Read CHUYA QELLQA La Biblia en Quechua de Ayacucho 2012 Génesis 35 Bible Online

Génesis 35 - CHUYA QELLQA La Biblia en Quechua de Ayacucho 2012 bible

Génesis 35

¹Jacobtam Dios nirqa: Bet-el lawman rispayki chaypi yachamuy, chaypitaq ñoqapaq altarta ruwamuy. Ñoqam kani wawqeki Esaumanta lluptichkaptiki rikuriqniki Dios, nispa.

²Chaymi Jacobqa ayllunkunata hinaspa llapallan paywan kaqkunata nirqa: Llapa idolokunata wischuychik hinaspa chuyanchakuychik, bañakuspa pachaykichiktapas mudakuychik,

³hinaspa hatariychik Bet-el lawman rinanchikpaq, chaypim llakiypi rimapayawaqniy Diospaq altarta ruwamusaq, paymi purisqaykunapi ñoqawan karqa.

⁴Chaymi Jacobman llapa idolokunata chaynataq rinrinkupi aretekunatapas apamurqaku, hinaptinmi Siquem llaqtapa hichpan encina sachapa sikinpi Jacob pamparurqa.

⁵Chaymanta ripuptinkum muyuriqninku llaqtakunaman Diosmanta hamuq hatun manchakuy yaykururqa, chaynapim Jacobpa churinkunata manaña qatirqakuchu.

⁶Jacobmi llapallan runankunapiwan “Luz” sutiyuq llaqtaman chayarurqaku, chaypa huknin sutinmi karqa Bet-el, chayqa Canaán allpapim tarikun.

⁷Altarta chaypi ruwaruspanmi, chay sitiota [43]El-Bet-elwan suticharqa, wawqenmanta lluptichkaptin chaypi Dios rikuriykusqanrayku.

⁸Chaypitaqmi Rebecapa uywaqnin Deborapas wañukurqa, hinaptinmi Bet-el llaqtapa hichpan encina sachapa sikinpi pamparurqaku, chayraykum chay sachata Jacob suticharqa [44]“Alón-bacut” nispa.

⁹Chaypim Diosqa huktawan Jacobman rikuriykurqa, Padan-aram lawmanta kutimuptin, hinaspam payta bendecispan

¹⁰nirqa: Jacobmi sutiki karqa, ichaqa manañam Jacobñachu kanqa, aswanqa Israelñam sutikiqa kanqa, nispa. Chaynatam Jacobta Israelwan Dios suticharurqa.

¹¹Diosqa nirqataqmi: Ñoqaqa Tukuy Atiyniyuq Diosmi kani, churikikunayá achkallaña kachun ancha mirayniyuq kanaykipaq, achka nacionkunam miraynikimanta lloqsinqa, qanmantam reykuna hatarinqa.

¹²Abrahamman chaynataq Isaacman qosqay allpatam qanmanpas hinaspa miraynikikunamanpas qosaq, nispa.

¹³Chay sitiopi Jacobwan rimaruspan Dios pasakuptinmi,

¹⁴Jacobñataq chay rimasqanku sitiopi huk suytu rumita sayachirqa, hinaspam chay rumipa hawanman aceitetawan vinota talliykurqa Diosllapaqña sapaqchananpaq.

¹⁵Chaymi Jacobqa maymi Dioswan rimasqanku sitiota “Bet-elwan” suticharqa.

¹⁶Bet-elmanta rispa Efrata llaqtaman hichpaykuchkaptinkum Raquelpa wachakunan tiempo chayaramurqa, hinaptinmi llumpayta ñakarirqa.

¹⁷Wachakuspa sinchita ñakariptinmi partera nirqa: Ama manchakuychu, kay wawaykipas qarim kasqa, nispa.

¹⁸Chaymi Raquelqa wañuy patanpiña kachkaspan “Benoni” nispa suticharqa, hinaspam wañukurqa. Jacobñataqmi [45]Benjaminwan suticharqa.

¹⁹Raquel wañukuptinmi Efrata llaqtaman riq ñanpi pamparurqaku. Efratapa huknin sutinqa Belenmi.

²⁰Jacobmi Raquelpa sepulturanpa hawanpi rumikunata perqarqa, chaymi kunan punchawkama Raquelpa sepulturanpi señal hina kachkan.

²¹Israelmi chaymanta lloqsispan Edar torrepa waklawninpi carpanta sayachirqa.

²²Chay allpapi Israel yachachkaptinmi, taytanpa churiwachan Bilhawan Rubén puñururqa. Chayta yacharuspanmi Israel llumpayta piñakururqa. Jacobpa churinkunam karqa chunka iskayniyuq.

²³Leapi Jacobpa piwi churinmi Rubén, qatiqninkunañataqmi Simeón, Leví, Judá, Isacar hinaspa Zabulón.

²⁴Raquelpi churinkunañataqmi Joseywan Benjamín.

²⁵Raquelpa criadan Bilhapi churinkunañataqmi Danwan, Neftalí.

²⁶Leapa criadan Zilpapi churinkunañataqmi Gadwan Aser. Kaykunam Jacobpa qari churinkuna, Padan-aram lawpi naceqkuna.

²⁷Chaymantam Jacob chayarurqa taytan Isaacpa kasqan Mamre lawpi Arba llaqtaman, chay llaqtapa huknin sutinmi karqa Hebrón. Chaypim ñawpaqta Abrahampas chaynataq Isaacpas yacharqa.

²⁸Isaacqa pachak pusaq chunka watankamam kawsarqa.

²⁹Payqa sinchi yuyaqñam wañukurqa, hinaspam ñawpaq taytankunaman huñukuykurqa. Chaymi churinkuna, Esauwan Jacob pamparurqaku.