Read CHUYA QELLQA La Biblia en Quechua de Ayacucho 2012 Génesis 30 Bible Online

Génesis 30 - CHUYA QELLQA La Biblia en Quechua de Ayacucho 2012 bible

Génesis 30

¹Raquelmi qolluq kasqanrayku ñañanmanta envidiakuspan Jacobta nirqa: Wawakunata qoway mana chayqa wañurusaqmi, nispa.

²Jacobñataqmi Raquelpaq piñakuspan nirqa: Diosmi qolluqta ruwasurqanki, ñoqaqa manam Dioschu kani wawata qonaypaqqa, nispa.

³Chaymi Raquel nirqa: Kayqaya criaday Bilha, paywan puñuy, moqoypi wachakuptin paypa wawankuna waway hina kananpaq, nispa.

⁴Chaynapim Jacobman criadan Bilhata Raquel qoykurqa churiwachan kananpaq, hinaptinmi Bilhawan Jacob puñurqa.

⁵Chaymi wiksayakuruspan Jacobpa qari churinta wachakurqa.

⁶Chaymi Raquel nirqa: Qayakusqayta uyariykuwaspam Diosqa allin arreglota ruwaykuwan, hinaspam huk qari wawata qoykuwan, nispa. Chayraykum [33]Danwan suticharqa.

⁷Huktawanmi Raquelpa criadan Bilha wiksayakururqa Jacobpa churinta, hinaspam iskay kaq qari wawanta wachakurqa.

⁸Chaymi Raquel, nirqa: Anchatam ñañaywan atipanakurqani, hinaspam venceruni, nispa. Chayraykum [34]Neftaliywan suticharqa.

⁹Leañataqmi manaña wachakuspan criadan Zilpata churiwachan kananpaq Jacobman qoykurqa.

¹⁰Chaymi Leapa criadan Zilpa Jacobpa churinta wiksayakuruspan qari wawata wachakurqa.

¹¹Hinaptinmi Lea nirqa: Suertem kayqa, nispan. Chayraykum [35]Gadwan suticharqa.

¹²Huktawanmi Leapa criadan Zilpa Jacobpa qari churinta wachakururqa.

¹³Chaymi Lea nirqa: Kusikuyniymi kayqa, warmikunapas kusikuyniyuqmi niwanqakum, nispa. Chayraykum [36]Aserwan suticharqa.

¹⁴Rubenmi trigo rutuy tiempopi mandrágoras sutiyuq frutata chakrapi tarirurqa, hinaspam maman Leaman aparqa, hinaptinmi Leata Raquel nirqa: Ama hina kaspa wawaykipa apamusqan mandrágoras frutaykita qoykuway, nispan.

¹⁵Leañataqmi nirqa: ¿Qosayta qechuruwachkaspaykipas wawaypa apamusqan mandrágoras frutataraqchu qechuruwayta munachkanki? nispan. Hinaptinmi Raquel nirqa: Jacobchiki kunan tuta qanwan puñunqa, wawaykipa apamusqan mandrágoras fruta qowasqaykimanta, nispa.

¹⁶Chaymi tarden chakramanta Jacob kutimuchkaptin Lea taripaykuspan nirqa: Kunan tutaqa ñoqawanmi puñunki, wawaypa apamusqan mandrágoras frutawanmi alquilaruyki, nispa. Chaymi Jacobqa chay tuta Leawan puñurqa.

¹⁷Leapa mañakuynintam Dios uyarirqa. Chaymi Jacobpa churinta wiksayakuruspa pichqa kaq qari wawanta wachakurqa.

¹⁸Chaymi Lea nirqa: Qosayman criadayta qoykusqayraykum kay wawata Dios qoykuwan, nispa. Chayraykum [37]Isacarwan suticharqa.

¹⁹Huktawan Jacobpa churinta wiksayakuruspanmi soqta kaq qari wawanta Lea wachakururqa.

²⁰Hinaspam nirqa: Diosmi allin regalota qoykuwan. Kunanmi ichaqa qosay kuyawanqa soqta kutikamaña qari churinkunata wachakusqayrayku, nispa. Chaymi [38]Zabulonwan suticharqa.

²¹Chaymantam Lea wachakururqa warmi wawata, paytam Dinawan suticharqa.

²²Diosmi ichaqa Raquelmanta mana qonqarurqachu, chaymi mañakuyninta uyarispan wachakuq kananpaq yanaparqa.

²³Wiksayakuruspam qari wawata wachakururqa, hinaspam nirqa: Penqakuyniytam Dios chinkarachin, nispa.

²⁴Hinaspam [39]Joseywan suticharqa: Tayta Diosyá qoykuwachun huk qari wawatawan, nispa.

²⁵Joseyta Raquel wachakuruptillanmi Labanta Jacob nirqa: Aviawayña llaqtayman ripukunaypaq,

²⁶chaynataq warmiykunatawan churiykunatapas. Paykunaraykum servirqayki, qamqa yachankim imaynam servisqayta, nispa.

²⁷Chaymi Labán nirqa: Ama hina kaspaykiyá amaraq ripukuychu, qawakuykunim qamrayku Tayta Dios bendeciwasqanta.

²⁸Niykuway ¿haykatataq ganakuyta munanki? ñoqaqa pagapusqaykim, nispa.

²⁹Hinaptinmi Jacob nirqa: Yachankim imaynam qam servisqayta chaynataq imaynatam animalnikikunata waqaychasqaytapas.

³⁰Manaraq chayamuptiyqa asllam kapusurqanki. Kaypi kasqaymantam ichaqa Tayta Dios bendecisuptiki achkallataña mirarun. ¿Haykapiñamá kikiypa aylluypaqqa llamkasaq? nispa.

³¹Chaymi Labán nirqa: ¿Imatataq paganayta munanki? nispa. Hinaptinmi Jacob nirqa: Ama imatapas pagawaychu. Kunan nisqayta “allinmi” niptikiqa, kaqllam ovejaykikunata michimusaq.

³²Ñoqam kunan kanchaykita rispa llapallan cheqchi ovejakunata, muru ovejakunata chaynataq llapallan malta yana carnerokunata rakimusaq, muru cabrakunatawan cheqchi cabrakunatapas rakisaqtaqmi, chaykunam pagoy kanqa.

³³Qanmanta pagoy chaskinay punchaw chayamuptinmi qawanki kanchaypi cabrakunaqa cheqchikunalla hinaspa murukunalla kasqanta chaynataq carnerokunapas yanakunalla kasqanta, mana chayna kaptinqa suwapaqmi hapiwanki. Chaynapim honrado kasqayta yachawanki, nispa.

³⁴Labanñataqmi nirqa: Arí allinmi, nisqaykiman hinayá kachun, nispa.

³⁵Hinaspam chay punchawllapi allqa chivatokunata, chaynallataq yuraqniyuq muru cabrakunatapas Labán rakirqa. Yana malta carnerokunatapas rakirqataqmi, chaykunatam michinankupaq churinkunaman qoykurqa.

³⁶Chaymi chay animalkunata qatirqaku Jacobpa kasqanmanta kimsa punchaw puriyta. Jacobñataqmi Labanpa wakin ovejankunata hinapi michirqa.

³⁷Chaymi Jacob kiswar sachamanta, almendra sachamanta hinaspa castaño sachamanta kaspikunata kuchuruspan chay kaspikunapa qaranta raya-rayata chustururqa.

³⁸Hinaspam animalkunapa yaku tomanan artesakunapa hichpanpi churarurqa, chaymi animalkuna yaku tomaq rispanku chaypi muyanakuqku.

³⁹Chay kaspikunapa ñawpaqninpi muyanakuspam allqakunata, cheqchikunata hinaspa murukunata wachaqku.

⁴⁰Chay uñakunata rakispanmi Labanpa allqa animalninkunapa, yana animalninkunapa chimpanman churarqa. Kikinpa animalninkunataqa manam Labanpa animalninkunawanqa chaqruchirqachu.

⁴¹Chaymi poqosqa wiran animalkuna chichukuptin, chay kaspikunata Jacob churaq animalkunapa yaku tomananpa ladonpi, chaynapi chay kaspikunapa ñawpaqninpi chichukunankupaq.

⁴²Umpu animalkuna hamuptinñataqmi mana churaqchu, chaymi chay umpukuna Labanpaq karqa, poqosqankunañataqmi Jacobpaq.

⁴³Chaynapim Jacobqa anchallataña apuyarurqa. Animalninkunapas, criadonkunapas, camellonkunapas hinaspa asnonkunapas anchallataña mirarapurqa.