Read CHUYA QELLQA La Biblia en Quechua de Ayacucho 2012 Génesis 34 Bible Online

Génesis 34 - CHUYA QELLQA La Biblia en Quechua de Ayacucho 2012 bible

Génesis 34

¹Huk punchawmi Jacobpa churin otaq Leapa wawan Dina chay llaqtapi sipaskunaman watukuq rirqa.

²Hamorpa churin Siquemmi Dinata rikururqa, hinaspam mana munakuchkaqta hapiruspan abusarurqa. Hamorqa chaylawpi kamachikuq Hev casta runam karqa.

³Ichaqa Siquemmi Jacobpa churin Dinata llumpayta kuyaruspan kuyakuyllawanña rimapayarqa.

⁴Chaymi taytan Hamorta Siquem nirqa: Kay sipasman yaykupakapuway paywan casarakunaypaq, nispan.

⁵Jacobmi yacharurqa churin Dinata Siquem abusarusqanta. Ichaqa qari churinkuna hatuspi animalkunawan kasqanraykum, paykuna kutimunankama upallalla karqa.

⁶Chaymi Siquempa taytan Hamor yaykupakuwan Jacobman rirqa.

⁷Jacobpa qari churinkunam hatusmanta chayaramuspanku yacharurqaku imam pasakurusqanta, hinaspam llakikuruspanku anchata piñakururqaku, Israelpiqa chayqa mana haykapipas ruwana kasqanrayku.

⁸Chaymi paykunawan rimaspan Hamor nirqa: Churiy Siquemmi panikichikta llumpayta kuyarun, ama hina kaspayá ama harkakuychikchu churiywan casarakunanta.

⁹Ñoqaykuwan aylluta ruwaspa warmi churikichiktapas ñoqaykumanta kaqkunawan casarachiychik, qamkunapas warmi churiykuwan casarakuychik.

¹⁰Ñoqaykuwanña yachakuychik, allpaqa kanqam chaypi yachanaykichikpaq chaynataq negocio ruwanaykichikpaqpas. Kay allpatayá hapikuychik qamkunapaqña kananpaq, nispa.

¹¹Dinapa taytanta hinaspa turinkunata Siquem nirqa: Ama hina kaspa Dinawan casararachiwaychik, hinaptinqa imapas mañawasqaykichiktam qosqaykichik.

¹²Ima regalokunataña mañakuptikichikpas qosqaykichikmi. Panikichikwan casararachiwaychik, nispa.

¹³Hinaptinmi Jacobpa churinkuna paninku Dina penqayman churasqa kasqanrayku, Siquemta chaynallataq taytan Hamortapas sakrillawan

¹⁴nirqaku: Manam kaytaqa ruwaymankuchu, paniykutaqa manam qoymankuchu qari kaynin mana señalasqa runakunamanqa, chayqa ñoqayku ukupiqa huk hatun penqaymi.

¹⁵Sichum qamkunapas ñoqayku hina, llapan qarikuna qari-kaynikichikpi señalachikuptikichikmi ichaqa arí nisqaykiku.

¹⁶Chaynapim warmi churiykuwan casarakunkichik, chaynallataqmi ñoqaykupas warmi churikichikwan casarakusaqku, chaynapi huk castallaña kananchikpaq.

¹⁷Mana señalachikuyta munaptikichikmi ichaqa paniykuta pusarikuspa ripukusaqku, nispanku.

¹⁸Chay nisqankum Hamorpaqwan churin Siquempaq allinpaq rikchakarapurqa.

¹⁹Hinaptinmi Siquemqa qari kayninpi utqayman señalarachikurqa, Jacobpa churin Dinata kuyasqanrayku. Siquemqa ayllunkunapa ancha respetasqanmi karqa.

²⁰Chaymantam Hamorqa churin Siquempiwan llaqtankupa punkunpi huñunakuyman rirqaku, hinaspam chaypi runakunata kaynata nirqaku:

²¹Kay runakunaqa amistadninchikmi, chaynaqa kay allpanchikpi yachaspayá negociota ruwakuchunku. Allpanchikqa hatunmi, paykunapaqpas haypanqam. Warmi churinkunatam casarasun, paykunapas warmi churinchikkunatam casaranqaku.

²²Ichaqa paykunawan huk llaqtallaña kananchikpaqmi, ñoqanchikpas qarikuna paykuna hina llapallanchik qari kayninchikpa qarachanta señalachikunanchik.

²³Chaynapim llapa kapuqninkupas chaynataq animalninkupas ñoqanchikpaqña kanqa. Ichaqa paykunawanyá allinta tanteanakusun ñoqanchikwan yachanankupaq, nispanku.

²⁴Hamorpa chaynataq churin Siquempa nisqanta kasuspam llaqtapi llapallan qarikuna, qari kayninkupa qarachanta kuchuchikuspa señalarachikurqaku.

²⁵Hinaptinmi kimsa punchawña hatun nanaypi kachkaptinku, Jacobpa iskay churinkuna otaq Dinapa turinkuna Simeonwan Leví, sapakama espadankuta hapispa llaqtaman yaykururqaku, hinaspam llapallan runakunata mana defiendekuy atichkaqta wañurachirqaku.

²⁶Hamortapas churin Siquemtawan kuskatam espadawan wañurachirqaku, hinaspam Siquempa wasinmanta Dinata hurqoruspanku ripukurqaku.

²⁷Jacobpa wakin churinkunañataqmi llaqtaman rispanku wañuchisqanku runakunapa tukuy imankuta apakurqaku, paninku penqayman churasqa kasqanrayku.

²⁸Hinaspam ovejakunata, vacakunata, asnokunata, llaqtapi llapa ima kaqkunata chaynataq campopi kaqkunatapas apakurqaku.

²⁹Wasikunaman yaykuspam tukuy imankutapas apakurqaku, chaynallataqmi wawakunatapas, warminkutapas presota aparqaku.

³⁰Jacobñataqmi Leviytawan Simeonta nirqa: Cananeokunawan hinaspa ferezeokunawanmi cheqninarachiwankichik, hinaspam penqayman churaruwankichik; chaynaqa huñunakuruspankuchá atacaramuwanqaku, asllataq runaykunapas kachkan, hinaspachá wañurachiwanqaku, aylluykunatapas wañurachinqakuchá, nispa.

³¹Chaymi paykunañataq nirqaku: ¿Chuchumikata hinachu paniykuta ruwanman karqa? nispanku.