Read CHUYA QELLQA La Biblia en Quechua de Ayacucho 2012 Génesis 38 Bible Online

Génesis 38 - CHUYA QELLQA La Biblia en Quechua de Ayacucho 2012 bible

Génesis 38

¹Chay punchawkunapim, wawqen-kunamanta Judá rakikuruspan Adulam llaqtayuq Hirapa wasinman ripukurqa.

²Chaypim Canaán law Súa sutiyuq runapa warmi churinta rikuruspan paywan casarakurqa.

³Chay warmim wiksayakuruspa qari wawata wachakururqa, hinaspam Erwan suticharqa.

⁴Huktawan wiksayakuruspam qari wawata wachakururqa, hinaspam Onanwan suticharqa.

⁵Quezib llaqtapi Judá kachkaptinmi, warmin kasqallan wiksayakuruspan qari wawata wachakururqa, hinaspam Selawan suticharqa.

⁶Piwi churin Ertam Tamarwan Judá casarachirqa.

⁷Ichaqa Judapa piwi churin Ermi, Diospa qayllanpi mana allinkuna ruwaq karqa, chayraykum Dios wañurachirqa.

⁸Hinaptinmi churin Onanta Judá nirqa: Wawqekipa viudanwan casarakuy, cuñado hina debernikita cumpliy, chaynapi wawqekipa miraynin ama chinkananpaq, nispa.

⁹Chaymi Onán wawqenpa viudanwan puñuspa pampallaman sutuchiq, wawqenpa miraynin kananta mana munaspan. Payqa yacharqam wiksayakuruptinqa chay wawa wawqenpa mirayninña kananta.

¹⁰Onanpa chay ruwasqanmi Diospaq mana allinchu karqa, chaymi paytapas wañurachirqa.

¹¹Hinaptinmi llumchuynin Tamarta Judá nirqa: Hina viudallayá taytaykipa wasinpi yachamuchkay, churiy Sela hatunyanankama, nispa. Chaynataqa nirqa: “Yanqañataq churiy Selapas wawqenkuna hina wañurunman” nispanmi. Chaymi Tamarqa taytanpaman ripukurqa.

¹²Punchawkuna risqanman hinam Judapa warmin, Súa sutiyuq runapa churin wañukurqa; chaymi Judá lutonta mudaruspan Timnat llaqtata ovejankuna rutuq rirqa. Paytam Adulam llaqtayuq amistadnin Hira riysirqa.

¹³Chaymi Tamarman willaykurqaku: “Suegroykim Timnat llaqtaman ovejankuna rutuq richkan”, nispanku.

¹⁴Hinaptinmi Tamarqa viuda pachanta hurqokuruspan, mana reqsirunankupaq velowan tapakuykuspan, Enaim llaqtaman yaykunapi tiyarqa, Timnatman rina ñanpa patanpi. Tamarqa yacharqam cuñadon Sela yuyayniyuqña kasqanta, yacharqataqmi suegronqa prometikusqanman hina mana casarachisqantapas.

¹⁵Chaymi Judaqa Tamarta rikuruspan chuchumikapaq hapirqa, uyan tapasqa kasqanrayku.

¹⁶Chay warmiman asuykuspanmi Judá nirqa: Qanwan puñuytam munani, nispan. Chaynataqa nirqa llumchuynin kasqanta mana yachasqanraykum. Chay warmiñataqmi nirqa: ¿Imatataq qowanki ñoqawan puñuruspaykiqa? nispa.

¹⁷Judañataqmi nirqa: Huk chivatochatam apachimusqayki, nispa. Hinaptinmi warmiñataq nirqa: Apachimuwanaykikamayá prendata saqeykuway, nispa.

¹⁸Chaymi Judá tapurqa: ¿Ima saqenaytataq munanki? nispa. Tamarñataqmi nirqa: Watuyuq selloykitawan tawnaykita saqeykuway, nispa. Chaymi qoykuspan paywan puñuruptin Tamar wiksayakururqa.

¹⁹Chaymanta kutikuspanmi Tamarqa tapakusqan velonta hurqokuruspan viuda pachanwan huktawan pachakuykurqa.

²⁰Judañataqmi Adulam llaqtayuq amistadninwan huk chivatochata apachirqa, chaynapi chay warmiman saqesqan sellonta chaynataq tawnanta mañapamunanpaq, ichaqa manam tarimurqachu.

²¹Hinaspam chay warmiwan tupasqan lugarpi runakunata kaynata tapukurqa: ¿Maypitaq ñanpa patanpi tiyaq Enaimpi chuchumika warmi kachkan? nispa. Hinaptinmi paykunañataq nirqaku: Manam kaypiqa kanchu ima chuchumika warmipas nispanku.

²²Chaymi kutispan Judata Hira nirqa: Manam tarimunichu, runakunata tapukuptiypas “kaypiqa manam ima chuchumika warmipas kanchu” nimuwankum, nispan.

²³Hinaptinmi Judá nirqa: Mana tarimuptikiqa hinañayá chay saqemusqayta apakuchun, ama pipas asipayawananchikpaq. Ñoqaqa kay chivatochatam apachirqayki, aswanqa manam tarimunkichu, nispa.

²⁴Kimsa killa pasaruptinmi Judaman kaynata willaykurqaku: Llumchuyniki Tamarmi huchapakuruspa wiksayuq rikurirun, nispanku. Chaymi Judá nirqa: Hurqomuspa kañaychik, nispa.

²⁵Chaymi payta hurqomuchkaptinku suegronman kaynata nimunankupaq kacharqa: “Kaykuna saqewaqniy runapatam wiksayakuruni. Chaynaqa, reqsiykuy ¿pipataq kay watuyuq sellowan tawna?” nispa.

²⁶Hinaptinmi Judá reqsikuruspan nirqa: Ñoqam huchayuqqa kani, payqa mana huchayuqmi, churiy Selawan mana casarachisqayraykum kayta ruwakurun, nispa. Chaymatapunim Tamarwanqa manaña puñurqañachu.

²⁷Tamarpa wachakunan tiempo chayaramuptinmi awa kasqa.

²⁸Wachakuptinmi huknin wawa makichanta hurqoramurqa, hinaptinmi partera hapiruspan puka qaytuwan watarurqa: Kaymi puntata lloqsimurqa, nispan.

²⁹Makinta kaq kutiykarachiptinmi huknin wawqen lloqsiramurqa puntata, hinaptinmi partera nirqa: ¿Imaynatataq lloqsiramunaykipaq kichakamurqanki? nispa. Chaymi [46]Fareswan suticharqa.

³⁰Paypa qepantañam puka qaytuwan watuchasqa wawqen lloqsiramurqa, paytam Zarawan suticharqa.