Read CHUYA QELLQA La Biblia en Quechua de Ayacucho 2012 Génesis 31 Bible Online

Génesis 31 - CHUYA QELLQA La Biblia en Quechua de Ayacucho 2012 bible

Génesis 31

¹Jacobmi uyarirurqa Labanpa churinkuna imam rimasqankuta. Paykunam nirqaku: “Jacobqa taytanchikpa llapa kapuqninta hapikuykuspam apuyarun”, nispanku.

²Jacobqa qawarqataqmi Labanpa hukmanyarusqantawan manaña ñawpaq hina kasqantapas.

³Chaymi Jacobta Tayta Dios nirqa: “Tayta-mamaykipa allpanman, aylluykikunapa kasqanman kutikuy, ñoqam qanwan kasaq”, nispa.

⁴Chaymi Raqueltawan Leata hatuspi animalkunawan kasqanman Jacob qayachirqa.

⁵Chaypim paykunata nirqa: Taytaykichikmi hukmanyarun, manañam ñawpaqta hinañachu. Taytaypa Diosninmi ichaqa ñoqawan kachkan.

⁶Yachankichikmi taytaykichiktaqallapallan kallpaywan servisqayta,

⁷taytay-kichikmi ichaqa pagoytapas sapa kutilla cambiaspa engañawarqa, aswanqa Diosmi mana munarqachu mana allin ruwawananta.

⁸Taytaykichik Labanmi niwarqa: “Cheqchikunam pagoyki kanqa”, nispa; chaymi llapallan animalkuna wachaq cheqchikunallata. “Allqakunam pagoyki kanqa” niwaptinñataqmi allqakunallata animalkuna wachaq.

⁹Chaynatam taytaykichikpa animalninkunata Tayta Dios qechuruspan ñoqaman qoykuwarqa.

¹⁰Ovejakunapa muyakusqan tiempopim mosqoyniypi rikurqani muyaq carnerokunaqa allqakuna, cheqchikuna hinaspa murukuna kasqanta.

¹¹Chaymi mosqoyniypi Diospa angelnin sutiymanta qayawaptin nirqani: ¿Imata, taytáy? nispa.

¹²Payñataqmi niwarqa: “Muyaq carnerokunata qawariy. Llapallanmi allqakuna, cheqchikuna hinaspa murukuna. Labanpa tukuy mana allin ruwasusqaykitapas rikurqanim.

¹³Ñoqam Bet-el lawpi rikuriqniki Dios kani. Chaypim rumiman aceiteta tallispayki prometikuwarqanki. Chaynaqa, kay llaqtamanta aylluykikunapa kasqanman kutiy”, nispa.

¹⁴Raquelwan Leañataqmi Jacobta nirqaku: Taytaykupa wasinpiqa manañam imaykupas kanñachu

¹⁵ñoqaykumanta qollqe pagasqaykitapas lliwtañam tukurun, hinaspam ñoqaykutapas huklaw llaqtayuq warmikunata hinaña qawawachkanku.

¹⁶Taytaykumanta Diospa qechusqan tukuy imaqa ñoqaykupaqwan wawaykupaqmi. Chaynaqa, Diospa tukuy nisusqaykita ruway, nispa.

¹⁷Jacobmi warminkunatawan churinkunata camellokunaman sillaykachispan,

¹⁸Padan-aram lawpi llapallan animalkuna armasqanta qatirikuspa, Canaán lawpi taytan Isaacpa kasqanman kutikurqa.

¹⁹Labanñataqmi ovejankuna rutuq pasakuspa mana wasinpichu tarikurqa. Chaykamam Labanpa idolonkunata Raquel suwaramurqa.

²⁰Aram casta Labantam Jacob engañarurqa upallalla ripukuspan.

²¹Jacobmi llapa imanta aparikuspa ripukurqa. Eufrates mayuta chimparuspam Galaad lawpi orqokunaman pasakurqa.

²²Jacobpa kimsa punchaw ripukusqan hawañam Labanman willaykurqaku.

²³Chaymi Labanqa yacharuspan ayllunkunawan qatispanku qanchis punchawpiña Galaad law orqokunapi hayparurqaku.

²⁴Hinaptinmi Aram casta Labanman chay tuta mosqoyninpi rikuriykuspan Dios nirqa: Yanqataq Jacobta imatapas nichkawaq, nispa.

²⁵Labanmi Jacobta hayparurqa carpankuna sayachisqan Galaad law orqokunapi, chaypim paypas ayllunkunapiwan carpankuta sayachirqaku.

²⁶Chaymi Jacobta Labán nirqa: ¿Imanasqataq engañaruwanki? ¿Imanasqataq churiykunata guerramanta preso apachkaq hina aparamunki?

²⁷¿Imanasqataq upallalla ayqeramurqanki? kaywanqa engañaruwankim. Willawankimanchiki karqa chaynapi takiwan, tinyawan, arpawan fiestata ruwaspa aviamunaypaq.

²⁸Churiykunatapas nitaq willkaykunatapas mana muchaykuchkaptiymi ayqeramunki. Muspaypi hinam kaytaqa ruwaramunki.

²⁹Chaynaqa, makillaypim kachkankichik imatapas ruwarunaypaq. Ichaqa taytaykipa Diosninmi chisi tuta mosqoyniypi niwarqa: “Yanqataq Jacobta imatapas niwaq”, nispa.

³⁰Taytaykipa wasinman llumpayta kutiyta munaspaqa ¿imanasqataq diosniykunata suwaramuwarqanki? nispa.

³¹Jacobñataqmi nirqa: Manchakuymi yaykuruwarqa churikikunata qechuruwanaykimanta.

³²Pipas diosnikikunata suwakamuqqa wañuchun. Chaynaqa, ayllunchikkunapa qayllanpi maskakuruy, imaykikunatapas reqsikuspaqa apakuy, nispa. Jacobqa manam yacharqachu Raquel suwakaramusqantaqa.

³³Labanmi maskarqa Jacobpa carpanpi, Leapa carpanpi chaynataq iskaynin criadankunapa carpanpipas, ichaqa manam tarirqachu. Leapa carpanmanta lloqsiramuspam Raquelpa carpanman yaykurqa.

³⁴Raquelñataqmi chay idolokunata camellokunapa monturan ukunman pakaruspa hawanpi tiyarurqa, chaynapim Labanqa mana tarirqachu.

³⁵Hinaptinmi taytanta Raquel nirqa: Taytáy, ama piñakuychu, manam hatariyta atiymanchu killaywanmi kachkani, nispa. Chaymi Labanqa idolonkunata maskaspan mana tarirqachu.

³⁶Jacobñataqmi piñakuspan Labanta kutipakurqa: ¿Ima mana allintataq ruwaruni? ¿Imataq huchay piñasqallaña qatimuwanaykipaqqa?

³⁷Llapa imaykunata taqwiruchkaspaqa ¿imaykikunatataq tarirunki? Chaynaqa, ayllunchikkunapa qayllanman churamuy paykuna juzgawananchikpaq.

³⁸Iskay chunka watam qanwan kuska karqani, ovejaykikunapas, cabraykikunapas manapunim sullurqachu, nitaqmi qampa kaqtaqa carneroykitapas mikurqanichu.

³⁹Manataqmi purun animalkunapa puchuntapas apamurqaykichu, chinkaptinpas pagarqaykim, tuta otaq punchaw suwasqamantapas pagachikuwaqmi kanki.

⁴⁰Punchawmi rupaypi ñakarirqani, tutanñataqmi chiripi ñakarirqani, puñuypas manam chayawarqachu.

⁴¹Chaynatam wasikipi iskay chunka wata karqani. Chunka tawayuq watam iskaynin churikikunamanta servirqayki, soqta watañataqmi animalnikikunamanta. Pagoytapas sapa kutillam cambiaruq kanki.

⁴²Abrahampapas taytay Isaacpapas yupaychasqanku Dios ñoqawan mana kaptinqa lliwtachiki qechuruwankiman karqa. Ichaqa Diosmi ñakariywan llamkasqayta rikurqa, chaymi chisi tuta qaqchasurqanki, nispa.

⁴³Jacobtam Labán nirqa: Kay warmikunaqa ñoqapa churiykunam, kay qari wawakunapas ñoqapa willkaykunam, kay ovejakunapas ñoqapa ovejaykunam, tukuy kay qawasqaykiqa ñoqallapam. Chaynaqa, manam imanasaqchu churiykunatapas nitaq willkaykunatapas.

⁴⁴Kunanyá contratota ruwasun, chaynapi contrato ruwasqanchik ñoqanchikpaq testigo kananpaq, nispa.

⁴⁵Chaymi Jacob suytu rumita señal kananpaq sayachirqa,

⁴⁶hinaspam ayllunkunata nirqa: Rumikunata huñumuychik, nispa. Llapallanku rumita montoruspankum chaypi mikurqaku.

⁴⁷Chaytam arameokunapa rimayninpi Labán suticharqa “Jegar Sahaduta” nispa. Jacobñataqmi hebreokunapa rimayninpi suticharqa “Galaad” nispa.

⁴⁸Hinaptinmi Labán nirqa: Kunanmi kay montosqa rumi ñoqanchikpaq testigo kanqa, nispan. Chayraykum Galaadwan suticharqaku.

⁴⁹Suticharqakutaqmi “Mizpa” nispankupas. Chaynataqa suticharqaku Labán kaynata nisqanraykum: Tayta Diosmi qawawasun qamtawan ñoqata maypiña kaptinchikpas.

⁵⁰Churiykunata ñakarichispa huk warmikunatawan casaraptikiqa, manaña pi qawawaptinchikpas Diosmi testigo kanqa ñoqanchikpi, nispa.

⁵¹Labanqa nirqataqmi: Kay montosqa rumikunawan kay suytu rumim ñoqanchik ukupi

⁵²testigo kanqa. Mana allinta ruwanakunanchikpaqqa manam qanman hamusaqchu, nitaqmi qampas ñoqaman hamunkichu.

⁵³Mana chayna kaptinqa Abrahampa, Nacorpa Diosninyá juzgawasunchik, nispa. Chaymi Jacobqa taytan Isaacpa yupaychasqan Diosrayku jurarqa.

⁵⁴Chaymantam Diospaq animalkunata wañuchispan Jacob kañarqa, hinaspam ayllunkunata qayaspa mikurqaku. Mikuruspankum orqopi chay tuta, puñurqaku.

⁵⁵Labanmi paqarinnintin tutapayta hatarispan churinkunata willkankunata muchaykurqa, hinaspam paykunata bendeciykuspan wasinman kutikurqa.