Read CHUYA QELLQA La Biblia en Quechua de Ayacucho 2012 Génesis 29 Bible Online

Génesis 29 - CHUYA QELLQA La Biblia en Quechua de Ayacucho 2012 bible

Génesis 29

¹Jacobmi kasqallan pasaspan intipa qespimunan lawpi runakunaman chayarurqa.

²Campopi pozota qawariptinmi, chaypa hichpanpi kimsa atajo ovejakuna kachkasqa. Chay pozomantam animalkuna yakuta tomaqku. Chay pozom huk hatun rumiwan tapasqa karqa.

³Chaymanmi llapa ovejakuna yaku tomaq huñunakamuq, hinaptinmi michiqkuna pozopi rumita suchuchiptinku tomaqku, tomaruptinkuñataqmi kasqallan kutiykachiqku.

⁴Jacobmi michiqkunata tapurqa: Wawqekuna ¿maylawtaq kankichik? nispa. Hinaptinmi paykunañataq nirqaku: Harán llaqtapi kaqmi kaniku, nispanku.

⁵Chaymi Jacobqa paykunata tapurqa: ¿Reqsinkichikchu Nacorpa willkan Labanta? nispa. Hinaptinmi paykuna nirqaku: Arí, reqsinikum nispanku.

⁶Jacobñataqmi nirqa: ¿Allinllachu kachkan? nispa. Chaymi paykuna nirqaku: Allinllam kachkan, waqaya churin Raquelpas ovejankunata qatimuchkan, nispanku.

⁷Chaymantam Jacob nirqa: Punchawraqmi kachkan, manaraqmi animalkuna qaykuna horaraqchu. Chaynaqa, ovejakunaman yakuta tomarachispayá michimuychikraq, nispa.

⁸Chaymi paykunañataq nirqaku: Llapallan ovejakuna huñunakamunantam suyachkaniku, chayñam kay pozopa hawanpi rumita suchuchispa tomachisaqku, nispanku.

⁹Paykunawan Jacob rimachkaptinmi, Raquelqa ovejankuna qatikusqa chayaramurqa. Payqa taytanpa ovejankuna michiqmi karqa.

¹⁰Chaymi Raquelta rikuykuspa Jacob pasarqa pozo hawanpi rumi tikraq, hinaspam Labanpa ovejankunaman tomachirqa. Raquelqa karqa Labanpa churinmi, Labanñataqmi Jacobpa maman Rebecapa turin.

¹¹Chaymantam Raquelta muchaykuspan Jacob qaparispa waqarqa.

¹²Jacobmi willakurqa Labanpa sobrinon kasqanta chaynataq Rebecapa wawan kasqanta, hinaptinmi Raquelqa kallpaspan taytanman willamurqa.

¹³Labanñataqmi paninpa wawan Jacobmanta uyariykuspan chaskiqnin kallparqa. Abrazaykuspa muchaykuspanmi wasinman pusarqa, hinaptinmi tukuy ima pasasqanta Labanman Jacob willakurqa.

¹⁴Chaymi Labán nirqa: Cheqaptapunipas qamqa aylluymi kanki, nispa. Huk killaña Labanwan Jacob yachachkaptinmi

¹⁵Jacobta Labán nirqa: ¿Sobrinoy kasqaykiraykuchu mana imallapaq serviwankiman? Niykuway ¿haykatataq pagapuykiman? nispa.

¹⁶Labanpam iskay warmi churinkuna karqa. Piwi kaqmi karqa Lea, sullkañataqmi karqa Raquel.

¹⁷Leaqa karqa sumaq ñawichayuqmi, Raquelñataqmi karqa chakinmanta umankama kuyayllapaq.

¹⁸Chaymi Raquelta kuyasqanrayku Jacob nirqa: Sullka kaq churiki Raquelraykum qanchis wata servisqayki, nispa.

¹⁹Hinaptinmi Labán nirqa: Allinmi, huk runaman qonaytaqa qanmanyá qosqayki, ñoqapaqyá llamkay, nispa.

²⁰Chaymi Jacobqa Raquelrayku qanchis watata servirqa. Ichaqa payta kuyasqanraykum as punchawkunallapaq hina rikchakarapurqa.

²¹Qanchis wata pasaruptinmi Labanta Jacob nirqa: Casarakunaypaq Raquelta qoway, plazo qonakusqanchik watam chayaramunña, nispa.

²²Hinaptinmi chay llaqtapi runakunata huñuruspan Labán casarakuy convidota ruwarqa.

²³Tutaykuruptinmi churin Leata Jacobman Labán pusaykurqa, chaymi Jacobqa Leawan puñururqa.

²⁴Labanmi criadan Zilpata churin Leaman qoykurqa criadan kananpaq.

²⁵Achikyaramuptinmi Jacob musyakururqa Leawan puñurusqanta. Chaymi Labanta nirqa: ¿Imatataq kayta ruwaruwanki? ¿Imanas-qataq engañaruwanki? ¿Manachum Raquelrayku servirqaykiqa? nispa.

²⁶Labanñataqmi nirqa: Kay llaqtapi costumbreykuman hinaqa manam sullkatachu puntataqa casarachiniku.

²⁷Leawan casarakusqayki semanatayá cumpliruy, chaymantañam Raquelwan casarachisqayki, qanchis watatawanraq serviwanaykipaq prometekuptiki, nispa.

²⁸Jacobmi chaynata ruwarqa. Casa-rakusqan semana cumplikuruptinmi Raquelwanpas casarachirqa.

²⁹Labanmi criadan Bilhata churin Raquelman qoykurqa criadanña kananpaq.

³⁰Jacobmi Raquelwan puñururqa, hinaspam Leamantapas masta kuyarurqa. Chaywanpas qanchis watatawanraqmi Labanta servirqa.

³¹Leata Jacobpa despreciasqan kasqanta Tayta Dios qawaspanmi wachakuq kananpaq yanaparqa, Raqueltañataqmi qolluqta ruwarurqa.

³²Leam wiksayakuruspan qari wawata wachakurqa, hinaspam [29]Rubenwan suticharqa: Humillasqa kasqaytam Tayta Dios qawariykuwan, kunanqa qosayqa kuyawanqañam, nispa.

³³Huktawan wiksayakuruspanmi qari wawata wachakurqa, hinaspam nirqa: Despreciasqa kasqayta Tayta Dios uyarispanmi kay wawaytawan qoykuwan, nispa. Hinaspam [30]Simeonwan suticharqa.

³⁴Huktawan wiksayakuruspanmi qari wawata wachakurqa, hinaspam nirqa: Kimsataña qari churinta wachakuchkaptiyqa qosayqa ñoqallawanñam kanqa, nispa. Chayraykum [31]Leviywan suticharqa.

³⁵Huktawan wiksayakuruspanmi qari wawata wachakururqa, hinaspam nirqa: Kunanqa Tayta Diostam alabasaq, nispa. Chayraykum [32]Judawan suticharqa. Chaymantam manaña wachakurqañachu.