mikuyta yanurapamuway, mikuykuspay manaraq wañuruchkaspa bendicionniyta qoykunaypaq”, niqta.

⁸Chaynaqa, wawalláy, kay kamachisqayta kasuway:

⁹Kanchamanta iskay allinnin chivatochakunata aparamuy, hinaptin taytaykipa gustasqan mikuyta yanuramusaq.

¹⁰Qamñataqmi taytayki mikuykunanpaq apaykunki, manaraq wañukuchkaspa bendeciykusunaykipaq, nispa.

¹¹Chaymi maman Rebecata Jacob nirqa: Wawqey Esauqa pelosapam, ñoqam ichaqa mana pelosapachu kani,

¹²taytay qonqayta llapchaykuwaspa musyaruwaptinchá burlakuqpaq hapiwaptin bendecisqa kanaymantaqa aswan ñakasqa karuyman, nispa.

¹³Hinaptinmi maman nirqa: Sichum ñakasuptikiqa chay ñakaynin ñoqaman chayawachun, qamqa kasuwaspayki ñoqapa nisqayta apamuy, nispa.

¹⁴Chaymi chivatochakunata Jacob aparamuspan mamanman qoykuptin qosanpa gustasqan mikuyta yanuramurqa.

¹⁵Chaymantam Rebecaqa piwi wawan Esaupa waqaychasqan allinnin pachankunata hurqoramuspan Jacobta pacharachirqa.

¹⁶Uña cabrakunapa qaranwanñataqmi matankantawan makinkunata wankirurqa.

¹⁷Hinaspam yanumusqan mikuytawan tantata wawan Jacobman qoykurqa.

¹⁸Chaymi taytanman apaspan Jacob nirqa: Taytáy, nispa. Isaacñataqmi nirqa: ¿Imata? ¿Mayqan churiytaq kachkanki? nispa.

¹⁹Chaymi Jacob nirqa: Ñoqaqa piwi churiki Esaumi kachkani, imam niwasqaykitam ruwaramuni; chaynaqa tiyaykuspayá kay hapimusqay animalmanta mikuy ruwamusqayta mikuykuspa bendicionnikita qoykuway, nispa.

²⁰Hinaptinmi churinta Isaac nirqa: ¿Imaynataq ratollaqa hapiramurqanki? nispa. Jacobñataqmi nirqa: Yupaychasqayki Tayta Diosmi ñawpaqniypi rikuriykachirqa, nispa.

²¹Chaymi Isaac nirqa: Llapchaykunaypaq asuykamuway, cheqapchu churiy Esaú kanki icha manachu, nispa.

²²Jacob asuykuptinmi taytan Isaac llapchaykuspan nirqa: Voznikiqa Jacobpa vozninmi, makikikunam ichaqa Esaupa makinkuna, nispa.

²³Manam Jacobtaqa reqsirqachu makinkuna Esaupa hina pelosapallaña kasqanrayku, bendeciykuchkaspanñam

²⁴huktawan tapurqa: ¿Cheqaptachu churiy Esaú kanki? nispa. Jacobñataqmi nirqa: Ñoqam kani, nispa.

²⁵Chaymi Isaac nirqa: Churilláy, asuykachimuway hapimusqaykita mikuykuspay bendicionniyta qoykunaypaq, nispa. Chaymi asuykachiptin mikurqa, vinota-pas qoykuptinmi tomarqa.

²⁶Chaymantam Isaac nirqa: Churilláy asuykamuspa muchaykuway, nispa.

²⁷Jacobmi taytanman asukuspan muchaykurqa, hinaptinmi taytanñataq churinpa pachanta muskiykurqa, chaymi bendecispan kaynata nirqa: Kayqa churiypa asnayninmi, Diospa bendecisqan campopa asnayninmanmi rikchakun.

²⁸Diosyá qosunki cielomanta parata chaynataq allin cosecha qoq allpata, trigotapas vinotapas mana pisiyta.

²⁹Nacionkunam qamta servisunki, llapa runakunam qayllaykipi kumuykunqaku. Aylluykikunapim munaychakunki, aylluykikunapa mirayninkunam ñawpaqnikipi kumuykunqaku. Ñakasuqnikikuna ñakasqa kachun, bendecisuqnikikuna bendecisqa kachun, nispa.

³⁰Jacobta taytan Isaac bendeciyta tukuruptillanmi hinaspa taytanpa ñawpaqninmanta Jacob lloqsiruptillanmi, wawqen Esauqa animal hapimusqanmanta chayaramurqa.

³¹Esaupas mikuy yanumusqanta aparamuspanmi taytanta nirqa: Hatariy taytáy, hapimusqayta mikuykuy chaynapi bendicionnikita qoykuwanaykipaq, nispa.

³²Chaymi taytan Isaac nirqa: ¿Pitaq qam kanki? nispa. Hinaptinmi Esaú nirqa: Ñoqaqa piwi churiki Esaumi kani, nispa.

³³Chaymi Isaac sinchita hukmanyaruspan nirqa: Chaynaqa, ¿pitaq hapimusqanta aparamuwarqa? Manaraq chayamuchkaptikim mikuruniña. Bendicionniytapas paymanmi qoykuniña, chaynaqa payñam Diospa bendecisqan kanqa, nispa.

³⁴Esaumi taytanpa nisqanta uyariy-kuspan llumpayllataña waqaspan qaparirqa: Taytáy, ñoqatapas bendeciykuwayá, nispa.

³⁵Chaymi Isaac nirqa: Wawqekim sakrillawan hamuruspam qampa bendicionnikita chaskirun, nispa.

³⁶Hinaptinmi Esaú nirqa: Iskay kutitañam engañaruwan, puntatam piwi kayniypa derechonta qechuruwarqa, kunanñataqmi bendicionniyta qechuruwan. ¿Manachum chayrayku sutinpas [26]Jacob? ¿Manachum ñoqatawan bendeciykuwankiman? nispa.

³⁷Isaacñataqmi nirqa: Jacobtam churaruni qampa hawaykipi munaychakunanpaq, llapa aylluykikunapas paytam servinqaku, trigotapas vinotapas paymanmi qoykuni. Chaynaqa, churilláy ¿imatañataq qanman qoykiman? nispa.

³⁸Chaymi Esaú nirqa: ¿Taytáy, chullallachu bendicionniki? nispa. Hinaspanmi Esaú waqaspa qaparirqa: ¡Taytáy, ñoqatapas bendeciykuwayá! nispa.

³⁹Chaymi Isaac nirqa: Yachasqayki allpapas manam anchataqa rurunqachu, manataqmi parapas allintaqa chayanqachu.

⁴⁰Espadaykimantam kawsanki, wawqekitam servinki. Yugota pakiruq toro hina lluptikuspam wawqekipa munaychakuyninmanta librakunki, nispa.

⁴¹Jacobta taytan bendeciykusqanraykum Esaú llumpayta cheqnikuruspan kaynata tantearqa: “Taytay wañuruptinmi wawqey Jacobta wañurachisaq”, nispa.

⁴²Esaupa rimapakusqanta Rebecaman willaykuptinkum Jacobta qayachispan nirqa: Wawqeki Esaumi wañurachisunaykipaq tanteachkan.

⁴³Chaynaqa, wawalláy, kay nisqayta kasuway: Harán llaqtapi turiy Labanpa wasinman ayqekuy.

⁴⁴Chaypiyá wawqekipa sonqon tiyanankama yachamuy,

⁴⁵tukuy ima ruwasqaykikunata wawqeki qonqanankama, chayñam qayachimusqayki. Manam munanichu iskaynikichik huk punchawllapi wañurunaykichikta, nispa.

⁴⁶Chaymantam Isaacta Rebeca nirqa: