Read CHUYA QELLQA La Biblia en Quechua de Ayacucho 2012 Génesis 3 Bible Online

Génesis 3 - CHUYA QELLQA La Biblia en Quechua de Ayacucho 2012 bible

Génesis 3

¹Tayta Diospa unanchasqan llapallan purun animalkunamantam [4]maqta uruqa llumpay sakri karqa. Warmitam chay maqta uru nirqa: Chaynaqa, ¿Dioschu nisurqankichik huertapi llapa sachakunapa ruruntaqa amam mikunkichikchu, nispa?

²Warmiñataqmi nirqa: Huertapi sachakunapa ruruntaqa mikuymankum.

³Huertapa chawpinpi kaq sachapa rurunmantam ichaqa Dios niwarqaku: “Amam mikunkichikchu nitaqmi llapchankichikpaschu, mana chayqa wañurunkichikmi” nispa.

⁴Hinaptinmi warmita maqta uru nirqa: Llullam chayqa, manam wañunkichikchu.

⁵Diosqa yachanmi, maypacham mikuruptikichikqa ñawikichik kicharikuruptin kikin Dios hinaña allin kaqtapas mana allin kaqtapas yachaqña rikurirunaykichikta, nispa.

⁶Chaymi warmi qawaykurqa chay sachapa rurunqa mikunapaq hina kasqanta hinaspa yachayta haypanapaqpas munayllapaqña kasqanta, chaymi rurunta pallaykuspan mikururqa, qosanmanpas qoykuptinmi paypas mikururqa.

⁷Hinaptinmi ñawinku kicharikuruptin qalalla kasqankuta qawakuykuspanku higospa rapinta siraruspanku chaywan tapakurqaku.

⁸Tardeykuyta wayrariykamuptinmi Tayta Diospa purisqanta huertapi uyarirurqaku, chaymi Adanwan Evaqa Diosmanta pakakururqaku huertapi sachakunapa ukunpi.

⁹Hinaptinmi qarita qayaspan Dios nirqa: ¡Adán! ¿Maypitaq kachkanki? nispa.

¹⁰Chaymi payñataq nirqa: Huertapi voznikita uyariruspaymi, qalalla kasqayta qawakuykuspay mancharikurqani, nispa.

¹¹Hinaptinmi Dios tapurqa: ¿Pitaq qalalla kasqaykita willarusunki? ¿Icha “amam mikunkichu” nisqay sachapa rurunta mikurunki? nispa.

¹²Chaymi qariñataq nirqa: Vida pasaqmasiy kananpaq warmi qowasqaykim chay sachapa rurunta qoykuwarqa, hinaptinmi mikururqani, nispa.

¹³Hinaptinmi warmita Tayta Dios tapurqa: ¿Imatataq kayta ruwarunki? nispa. Chaymi warmiñataq nirqa: Maqta uru engañaruwaptinmi mikururqani, nispa.

¹⁴Hinaptinmi maqta uruta Tayta Dios nirqa: Chay ruwasqaykimantam llapallan animalkunamanta ñakasqa kanki. Qasqonpam purinki, kawsanayki punchawkamam allpata mikunki.

¹⁵Warmitawan qamtam cheqninachisqayki, cheqninachisaqtaqmi miraynikitawan miraynintapas. Mirayninmi umaykipi sarusunki, qamñataqmi talonninpi kachunki, nispa.

¹⁶Warmitañataqmi nirqa: Wiksayakuptikim nanaynikikunata mirachisaq, llumpay nanaywanmi wachakunki. Munakuynikim qosaykipaq kanqa, payñataqmi qampi munaychakunqa, nispa.

¹⁷Adantañataqmi kaynata nirqa: Warmikita kasuspa “amam mikunkichu” nisqay sachapa rurunta mikurusqaykimantam kay pacha ñakasqa kanqa. Ñakariywan llamkaspam kawsanayki punchawkama mikunki.

¹⁸Allpamantapas kichkakunawan qorakunallañam wiñapusunki, purun qorakunatam mikunkipas.

¹⁹Allpaman kutiykunaykikamam sudornikipa chaninta mikunki. Allpamanta ruwasqam kanki, allpallamantaqmi kutiykunkipas, nispa.

²⁰Adanmi warminta [5]Evawan suticharqa, llapallan runakunapa maman kasqanrayku.

²¹Hinaspam qaramanta pachata ruwaykuspa warmiqarita Tayta Dios pachaykachirqa.

²²Chaymantam Tayta Dios nirqa: Runaqa ñoqanchik hinañam rikurirun, allin kaqtapas mana allin kaqtapas yachaqña. Yanqañataq kawsay qokuq sachapa ruruntapas pallaruspa mikurunman hinaspa wiñaypaq kawsaqña rikurirunman, nispa.

²³Chaymi Tayta Dios Edén huertamanta runata qarqorurqa allpata llamkananpaq, payqa allpamanta ruwasqam karqa.

²⁴Runata qarqoruspanñataqmi, huertapa inti qespimunan lawninpi querubinkunata churarurqa, churarqataqmi ratachkaq espadatapas, chay espadam kaylawman waklawman muyurqa, chaynapi kawsay qokuq sachaman riq ñanta waqaychananpaq.